ਬਟਾਲਾ: ਸੂਬੇ ਵਿੱਚ ਰੋਜ਼ਾਨਾ ਹੀ ਭੋਲੇ-ਭਾਲੇ ਲੋਕਾਂ ਨੂੰ ਵਿਦੇਸ਼ ਭੇਜਣ ਦੇ ਨਾਂਅ 'ਤੇ ਟ੍ਰੈਵਲ ਏਜੰਟਾਂ ਵੱਲੋਂ ਠੱਗਿਆ ਜਾ ਰਿਹਾ ਹੈ। ਵਿਦੇਸ਼ ਜਾਣ ਲਈ ਨੌਜਵਾਨ ਪੈਸਾ ਦੇਣ ਨੂੰ ਤਿਆਰ ਰਹਿੰਦੇ ਹਨ ਪਰ ਏਜੰਟਾਂ ਦੀ ਚੰਗੀ ਤਰ੍ਹਾਂ ਜਾਂਚ ਨਾ ਕਰਨ ਕਾਰਨ ਜ਼ਿਆਦਾਤਰ ਠੱਗੀ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਅਜਿਹਾ ਹੀ ਮਾਮਲਾ ਬਟਾਲਾ ਵਿੱਚ ਦੇਖਣ ਨੂੰ ਮਿਲਿਆ ਹੈ। ਵਿਦੇਸ਼ ਜਾਣ ਲਈ 35 ਨੌਜਵਾਨਾਂ ਨੇ ਲੱਖਾਂ ਰੁਪਏ 2 ਏਜੰਟਾਂ ਨੂੰ ਦੇ ਦਿੱਤੇ ਅਤੇ ਜਦੋਂ ਏਜੰਟਾਂ ਵੱਲੋਂ ਦਿੱਤੇ ਗਏ ਵੀਜ਼ਾ ਅਤੇ ਟਿਕਟਾਂ ਦੀ ਜਾਂਚ ਕਰਵਾਈ ਗਈ ਤਾਂ ਉਹ ਫ਼ਰਜ਼ੀ ਨਿਕਲੇ। ਏਜੰਟਾਂ ਦੇ ਦਫ਼ਤਰ ਪਹੁੰਚਣ 'ਤੇ ਵੀ ਉਥੇ ਤਾਲਾ ਲੱਗਿਆ ਮਿਲਿਆ।
ਬਟਾਲਾ ਦੇ ਫ਼ੁਹਾਰਾ ਚੌਂਕ ਵਿੱਚ ਮੌਜੂਦ ਗੁਰੂ ਕਿਰਪਾ ਟ੍ਰੇਡ ਸੈਂਟਰ ਦੇ ਨਾਂਅ ਉੱਤੇ ਚਲਾਈ ਜਾ ਰਹੀ ਟ੍ਰੈਵਲ ਕੰਪਨੀ ਨੇ ਇੱਥੋਂ ਦੇ ਵੱਖ-ਵੱਖ ਪਿੰਡਾਂ ਦੇ 35 ਨੌਜਵਾਨਾਂ ਨੂੰ ਕੁਵੈਤ ਭੇਜਣ ਅਤੇ ਚੰਗੀ ਨੌਕਰੀ ਦੇ ਨਾਂਅ ਉੱਤੇ ਠੱਗ ਲਿਆ। ਏਜੰਟ ਨੇ ਨਕਲੀ ਵੀਜ਼ਾ ਅਤੇ ਟਿਕਟ ਦੇ ਕੇ ਲੱਖਾਂ ਰੁਪਏ ਦੀ ਠੱਗੀ ਮਾਰੀ।
ਦਰਅਸਲ, ਏਜੰਟ ਨੇ ਇਸ਼ਤਿਹਾਰ ਦਿੱਤਾ ਸੀ ਤੇ ਜਦੋਂ ਸਾਰੇ ਨੌਜਵਾਨਾਂ ਨੇ ਉਸ ਨਾਲ ਰਾਬਤਾ ਕਾਇਮ ਕੀਤਾ ਤਾਂ ਦੋਵਾਂ ਟ੍ਰੈਵਲ ਏਜੰਟਾਂ ਨੇ ਵਿਦੇਸ਼ ਭੇਜਣ ਦੇ ਨਾਂਅ ਉੱਤੇ ਉਨ੍ਹਾਂ ਦੇ ਪਾਸਪੋਰਟ ਆਪਣੇ ਕੋਲ ਰੱਖ ਲਏ ਅਤੇ ਕੁੱਝ ਅਡਵਾਂਸ ਵੀ ਲੈ ਲਿਆ। ਸਾਰੇ ਪੈਸੇ ਜਮ੍ਹਾਂ ਕਰਵਾਉਣ ਤੋਂ ਬਾਅਦ ਦੋਵੇਂ ਏਜੰਟ ਫਰਾਰ ਹੋ ਗਏ। ਪੀੜਤ ਨੌਜਵਾਨਾਂ ਨੇ ਇਨਸਾਫ਼ ਦੀ ਮੰਗ ਕੀਤੀ ਹੈ। ਗ਼ੌਰਤਲਬ ਹੈ ਕਿ ਸਾਰੇ ਹੀ ਨੌਜਵਾਨ ਗਰੀਬ ਪਰਿਵਾਰ ਨਾਲ ਸਬੰਧਤ ਹਨ।
ਪੀੜਤ ਨੌਜਵਾਨਾਂ ਨੇ ਪ੍ਰਸ਼ਾਸ਼ਨ ਕੋਲੋਂ ਮੰਗ ਕੀਤੀ ਹੈ ਉਨ੍ਹਾਂ ਵੱਲੋਂ ਦਿੱਤੇ ਗਏ ਰੁਪਏ ਵਾਪਸ ਕਰਵਾਏ ਜਾਣ ਅਤੇ ਫ਼ਰਜ਼ੀ ਏਜੰਟਾਂ ਨੂੰ ਫੜ੍ਹ ਕੇ ਉਨ੍ਹਾਂ ਕੋਲੋਂ ਪਾਸਪੋਰਟ ਸਾਡੇ ਪਾਸਪੋਰਟ ਵੀ ਜ਼ਬਤ ਕੀਤੇ ਜਾਣ।
