டெல்லி: மதுபானக் கொள்கை முறைகேடு வழக்கில் கைதான டெல்லி முதலமைச்சரும், ஆம் ஆத்மி கட்சியின் ஒருங்கிணைப்பாளருமான அரவிந்த் கெஜ்ரிவாலுக்கு ஜூன் 1ஆம் தேதி வரை வரை உச்ச நீதிமன்றம் ஜாமீன் வழங்கியுள்ளது.
டெல்லி முதலமைச்சர் அரவிந்த் கெஜ்ரிவால் கடந்த மார்ச் 21ஆம் தேதி மதுபானக் கொள்கை முறைகேடு வழக்கில் அமலாக்கத் துறையினரால் கைது செய்யப்பட்டு, திகார் சிறையில் அடைக்கப்பட்டுள்ளார். நாடாளுமன்றத் தேர்தல் அறிவிப்பையொட்டி நடந்த இந்த கைது சம்பவம் நாடளவில் பெரும் அதிர்வலைகளை ஏற்படுத்தியது.
இந்த நிலையில், தன் மீதான குற்றசாட்டுகளை எதிர்த்து சட்டப் போராட்டம் நடத்தி வரும் கெஜ்ரிவால் தேர்தலை எதிர்கொள்வதற்காக ஜாமீன் கேட்டு டெல்லி உயர் நீதிமன்றத்தில் மனு தாக்கல் செய்தார். ஆனால், அவருக்கு ஜாமீன் கொடுக்க நீதிமன்றம் மறுத்து விட்டது.
இந்த நிலையில், அரவிந்த் கெஜ்ரிவால் ஜாமீன் கேட்டு உச்ச நீதிமன்றத்தில் மேல்முறையீட்டு மனு தாக்கல் செய்தார். அந்த மனு மீதான விசாரணை கடந்த முறை வந்தபோது அதனை எதிர்த்து அமலாக்கத்துறை தரப்பில் கடுமையான வாதம் வைக்கப்பட்டது. '' தேர்தல் பிரச்சாரம் செய்வதற்கான உரிமை அடிப்படை உரிமையோ அல்லது அரசியலமைப்பு உரிமையோ கிடையாது. அரவிந்த் கெஜ்ரிவால் முதலமைச்சராக இருப்பதால் அவருக்கு விதிவிலக்கு கொடுக்க முடியாது என்றும் உச்ச நீதிமன்றம் அரசியல்வாதிகளுக்கு விதிவிலக்கு அளிக்கிறதா என்றும் அமலாக்கத்துறை தரப்பில் காட்டமாக வாதம் வைக்கப்பட்டன.
அப்போது நீதிபதிகள் தரப்பில், அரவிந்த் கெஜ்ரிவால் தேர்தெடுக்கப்பட்ட முதல்வர், தற்போது தேர்தல் நடந்து கொண்டிருப்பதால் அவர் பிரச்சாரம் செய்ய வேண்டியிருக்கும் என கருத்து தெரிவித்த நீதிமன்றம் கெஜ்ரிவாலுக்கு ஜாமீன் வழங்குவதை குறித்து இன்று வெள்ளிக்கிழமை பரிசீலிக்கப்படும் என்று சூசகமாக தெரிவித்திருந்தது.
அதன்படி, இந்த வழக்கு இன்று உச்ச நீதிமன்ற நீதிபதிகள் சஞ்சீவ் கண்ணா மற்றும் தீபங்கர் தத்தா ஆகியோர் அடங்கிய அமர்வு முன்பு விசாரணைக்கு வந்தது. அப்போது அமலாக்கத்துறை தரப்பில் ஆஜரான சொலிசிட்டர் ஜெனரல் துஷார் மேத்தா ஜாமீன் மனுவுக்கு எதிராக கடுமையான வாதங்களை முன்வைத்தார்.
தொடர்ந்து மனுவை விசாரித்த நீதிபதிகள் தேர்தலை கருத்தில்கொண்டு அரவிந்த் கெஜ்ரிவாலுக்கு ஜூன் 1ம் தேதி வரை இடைக்கால ஜாமீன் வழங்கி உத்தரவிட்டனர். அப்போது அமலாக்கத்துறை தரப்பில் கண்டிப்பான விதிகள் கோரப்பட்டன. இடைக்கால ஜாமீனில் செல்லும் கெஜ்ரிவால், இந்த வழக்கு குறித்து ஊடகங்களிடம் பேசக் கூடாது, முதல்வராக எந்த அதிகாரபூர்வ பணிகளிலும் ஈடுபடக்கூடாது என்று தெரிவித்தது. அதன்படி, உத்தரவிட்ட நீதிபதிகள் ஜூன் ஜூன் 2ம் தேதி மீண்டும் சரணடைய வேண்டும் என ஆணையை பிறப்பித்தனர்.
இதையும் படிங்க: "பாகிஸ்தான் மரியாதைக்குரிய நாடு... அவர்களிடம் அணுகுண்டு உள்ளது" -மணிசங்கர் ஐயரின் கருத்தால் சர்ச்சை! - Mani Shankar Aiyar
