ஆக்ரா: உத்தரப் பிரதேசத்தின் ஹத்ராஸில் பள்ளி வளர்ச்சி, முன்னேற்றத்துக்காக 11 வயது குழந்தையை நர பலி கொடுத்த பள்ளியின் உரிமையாளர், இயக்குநர், முதல்வர் மற்றும் இரு ஆசிரியர்கள் என 5 பேர் கைது செய்யப்பட்டுள்ளனர்.
பிரேத பரிசோதனை அறிக்கையில் இரண்டாம் வகுப்பு பயிலும் அம்மாணவன் கழுத்து நெரிக்கப்பட்டு கொல்லப்பட்டிருப்பது தெரியவந்துள்ளதாக போலீசார் தெரிவித்தனர். ஹத்ராஸில் உள்ள டிஎல் பப்ளிக் பள்ளியின் உரிமையாளரான ஜசோதன் சிங், மாந்தரீக சடங்குகளில் நம்பிக்கை கொண்டவர்.
இந்நிலையில் பள்ளி மற்றும் அவரது குடும்பம் செழிப்பாக இருப்பதற்காக, ஒரு குழந்தையை பலி கொடுக்குமாறு பள்ளியின் இயக்குநரான தனது மகன் தினேஷ் பாகேலிடம் ஜசோதன் சிங் கேட்டுள்ளார். இதைத் தொடர்ந்தே நரபலி சம்பவம் நடந்துள்ளது. இது குறித்து , ஹத்ராஸ் கூடுதல் காவல் கண்காணிப்பாளர் (ஏஎஸ்பி) அசோக் குமார் சிங் கூறியதாவது:
"உயிர் பலி கொடுக்கப்பட்ட மாணவர் டிஎல் பப்ளிக் பள்ளியில் இரண்டாம் வகுப்பு படிக்கும் கிருதார்த் (11) என அடையாளம் காணப்பட்டுள்ளார். கடந்த 23ம் தேதி அன்று, பள்ளி விடுதியிலிருந்து ஆசிரியர்கள் ராம்பிரகாஷ் சோலங்கி, தினேஷ் பாகேல் மற்றும் ஜசோதன் சிங் ஆகியோரால் மாணவர் கடத்தப்பட்டார்.
இதையும் படிங்க: டெல்லியில் பிரதமரை சந்தித்த முதல்வர் ஸ்டாலின்.. தமிழகத்திற்காக வைத்த கோரிக்கைகள் என்னென்ன?
பின்னர், நரபலியிடத்துக்கு அந்த மாணவனை கொண்டுச் சென்றனர். அங்கு மாணவனை கழுத்தை நெரித்து உயிர்பலி கொடுத்துள்ளனர். அப்போது பள்ளியின் மற்றொரு ஆசிரியர் வீர்பால் சிங், பள்ளி முதல்வர் லக்ஷ்மண் சிங் ஆகியோரும் சம்பவ இடத்தில் இருந்தனர்.
இந்நிலையில், பாகேலின் காரில் குழந்தையை கொண்டு செல்லும்போது, மாணவன் கிருதார்த்துக்கு உடல்நிலை சரியில்லை என அவரின் பெற்றோரிடம் தெரிவித்துள்ளனர். எனினும், சந்தேகமடைந்த குழந்தையின் குடும்பத்தினர் இதுகுறித்து போலீஸில் புகார் அளித்தனர்.
இந்நிலையில் பிரேத பரிசோதனை அறிக்கையில் குழந்தை கழுத்தை நெரித்து கொல்லப்பட்டது உறுதியானது. அதைத் தொடர்ந்து போலீஸார் நடத்திய விசாரணையில், பள்ளி மற்றும் உரிமையாளரின் குடும்பம் செழிப்பாக இருக்க வேண்டி, குழந்தையை கழுத்தை நெரித்து கொன்றதை ஒப்புக் கொண்டனர்"
இவ்வாறு ஏஎஸ்பி அசோக் குமார் சிங் தெரிவித்தார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே க்ளிக் செய்யவும்
