ਵੱਡੇ ਲੇਖਕ-ਅਦਾਕਾਰ ਉਤੇ ਲੱਗੇ ਬਲਾਤਕਾਰ ਦੇ ਇਲਜ਼ਾਮ, ਔਰਤ ਨੇ ਖੁੱਲ੍ਹੇਆਮ ਸੋਸ਼ਲ ਮੀਡੀਆ ਉਤੇ ਪਾਈ ਪੋਸਟ

ਪੰਜਾਬੀ ਸਿਨੇਮਾ ਨੂੰ ਬਤੌਰ ਲੇਖਕ ਕਈ ਹਿੱਟ ਫਿਲਮਾਂ ਦੇ ਚੁੱਕੇ ਵੱਡੇ ਅਦਾਕਾਰ-ਲੇਖਕ ਵਿਵਾਦ ਦਾ ਸਾਹਮਣਾ ਕਰ ਰਹੇ ਹਨ।

ਚੰਡੀਗੜ੍ਹ: ਪੰਜਾਬੀ ਫਿਲਮ ਉਦਯੋਗ ਵਿੱਚ ਅੱਜਕੱਲ੍ਹ ਚਰਚਿਤ ਨਾਂਅ ਵਜੋਂ ਜਾਣੇ ਜਾਂਦੇ ਅਦਾਕਾਰ, ਨਿਰਦੇਸ਼ਕ ਅਤੇ ਲੇਖਕ ਇੱਕ ਵੱਡੇ ਅਤੇ ਗੰਭੀਰ ਵਿਵਾਦ ਵਿੱਚ ਘਿਰਦੇ ਨਜ਼ਰ ਆ ਰਹੇ ਹਨ, ਜਿੰਨ੍ਹਾਂ ਉਪਰ ਕਥਿਤ ਜਿਨਸੀ ਸ਼ੋਸ਼ਣ ਦਾ ਇਲਜ਼ਾਮ ਲਗਾਉਂਦਿਆਂ ਪਾਲੀਵੁੱਡ ਨਾਲ ਹੀ ਸੰਬੰਧਤ ਇੱਕ ਮਹਿਲਾ ਵੱਲੋਂ ਖਰੜ ਪੁਲਿਸ ਕੋਲ ਅਪਣੀ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ।

ਇਸੇ ਮਾਮਲੇ ਵਿੱਚ ਪੀੜ੍ਹਤ ਔਰਤ ਵੱਲੋਂ ਅਪਣੇ ਸ਼ੋਸ਼ਲ ਪਲੇਟਫ਼ਾਰਮ ਉਪਰ ਵੀ ਇਸ ਦਾ ਪ੍ਰਗਟਾਵਾ ਖੁੱਲੇਆਮ ਸ਼ਬਦਾਂ ਵਿੱਚ ਕੀਤਾ ਗਿਆ ਹੈ, ਜਿਸ ਸੰਬੰਧੀ ਮਨ ਦੇ ਵਲਵਲਿਆਂ ਦਾ ਇਜ਼ਹਾਰ ਕਰਦਿਆਂ ਉਸ ਨੇ ਕਿਹਾ ਹੈ, 'ਕੀ ਕਿਸੇ ਨੂੰ ਇੰਨਾ ਡੂੰਘਾ ਪਿਆਰ ਕਰਨਾ ਗਲਤ ਹੈ ਜਾਂ ਕੀ ਕਿਸੇ 'ਤੇ ਪੂਰੇ ਦਿਲ ਨਾਲ ਵਿਸ਼ਵਾਸ ਕਰਨਾ ਗਲਤ ਹੈ।' ਉਸ ਨੇ ਅੱਗੇ ਲਿਖਿਆ ਹੈ ਕਿ ਬਹੁਤ ਭਾਰੀ ਦਿਲ ਨਾਲ ਮੈਂ ਇਹ ਪੋਸਟ ਕਰ ਰਹੀ ਹਾਂ, ਅਸੀਂ 11 ਸਾਲਾਂ ਤੋਂ ਕਥਿਤ ਰੂਪ ਵਿੱਚ ਇੱਕ ਜਿਊਂਦੇ ਰਿਸ਼ਤੇ ਵਿੱਚ ਸੀ, ਉਸਨੇ ਮੈਨੂੰ ਕਥਿਤ ਵਿਆਹ ਲਈ ਵਚਨਬੱਧ ਕੀਤਾ ਅਤੇ 11 ਸਾਲਾਂ ਤੱਕ ਮੂਰਖ਼ ਬਣਾਇਆ। ਇਸ ਤੋਂ ਬਾਅਦ ਜੇ ਇਨਸਾਫ਼ ਨਾ ਮਿਲਿਆ ਤਾਂ ਸੰਬੰਧਤ ਵੀਡੀਓ ਜਾਂ ਫੋਟੋਆਂ ਵੀ ਪੋਸਟ ਕਰਾਂਗੀ।

ਪਾਲੀਵੁੱਡ ਗਲਿਆਰਿਆਂ ਵਿੱਚ ਹਲਚਲ ਮਚਾ ਦੇਣ ਵਾਲੇ ਉਕਤ ਮਾਮਲੇ ਵਿੱਚ ਦਿੱਤੀ ਸ਼ਿਕਾਇਤ ਵਿੱਚ ਸੰਬੰਧਤ ਔਰਤ ਨੇ ਕਿਹਾ ਕਿ ਉਹ ਪੰਜਾਬੀ ਫਿਲਮ ਉਦਯੋਗ ਵਿੱਚ ਪਿਛਲੇ 14 ਸਾਲਾਂ ਤੋਂ ਕਾਰਜਸ਼ੀਲ ਹੈ। ਔਰਤ ਮੁਤਾਬਕ ਸਾਲ 2014 ਦੇ ਹੀ ਮੁੱਢਲੇ ਪੜਾਅ ਦੌਰਾਨ ਉਕਤ ਅਦਾਕਾਰ ਨਾਲ ਉਸ ਦਾ ਮੇਲ ਮਿਲਾਪ ਹੋਇਆ, ਜੋ ਉਸ ਸਮੇਂ ਸੰਘਰਸ਼ ਵਜੋਂ ਛੋਟੀਆਂ ਫਿਲਮਾਂ ਕਰ ਰਿਹਾ ਸੀ, ਜਿਸ ਦੀ ਉਸ ਨੇ ਕੁਝ ਵੱਡੇ ਨਿਰਮਾਤਾ ਅਤੇ ਨਿਰਦੇਸ਼ਕਾਂ ਤੱਕ ਪਹੁੰਚ ਬਣਵਾਈ ਅਤੇ ਇਸੇ ਦੌਰਾਨ ਉਨ੍ਹਾਂ ਦੇ ਵਧੇ ਮੇਲਜੋਲ ਅਧੀਨ ਕਥਿਤ ਰੂਪ ਵਿੱਚ ਵਿਆਹ ਦਾ ਝਾਂਸਾ ਦਿੰਦਿਆਂ ਕਰੀਬ ਦਸ ਸਾਲਾਂ ਤੱਕ ਕਥਿਤ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ ਬਣਾਇਆ ਗਿਆ। ਪਰ ਹੁਣ ਜਦ ਉਸ ਦੀ ਮਦਦ ਨਾਲ ਉਸਨੇ ਅਪਣਾ ਫਿਲਮੀ ਦਾਇਰਾ ਕਾਫ਼ੀ ਵਿਸ਼ਾਲ ਕਰ ਲਿਆ ਹੈ ਤਾਂ ਉਹ ਉਸ ਪਾਸੋਂ ਪੱਲਾ ਛੱਡਵਾ ਰਿਹਾ ਹੈ, ਜਿਸ ਸੰਬੰਧੀ ਹੋਈ ਨਾਇਨਸਾਫ਼ੀ ਖਿਲਾਫ਼ ਉਸ ਨੂੰ ਪੁਲਿਸ ਕੋਲ ਮਦਦ ਦੀ ਗੁਹਾਰ ਲਗਾਉਣੀ ਪਈ ਹੈ।

ਦੂਜੇ ਪਾਸੇ ਪੰਜਾਬੀ ਫਿਲਮ ਇੰਡਸਟਰੀ ਦੇ ਮਸ਼ਹੂਰ ਲੇਖਕ ਨੇ ਆਪਣੇ ਵਕੀਲ ਰਾਹੀਂ ਅਦਾਲਤ ਵਿੱਚ ਆਪਣੀ ਅਗਾਊਂ ਜ਼ਮਾਨਤ ਪਟੀਸ਼ਨ ਦਾਇਰ ਕੀਤੀ ਸੀ, ਜਿਸ ਨੂੰ ਅਦਾਲਤ ਨੇ ਰੱਦ ਕਰ ਦਿੱਤਾ ਹੈ। ਅਦਾਲਤ ਨੇ ਕਿਹਾ ਕਿ ਇਹ ਗੰਭੀਰ ਮਾਮਲਾ ਹੈ। ਅਜਿਹੇ 'ਚ ਪੁਲਿਸ ਪੁੱਛਗਿੱਛ ਲਈ ਹਿਰਾਸਤ ਜ਼ਰੂਰੀ ਹੈ, ਇਸ ਲਈ ਲੇਖਕ ਦੀ ਪਟੀਸ਼ਨ ਸਵੀਕਾਰ ਨਹੀਂ ਕੀਤੀ ਜਾ ਸਕਦੀ। ਉਸ ਖ਼ਿਲਾਫ਼ ਥਾਣਾ ਸਦਰ ਖਰੜ ਵਿੱਚ ਆਈਪੀਸੀ ਦੀ ਧਾਰਾ 376 ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ।

ਉਕਤ ਮਾਮਲੇ ਅਧੀਨ ਵਿਵਾਦ ਵਿੱਚ ਘਿਰੇ ਅਦਾਕਾਰ ਜਲਦ ਹੀ ਬਤੌਰ ਨਿਰਦੇਸ਼ਕ ਅਪਣੀ ਪਹਿਲੀ ਪੰਜਾਬੀ ਫਿਲਮ ਵੀ ਦਰਸ਼ਕਾਂ ਦੇ ਸਨਮੁੱਖ ਕਰਨ ਜਾ ਰਹੇ ਹਨ, ਜਿਸ ਵਿੱਚ ਕਈ ਵੱਡੇ ਚਿਹਰੇ ਲੀਡ ਰੋਲ ਵਿੱਚ ਨਜ਼ਰ ਆਉਣਗੇ, ਇਸ ਤੋਂ ਇਲਾਵਾ ਉਨ੍ਹਾਂ ਵੱਲੋਂ ਲਿਖੀਆਂ ਅਤੇ ਬਤੌਰ ਅਦਾਕਾਰ ਕੀਤੀਆਂ ਕਈ ਫਿਲਮਾਂ ਰਹੀਆਂ ਹਨ।

ਇਹ ਵੀ ਪੜ੍ਹੋ: