ਨਗਰ ਕੌਂਸਲ ਵਿੱਚ ਮਾਹੌਲ ਤਣਾਅ ਪੂਰਨ,ਕੱਚੇ ਮੁਲਾਜਮਾਂ ਵਲੋਂ ਰੱਖੇ ਪ੍ਰੋਗਰਾਮ ਨੂੰ ਪੁਲਿਸ ਨੇ ਰੋਕਿਆ

ਤਰਨ ਤਾਰਨ ਦੇ ਨਗਰ ਕੌਂਸਲ ਵਿੱਚ ਮਾਹੌਲ ਭੱਖ ਗਿਆ, ਜਿਸ ਤੋਂ ਬਾਅਦ ਪੁਲਿਸ ਨੂੰ ਦਖਲ ਦੇਣਾ ਪਿਆ। ਮਾਮਲਾ ਕੱਚੇ ਮੁਲਾਜ਼ਮਾਂ ਨਾਲ ਸਬੰਧਤ ਹੈ, ਜਿੰਨਾ ਨੇ ਆਪਣੀ ਮੰਗ ਮਨਵਾਉਣ ਲਈ ਧਰਨਾ ਦਿੱਤਾ ਸੀ, ਪਰ ਉਕਤ ਅਫਸਰਾਂ ਵੱਲੋਂ ਇਸ ਨੂੰ ਚੁੱਕਵਾ ਦਿੱਤਾ ਗਿਆ।

ਤਰਨਤਾਰਨ : ਤਰਨਤਾਰਨ ਵਿਖੇ ਮਾਹੌਲ ਉਸ ਵੇਲੇ ਤਣਾਅਪੂਰਣ ਹੋ ਗਿਆ ਜਦੋਂ ਕੱਚੇ ਮੁਲਾਜ਼ਮਾਂ ਵੱਲੋਂ ਮੰਗਾਂ ਮਨਵਾਉਣ ਲਈ ਨਗਰ ਕੌਂਸਲ ਪ੍ਰਸ਼ਾਸਨ ਖਿਲਾਫ ਧਰਨਾ ਲਾਉਣ ਦੀਆਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਸਨ। ਉਥੇ ਹੀ ਕੱਚੇ ਮੁਲਾਜ਼ਮਾਂ ਦੁਆਰਾ ਨਗਰ ਕੌਂਸਲ ਦੇ ਅੰਦਰ ਸਮਾਗ਼ਮ ਦੀਆਂ ਤਿਆਰੀਆਂ ਦੇ ਰੰਗ ਵਿੱਚ ਭੰਗ ਪਾਉਣ ਲਈ ਮੌਕੇ 'ਤੇ ਹੀ ਪੁਲਿਸ ਪਹੁੰਚ ਗਈ ਅਤੇ ਪੁਲਿਸ ਨੇ ਆ ਕੇ ਸਮਾਗਮ ਰੁਕਵਾ ਦਿੱਤਾ, ਜਿਸ ਕਾਰਨ ਇਕੱਠੇ ਹੋਏ ਮੁਲਾਜ਼ਮਾਂ ਵਿੱਚ ਗੁੱਸਾ ਦੇਖਣ ਨੂੰ ਮਿਲਿਆ। ਮੁਲਾਜ਼ਮਾਂ ਨੇ ਕਿਹਾ ਕਿ ਅਸੀਂ ਕਦੋਂ ਦੇ ਇੰਟਰਵਿਊ ਦੇ ਚੁਕੇ ਹਾਂ ਪਰ ਸਾਨੂ ਅਜੇ ਤੱਕ ਪੱਕੀ ਨੌਕਰੀ ਨਹੀਂ ਮਿਲੀ। ਇਹ ਲੋਕ ਸਾਡੇ ਨਾਲ ਧੱਕਾ ਕਰ ਰਹੇ ਹਨ। ਅਸੀਂ ਮੁਲਾਜ਼ਮ ਹਾਂ ਜਿਥੇ ਕੰਮ ਕਰਦੇ ਹਾਂ ਜਿੰਨਾਂ ਦਾ ਕੂੜਾ ਚੁੱਕਦੇ ਹਾਂ ਕੀ ਸਾਨੂ ਉੱਥੇ ਆਪਣੀ ਗੱਲ ਰੱਖਣ ਦਾ ਅਧਿਕਾਰ ਨਹੀਂ ?

ਸਫਾਈ ਸੇਵਕਾਂ ਨੇ ਬਣਦੇ ਹੱਕ ਲਈ ਆਵਾਜ਼ ਚੁੱਕਣ ਲਈ ਕੀਤਾ ਸੀ ਇਕੱਠ : ਗੱਲਬਾਤ ਕਰਦਿਆਂ ਸਫ਼ਾਈ ਸੇਵਕ ਯੂਨੀਅਨ ਦੇ ਪ੍ਰਧਾਨ ਸਾਜਨ ਨੇ ਕਿਹਾ ਕਿ ਅੱਜ ਸਾਡੀਆਂ ਮੰਗਾਂ ਨੂੰ ਲੈ ਕੇ ਪ੍ਰੋਗਰਾਮ ਰੱਖਿਆ ਗਿਆ ਸੀ ਜਿਸ ਵਿੱਚ ਸਾਡੇ ਪੰਜਾਬ ਪ੍ਰਧਾਨ ਨੇ ਆਉਣਾ ਸੀ ਪਰ ਮੌਕੇ 'ਤੇ ਇਥੋਂ ਦੇ ਸੈਂਟਰੀ ਅਫ਼ਸਰ ਨੇ ਪੁਲਿਸ ਨੂੰ ਭੇਜ ਕੇ ਸਾਡਾ ਪ੍ਰੋਗਰਾਮ ਰੁੱਕਵਾ ਦਿੱਤਾ ਹੈ ਅਤੇ ਸਾਡਾ ਲੱਗਾ ਟੈਂਟ ਵੀ ਪੁਟਵਾ ਦਿੱਤਾ ਹੈ। ਉਹਨਾਂ ਕਿਹਾ ਕਿ ਸਾਡੇ ਪੰਜਾਬ ਪ੍ਰਧਾਨ ਜੋ ਵੀ ਨਿਰਦੇਸ਼ ਦੇਣਗੇ, ਪ੍ਰੋਗਰਾਮ ਉਸੇ ਤਰ੍ਹਾਂ ਹੀ ਹੋਵੇਗਾ। ਕਿਓਂਕਿ ਅਸੀਂ ਬਹੁਤ ਸਮੇਂ ਦੇ ਉਡੀਕ ਕਰ ਰਹੇ ਸੀ ਕਿ ਸਾਡੇ ਮਸਲੇ ਦਾ ਹਲ ਹੋਵੇਗਾ, ਪਰ ਨਹੀਂ ਹੋਇਆ।

ਬਿਨਾਂ ਮਨਜ਼ੂਰੀ ਕਰਮਚਾਰੀ ਕਰ ਰਹੇ ਸਨ ਰੋਸ ਦੀ ਤਿਆਰੀ : ਉਧਰ ਦੂਜੇ ਪਾਸੇ ਇਸ ਮਾਮਲੇ ਸਬੰਧੀ ਜਦੋਂ ਸੈਂਟਰੀ ਅਫ਼ਸਰ ਸ਼ਮਸ਼ੇਰ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਨਗਰ ਕੌਂਸਲ ਅੰਦਰ ਕਿਸੇ ਕਿਸਮ ਦਾ ਪ੍ਰੋਗਰਾਮ ਨਹੀਂ ਕੀਤਾ ਜਾ ਸਕਦਾ ਅਤੇ ਨਾ ਹੀ ਕਿਸੇ ਵਲੋਂ ਕੋਈ ਮਨਜ਼ੂਰੀ ਲਈ ਗਈ ਹੈ। ਜੋ ਕਾਨੂੰਨ ਮੁਤਾਬਿਕ ਹੈ ਸਾਡੇ ਵੱਲੋਂ ਉਹੀ ਹੋਵੇਗਾ। ਗੈਰਕਾਨੂੰਨੀ ਕੰਮ ਕਰਨ ਵਾਲਿਆਂ ਖਿਲਾਫ ਪ੍ਰਸ਼ਾਸਨ ਕਾਰਵਾਈ ਕਰੇਗਾ। ਇਹਨਾਂ ਕਰਮਚਾਰੀਆਂ ਨੇ ਸਾਡੇ ਨਾਲ ਕੋਈ ਗੱਲ ਨਹੀਂ ਕੀਤੀ ਇਸ ਕਰਕੇ ਨਿਯਮਾਂ ਦੇ ਉਲੰਘਣ ਵੱਜੋਂ ਇਹਨਾਂ ਨੂੰ ਰੋਕਿਆ ਗਿਆ ਹੈ।

ਇਸ ਮਾਮਲੇ ਸਬੰਧੀ ਮੌਕੇ 'ਤੇ ਪੁੱਜੇ ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਸਾਨੂੰ ਸ਼ਿਕਾਇਤ ਆਈ ਤਾਂ ਅਸੀਂ ਇਸ ਤਹਿਤ ਕਾਰਵਾਈ ਕੀਤੀ ਹੈ। ਜੇਕਰ ਇਹਨਾਂ ਨੂੰ ਇਜਾਜ਼ਤ ਮਿਲਦੀ ਹੈ ਤਾਂ ਇਹ ਮੁਲਾਜ਼ਮ ਧਰਨਾ ਲਾ ਸਕਦੇ ਹਨ ਨਹੀਂ ਤਾਂ ਅਸੀਂ ਉਲੰਘਣਾਂ ਨਹੀਂ ਹੋਣ ਦੇਵਾਂਗੇ। ਨਗਰ ਕੌਂਸਲ ਦੇ ਅੰਦਰ ਬਿਨਾ ਮਨਜ਼ੂਰੀ ਤੋਂ ਪ੍ਰੋਗਰਾਮ ਕੀਤਾ ਜਾ ਰਿਹਾ ਸੀ ਤਾਂ ਰੁਕਵਾਇਆ ਹੈ।