சென்னை: இயக்குநர் ஐஸ்வர்யா ரஜினிகாந்த் 3, வை ராஜா வை உள்ளிட்ட படங்களை இயக்கியுள்ளார். இவரது இயக்கத்தில் நடிகர்கள் விஷ்ணு விஷால், விக்ராந்த் உள்ளிட்டோர் நடித்துக் கடந்த பிப்ரவரி 9ஆம் தேதி வெளியான திரைப்படம் 'லால் சலாம்'. இப்படத்தில் நடிகர் ரஜினிகாந்த் சிறப்புத் தோற்றத்தில் நடித்துள்ளார். மொய்தீன் பாய் என்ற கதாபாத்திரத்தில் அவர் நடித்துள்ளார். இப்படத்தை லைகா புரொடக்சன்ஸ், சுபாஸ்கரன் தயாரித்துள்ள நிலையில், ஏ.ஆர்.ரகுமான் இசையமைத்துள்ளார். லால் சலாம் படம் வெளியாகி கலவையான விமர்சனங்களைப் பெற்றது.
இப்படத்தில் சிறப்புத் தோற்றத்தில் நடித்த ரஜினிகாந்த், பெரும்பாலான காட்சிகளில் தோன்றினாலும், லால் சலாம் எதிர்பார்த்த வெற்றியைப் பெறவில்லை. இந்நிலையில் சமீபத்தில் ஒரு பேட்டியில் ஐஸ்வர்யா ரஜினிகாந்த், லால் சலாம் படத்தின் நிறையக் காட்சிகள் காணாமல் போனதால் இருப்பதை வைத்துப் படத்தை முடித்தாக தெரிவித்துள்ளார்.
இதுகுறித்து அவர் கூறுகையில், "லால் சலாம் படத்தின் 21 நாட்கள் எடுத்த காட்சிகள் அடங்கிய ஹார்ட் டிஸ்க் (hard disk) தொலைந்துவிட்டது. ஆயிரக்கணக்கான பேர் பங்கேற்ற கிரிக்கெட் போட்டி காட்சிகள் எடுத்திருந்தோம். அந்த காட்சிகள் உண்மையான கிரிக்கெட் போட்டி போல 10 கேமராக்கள் பயன்படுத்தி எடுக்கப்பட்டது.
ஆனால் அந்த காட்சிகள் எல்லாம் காணாமல் போனது. மீண்டும் படப்பிடிப்பு நடத்த முடியாத சூழல் ஏற்பட்டது. விஷ்ணு விஷால், அப்பா (ரஜினி), செந்தில் சார் எல்லோரும் கெட்டப் மாற்றிவிட்டனர். விஷ்ணு இப்படத்திற்காகத் தாடி வைத்தார் அதனையும் எடுத்துவிட்டார். அப்பாவும் அடுத்த படத்தின் படப்பிடிப்பிற்குச் சென்றுவிட்டார்.
அது மட்டுமின்றி மிகப் பெரிய பொருளாதாரச் சிக்கலும் இருந்தது. இதனால் இருக்கின்ற காட்சிகளை வைத்துப் படத்தை முடிக்க வேண்டிய நிலை ஏற்பட்டது. ஹார்ட் டிஸ்க் தொலைந்து போகாமலிருந்திருந்தால் படத்தின் கதையை இன்னும் தெளிவாகச் சொல்லி இருப்போம் என்று கூறியுள்ளார்.
லால் சலாம் திரைப்படம் ரசிகர்களிடம் வரவேற்பைப் பெறாத நிலையில் இயக்குநர் ஐஸ்வர்யா ரஜினிகாந்த் தற்போது விளக்கம் அளித்துள்ளார். முன்னதாக லால் சலாம் திரைப்பட இசை வெளியீட்டு விழாவில் தனது லால் சலாம் படத்திற்கு மற்ற ரஜினி படத்தை போல் ரசிகர்கள் மத்தியில் எதிர்பார்ப்பு இல்லை என ஐஸ்வர்யா ரஜினிகாந்த் கூறியது குறிப்பிடத்தக்கது.
இதையும் படிங்க: எனது ஜெ.பேபி படம் வணிக ரீதியாக வெற்றியா - மனம் திறந்த பா.ரஞ்சித்!
