சென்னை: அரசு கலை மற்றும் அறிவியல் கல்லூரிகள், கல்வியியல் கல்லூரி உள்ளிட்டவற்றில் காலியாக உள்ள 4 ஆயிரம் உதவி பேராசிரியர் காலிப் பணியிடங்கள் நிரப்பப்படும் என கடந்த மார்ச் மாதம் 14 தேதி ஆசிரியர் தேர்வு வாரியம் தரப்பில் அறிவிப்பு வெளியிடப்பட்டது. அதனைத் தொடர்ந்து இத்தேர்வினை எழுதுவதற்கு 73 ஆயிரத்து 311 பேர் விண்ணப்பித்திருந்தனர்.
அரசு கலை மற்றும் அறிவியல் கல்லூரிகளில் ஏற்கனவே பணியாற்றி வரும் கௌரவ விரிவுரையாளர்கள், உதவி பேராசிரியர் பணி நியமனத்தில் தங்களுக்கு முன்னுரிமை அளிக்க வேண்டும் என நீதிமன்றத்தில் வழக்குத் தொடுக்கப்பட்டது.
அதேபோல தனியார் கலை மற்றும் அறிவியல் கல்லூரிகளில் பணியாற்றி வரும் விரிவுரையாளர்களும் தங்களுக்கும் முன்னுரிமை அளிக்க வேண்டும் என வழக்குத் தொடுத்தனர். இந்த வழக்குகள் காரணமாக உதவி பேராசிரியர் பணியிடத்திற்கான தேர்வை நடத்துவதில் ஆசிரியர் தேர்வு வாரியத்திற்குச் சிக்கல் எழுந்துள்ளது.
இந்த நிலையில் ஆசிரியர் தேர்வு வாரியத்தின் தலைவர் வெங்கடப்பிரியா வெளியிட்டுள்ள அறிவிப்பில், "ஆசிரியர் தேர்வு வாரியம் மூலம் அரசுக் கலை மற்றும் அறிவியல் கல்லூரி, கல்வியியல் கல்லூரிகளுக்கான உதவிப் பேராசிரியர் பணியிடங்களுக்கு போட்டித்தேர்வு மூலம் நேரடி நியமனம் செய்ய அறிவிப்பு வெளியிடப்பட்டது.
மேலும், போட்டித் தேர்வு ஆகஸ்ட் 4ஆம் தேதி நடைபெறும் என அறிவிக்கப்பட்டிருந்த நிலையில், நிர்வாகக் காரணங்களால் தேர்வு ஒத்திவைக்கப்பட்டுள்ளது. இந்த தேர்விற்கான தேதி பின்னர் அறிவிக்கப்படும்" எனத் தெரிவித்துள்ளார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: பொறியியல் கலந்தாய்வு.. 85 கல்லூரிகளுக்கு நிபந்தனையுடன் அனுமதி!
