ਕੋਲੰਬੋ: ਸ਼੍ਰੀਲੰਕਾ ਕ੍ਰਿਕਟ (ਐੱਸਐੱਲਸੀ) ਨੇ ਦੇਸ਼ ਦੀ ਰਾਜਧਾਨੀ ਕੋਲੰਬੋ ਵਿੱਚ ਬਣ ਰਹੇ 40,000 ਦਰਸ਼ਕਾਂ ਦੀ ਸਮਰੱਥਾ ਵਾਲੇ ਨਵੇਂ ਕ੍ਰਿਕਟ ਸਟੇਡਿਅਮ ਦੇ ਨਿਰਮਾਣ ਕੰਮਾਂ ਉੱਤੇ ਰੋਕ ਲਾ ਦਿੱਤੀ ਹੈ। ਮੀਡਿਆ ਦੀ ਰਿਪੋਰਟ ਮੁਤਾਬਕ ਸਰਕਾਰ ਵੱਲੋਂ ਨਿਰਮਾਣ ਕੰਮ ਦੀ ਵਚਨਬੱਧਤਾ ਵਾਪਸ ਲੈਣ ਤੋਂ ਬਾਅਦ ਇਸ ਯੋਜਨਾ ਨੂੰ ਫ਼ਿਲਹਾਲ ਰੋਕ ਦਿੱਤਾ ਗਿਆ ਹੈ।
ਸ਼੍ਰੀਲੰਕਾ ਦੀ ਸਰਕਾਰ ਬੋਰਡ ਦੇ ਨਾਲ ਮਿਲ ਕੇ ਦੇਸ਼ ਵਿੱਚ ਸਭ ਤੋਂ ਵੱਡੇ ਸਟੇਡਿਅਮ ਦੇ ਨਿਰਮਾਣ ਦੀ ਯੋਜਨਾ ਬਣਾ ਰਹੀ ਹੈ। ਸ਼੍ਰੀਲੰਕਾ ਨੂੰ ਇਸ ਸਟੇਡਿਅਮ ਦੇ ਨਿਰਮਾਣ ਵਿੱਚ ਤਿੰਨ-ਚਾਰ ਕਰੋੜ ਡਾਲਰ ਦੀ ਲਾਗਤ ਆਉਣੀ ਸੀ।
ਦੇਸ਼ ਵਿੱਚ ਨਵੇਂ ਸੇਟਡਿਅਮ ਦੇ ਨਿਰਮਾਣ ਦਾ ਕਈ ਦਿੱਗਜਾਂ ਨੇ ਵਿਰੋਧ ਕੀਤਾ ਸੀ, ਇਸ ਵਿੱਚ ਸਾਬਕਾ ਕਪਤਾਨ ਮਹੇਲਾ ਜੈਵਰਧਨੇ ਅਤੇ ਸਾਬਕਾ ਆਈਸੀਸੀ ਮੈਚ ਰੈਫ਼ਰੀ ਰੋਸ਼ਨ ਮਹਾਨਾਮਾ ਸ਼ਾਮਲ ਸਨ। ਅਜਿਹਾ ਮੰਨਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਦੇ ਵਿਰੋਧ ਦੇ ਕਾਰਨ ਹੀ ਸਰਕਾਰ ਨੂੰ ਨਵੇਂ ਸਟੇਡਿਅਮ ਬਣਾਉਣ ਦੀ ਇਸ ਯੋਜਨਾ ਨੂੰ ਵਾਪਸ ਲੈਣਾ ਪਿਆ ਹੈ।
ਸਰਕਾਰ ਦੀ ਇੱਕ ਉੱਚ ਪੱਧਰੀ ਕਮੇਟੀ ਨੇ ਵੀਰਵਾਰ ਨੂੰ ਜੈਵਰਧਨੇ, ਮਹਾਨਾਮਾ, ਕੁਮਾਰ ਸੰਗਾਕਾਰਾ, ਲਸਿਥ ਮਲਿੰਗਾ ਅਤੇ ਸਨਥ ਜੈਸੂਰਿਆ ਦੇ ਨਾਲ ਇੱਕ ਬੈਠਕ ਕੀਤੀ ਅਤੇ ਬੈਠਕ ਤੋਂ ਬਾਅਦ ਸ਼੍ਰੀਲੰਕਾ ਵਿੱਚ ਕ੍ਰਿਕਟ ਸਟੇਡਿਅਮ ਦੇ ਨਿਰਮਾਣ ਕੰਮ ਨੂੰ ਰੋਕੇ ਜਾਣ ਦਾ ਐਲਾਨ ਕੀਤਾ।
ਐੱਸਐੱਲਸੀ ਆਗ਼ਾਮੀ ਵਿਸ਼ਵ ਕੱਪ ਅਤੇ ਆਈਸੀਸੀ ਟੂਰਨਾਮੈਂਟਾਂ ਦੀ ਮੇਜ਼ਬਾਨੀ ਦੇ ਲਈ ਨਵੇਂ ਸਟੇਡਿਅਮ ਦਾ ਨਿਰਮਾਣ ਕਰਨਾ ਚਾਹੁੰਦਾ ਸੀ।
ਜੈਵਰਧਨੇ ਨੇ ਨਵੇਂ ਸਟੇਡਿਅਮ ਦੀ ਲੋੜ ਉੱਤੇ ਸਵਾਲ ਚੁੱਕੇ ਸਨ, ਕਿਉਂਕਿ ਉਨ੍ਹਾਂ ਮੁਤਾਬਕ ਮੌਜੂਦਾ ਸਟੇਡਿਅਮ ਦੀ ਹੀ ਸਹੀ ਤਰੀਕੇ ਨਾਲ ਵਰਤੋਂ ਨਹੀਂ ਹੋ ਰਹੀ ਹੈ।
ਐੱਸਐੱਲਸੀ ਨੇ ਟਵੀਟ ਕਰਦੇ ਹੋਏ ਕਿਹਾ ਸੀ ਕਿ ਇਥੇ ਇਹ ਗੱਲ ਜਾਨਣੀ ਜ਼ਰੂਰੀ ਹੈ ਕਿ ਸ਼੍ਰੀਲੰਕਾ ਕ੍ਰਿਕਟ ਨੇ ਆਈਸੀਸੀ ਦੀ 2023 ਤੋਂ 2031 ਦੇ ਵਿਚਕਾਰ ਦੋ ਵਿਸ਼ਵ ਕੱਪਾਂ ਦੀ ਮੇਜ਼ਬਾਨੀ ਕਰਨ ਦੀ ਅਪੀਲ ਉੱਤੇ ਦਿਲਚਸਪੀ ਪ੍ਰਗਟਾਈ ਸੀ।
