ਮੁਹਾਲੀ: ਲਿਵਰ ਨੂੰ ਮਾਰ ਕਰਨ ਵਾਲੀ ਭਿਆਨਕ ਬਿਮਾਰੀ ਕਾਲਾ ਪੀਲੀਆ ਪੰਜਾਬ ਵਿੱਚ ਵੱਡੇ ਪੱਧਰ 'ਤੇ ਫੈਲ ਰਿਹਾ ਹੈ। ਸਰਕਾਰ ਵੱਲੋਂ ਨੈਸ਼ਨਲ ਵਾਇਰਸ ਹੈਪੇਟਾਈਟਸ ਕੰਟਰੋਲ ਪ੍ਰੋਗਰਾਮ ਬਣਾਇਆ ਗਿਆ ਹੈ ਜਿਸ ਅਧੀਨ ਇਸ ਦੇ ਮਰੀਜ਼ਾਂ ਦਾ ਇਲਾਜ ਅਤੇ ਟੈਸਟ ਬਿਲਕੁਲ ਮੁਫ਼ਤ ਕੀਤੇ ਜਾਂਦੇ ਹਨ। ਮੁਹਾਲੀ ਜ਼ਿਲ੍ਹੇ ਵਿੱਚ ਹੁਣ ਤੱਕ 596 ਨਵੇਂ ਮਰੀਜ਼ ਇਲਾਜ ਦੇ ਅਧੀਨ ਹਨ ਅਤੇ 260 ਦੇ ਕਰੀਬ ਲੋਕ ਇਲਾਜ ਪੂਰਾ ਕਰ ਚੁੱਕੇ ਹਨ।
ਕੀ ਹੈ ਕਾਲਾ ਪੀਲੀਆ?
ਮੁਹਾਲੀ ਦੇ ਕਾਲਾ ਪੀਲੀਆ ਨੋਡਲ ਅਫ਼ਸਰ ਡਾ. ਹਰਮਨਦੀਪ ਦੇ ਮੁਤਾਬਕ ਕਾਲਾ ਪੀਲੀਆ ਖ਼ੂਨ ਦੇ ਵਿੱਚ ਇੱਕ ਵਾਇਰਸ ਕਾਰਨ ਫੈਲਦਾ ਹੈ ਜੋ ਸਿੱਧਾ ਲਿਵਰ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ। ਕਈ ਵਾਰੀ ਇਸ ਦਾ ਇਲਾਜ ਨਾ ਕਰਵਾਉਣ ਕਰਕੇ ਇਹ ਲਿਵਰ ਦੇ ਕੈਂਸਰ ਦਾ ਕਾਰਨ ਵੀ ਬਣ ਜਾਂਦਾ ਹੈ ਜਿਸ ਤੋਂ ਬਾਅਦ ਵਿਅਕਤੀ ਦੀ ਮੌਤ ਵੀ ਹੋ ਸਕਦੀ ਹੈ।
ਕਿਸ ਤਰ੍ਹਾਂ ਫੈਲਦਾ ਹੈ?
ਕਾਲਾ ਪੀਲੀਆ ਇੱਕ ਵਿਅਕਤੀ ਤੋਂ ਦੂਜੇ ਨੂੰ ਖੂਨ ਰਾਹੀਂ ਫ਼ੈਲਦਾ ਹੈ। ਇਸ ਬਿਮਾਰੀ ਦਾ ਸਭ ਜ਼ਿਆਦਾ ਸ਼ਿਕਾਰ ਨਸ਼ਾ ਕਰਨ ਵਾਲੇ ਵਿਅਕਤੀ ਹੁੰਦੇ ਹਨ ਜੋ ਕਿ ਇੱਕ ਦੂਜੇ ਦੀਆਂ ਸਰਿੰਜਾਂ ਦੀ ਵਰਤੋਂ ਕਰਦੇ ਹਨ। ਦੂਜਾ, ਹਸਪਤਾਲ 'ਚ ਸਰਜਰੀ ਦੌਰਾਨ ਵਰਤੇ ਜਾ ਰਹੇ ਖੂਨ ਵੀ ਇਸਦੇ ਫ਼ੈਲਣ ਦਾ ਮੁੱਖ ਕਾਰਨ ਹੈ।
ਕੀ ਲੱਛਣ ਹਨ ਕਾਲੇ ਪੀਲੀਏ ਦੇ?
⦁ ਕਮਜ਼ੋਰੀ ਮਹਿਸੂਸ ਹੋਣਾ
⦁ ਮਾਮੂਲੀ ਤਾਪ ਲੰਬਾ ਸਮਾਂ ਰਹਿਣਾ
⦁ ਭੁੱਖ ਘੱਟ ਲੱਗਣਾ ਆਦਿ
ਇਲਾਜ
ਪੰਜਾਬ ਦੇ ਹਰ ਜ਼ਿਲ੍ਹੇ ਹਸਪਤਾਲ ਵਿੱਚ ਇਸ ਦਾ ਇਲਾਜ ਬਿਲਕੁਲ ਮੁਫ਼ਤ ਕੀਤਾ ਜਾਂਦਾ ਹੈ ਜੋ ਕਿ ਨੈਸ਼ਨਲ ਵਾਇਰਸ ਹੈਪੇਟਾਈਟਸ ਕੰਟਰੋਲ ਪ੍ਰੋਗਰਾਮ ਤਹਿਤ ਹੁੰਦਾ ਹੈ। ਸਰਕਾਰ ਵੱਲੋਂ ਇਸ ਦੇ ਬਿਲਕੁੱਲ ਮੁਫ਼ਤ ਟੈਸਟ ਕਰਵਾਏ ਜਾਂਦੇ ਹਨ। ਇਸ ਦਵਾਈ ਦਾ ਕੋਰਸ 3 ਤੋਂ 6 ਮਹੀਨੇ ਤੱਕ ਚੱਲਦਾ ਹੈ।
ਡਾ. ਹਰਮਨਦੀਪ ਦਾ ਕਹਿਣਾ ਹੈ ਕਿ ਭਾਵੇਂ ਮੁਹਾਲੀ ਜ਼ਿਲ੍ਹੇ ਵਿੱਚ ਕਾਲੇ ਪੀਲੀਏ ਦੇ ਮਰੀਜ਼ਾਂ ਦੀ ਤਦਾਦ ਪਿਛਲੇ ਸਮੇਂ ਨਾਲੋਂ ਵੱਧ ਹੋਈ ਹੈ, ਪਰ 99 ਫੀਸਦੀ ਮਰੀਜ਼ ਇਸ ਦਵਾਈ ਦੇ ਸੇਵਨ ਨਾਲ ਠੀਕ ਹੋਏ ਹਨ। ਉਨ੍ਹਾਂ ਨੇ ਕਿਹਾ ਕਿ 1 ਫੀਸਦੀ ਜੋ ਰਹਿ ਜਾਂਦੇ ਹਨ ਉਸ ਦਾ ਕਾਰਨ ਹੈ ਕਿ ਉਹ ਦੱਸੇ ਗਏ ਇਲਾਜ ਨੂੰ ਸਹੀ ਤਰੀਕੇ ਨਾਲ ਪੂਰਾ ਨਹੀਂ ਕਰਦੇ ਅਤੇ ਨਾ ਹੀ ਦੱਸੀਆਂ ਗਈਆਂ ਸਾਵਧਾਨੀਆਂ ਨੂੰ ਵਰਤਦੇ ਹਨ।
ਇਹ ਵੀ ਪੜ੍ਹੋ: ਜ਼ਿਮਨੀ ਚੋਣਾਂ ਲਈ ਚੋਣ ਜ਼ਾਬਤਾ ਲਾਗੂ, 4 ਹਲਕਿਆਂ ਲਈ ਚੋਣ ਪ੍ਰਕਿਰਿਆ ਸ਼ੁਰੂ
