ਚੰਡੀਗੜ੍ਹ: ਪੰਜਾਬੀ ਸੰਗੀਤ ਜਗਤ ਵਿਚ ਵੱਖਰੀ ਹੋਂਦ ਰੱਖਦੇ ਅਤੇ ਸਰੋਤਿਆਂ-ਦਰਸ਼ਕਾਂ ਦੇ ਦਿਲਾਂ ਵਿਚ ਲਗਾਤਾਰ ਛਾਅ ਰਹੇ ਲੋਕ ਗਾਇਕ ਸੂਫ਼ੀ ਬਲਵੀਰ ਵੱਲੋਂ ਆਪਣੇ ਨਵੇਂ ਗੀਤ ਨੂੰ ਜਲਦ ਹੀ ਰਿਲੀਜ਼ ਕੀਤਾ ਜਾਵੇਗਾ। ਤੁਹਾਨੂੰ ਦੱਸ ਦਈਏ ਕਿ ਗੀਤ ਦੇ ਮਿਊਜ਼ਿਕ ਵੀਡੀਓ ਦੀ ਸ਼ੂਟਿੰਗ ਮੋਹਾਲੀ ਦੇ ਆਸਪਾਸ ਵਾਲੇ ਇਲਾਕਿਆਂ ਵਿੱਚ ਸੰਪੂਰਨ ਕਰ ਲਈ ਗਈ ਹੈ, ਜਿਸ ਵਿਚ ਉੱਘੇ ਗਾਇਕ ਹਰਦੀਪ ਗਿੱਲ ਵੀ ਨਜ਼ਰ ਆਉਣਗੇ। ਨਿਰਦੇਸ਼ਕ ਬੌਬੀ ਬਾਜਵਾ ਵੱਲੋਂ ਸ਼ੂਟ ਕੀਤੇ ਗਏ ਇਸ ਮਿਊਜ਼ਿਕ ਵੀਡੀਓ ਵਿਚ ਅੰਮ੍ਰਿਤਪਾਲ ਬਿੱਲਾ, ਸਿਮਰਨ, ਗੀਤ ਪਰਿਹਾਰ, ਰੁਬਾਨੀ, ਮਨਜੀਤ ਸਿੰਘ ਆਦਿ ਕਲਾਕਾਰ ਵੱਲੋਂ ਵੀ ਅਭਿਨੈ ਕੀਤਾ ਗਿਆ ਹੈ।
ਮੂਲ ਰੂਪ ਵਿਚ ਸ੍ਰੀ ਅੰਮ੍ਰਿਤਸਰ ਸਾਹਿਬ ਨਾਲ ਤਾਲੁਕ ਰੱਖਦੇ ਇਹ ਅਜ਼ੀਮ ਗਾਇਕ ਹਾਲ ਹੀ ਦੇ ਸਮੇਂ ਦੌਰਾਨ ‘ਗੱਲ ਪਹਿਲਾਂ ਵਾਲੀ’, ‘ਬਖ਼ਸ਼ ਦੇ ਦਾਤਾ’, ‘ਬਾਗੋਂ ਬਾਗ਼’, ‘ਮੋਹਾਲੀ 'ਤੇ ਕੁਰਾਲੀ’, ‘ਵਾਪਸੀ’, ‘ਫ਼ਕੀਰ’, ‘ਐ ਮੁਲਕ ਮੇਰੇ’, ‘ਇਕ ਅਰਦਾਸ’, ‘ਯਾਰੀਆਂ’ ਆਦਿ ਜਿਹੇ ਕਈ ਚੰਗੇ ਗੀਤ ਪੰਜਾਬੀ ਸੰਗੀਤ ਜਗਤ ਅਤੇ ਸਰੋਤਿਆਂ ਦੇ ਝੋਲੀ ਪਾ ਚੁੱਕੇ ਹਨ।
ਉਨ੍ਹਾਂ ਦੱਸਿਆ ਕਿ ਆਪਣੀ ਗਾਇਕੀ ਅਤੇ ਗੀਤ-ਸੰਗੀਤ ਸੁਮੇਲ ਪ੍ਰਤੀ ਉਨ੍ਹਾਂ ਅੱਜ ਤੱਕ ਕਦੇ ਵੀ ਠੇਠ ਕਮਰਸ਼ੀਅਲ ਸੋਚ ਨਹੀਂ ਅਪਣਾਈ ਅਤੇ ਹਮੇਸ਼ਾ ਅਜਿਹੀ ਗਾਇਕੀ ਨੂੰ ਪਹਿਲ ਦਿੱਤੀ ਹੈ, ਜਿਸ ਨਾਲ ਪੰਜਾਬ ਅਤੇ ਪੰਜਾਬੀਅਤ ਕਦਰਾਂ ਕੀਮਤਾਂ ਜਿਉਂਦੀਆਂ ਰਹਿ ਸਕਣ।
ਦੇਸ਼ਾਂ, ਵਿਦੇਸ਼ਾਂ ਵਿਚ ਆਪਣੀ ਨਾਯਾਬ ਗਾਇਕੀ ਦੀਆਂ ਧੂੰਮਾਂ ਪਾ ਚੁੱਕੇ ਸੂਫ਼ੀ ਬਲਵੀਰ ਅਨੁਸਾਰ ਗਾਇਕੀ ਉਨ੍ਹਾਂ ਲਈ ਵਪਾਰ ਨਹੀਂ ਬਲਕਿ ਇਕ ਪ੍ਰਮਾਤਮਾ ਦੀ ਬਖ਼ਸੀ ਹੋਈ ਅਜਿਹੀ ਨਿਆਮਿਤ ਹੈ, ਜਿਸ ਦਾ ਉਪਯੋਗ ਉਹ ਨੌਜਵਾਨ ਵਰਗ ਨੂੰ ਉਸਾਰੂ ਸੇਧ ਦੇਣ ਲਈ ਕਰ ਰਹੇ ਹਨ ਅਤੇ ਉਨ੍ਹਾਂ ਨੂੰ ਇਸ ਗੱਲ ਦੀ ਖੁਸ਼ੀ ਅਤੇ ਮਾਣ ਹੈ ਕਿ ਉਹ ਆਪਣਾ ਇਹ ਮਕਸਦ ਪੂਰਾ ਕਰਨ ਵਿਚ ਕਾਫ਼ੀ ਹੱਦ ਤੱਕ ਸਫ਼ਲ ਰਹੇ ਹਨ।
ਉਨ੍ਹਾਂ ਦੱਸਿਆ ਕਿ ਪਿਛਲੇ ਗੀਤਾਂ ਦੀ ਤਰ੍ਹਾਂ ਉਨ੍ਹਾਂ ਦਾ ਨਵਾਂ ਗੀਤ ਵੀ ਸਰੋਤਿਆਂ ਦੀ ਹਰ ਕਸੌਟੀ 'ਤੇ ਖ਼ਰਾ ਉਤਰੇਗਾ, ਜਿਸ ਵਿਚ ਜ਼ਿੰਦਗੀ ਦੇ ਹਰ ਪੱਖ ਵੇਖਣ, ਸੁਣਨ ਨੂੰ ਮਿਲਣਗੇ। ਉਨ੍ਹਾਂ ਦੱਸਿਆ ਕਿ ਉਕਤ ਗੀਤ ਦਾ ਮਿਊਜ਼ਿਕ ਵੀਡੀਓ ਵੀ ਬਹੁਤ ਹੀ ਖੂਬਸੂਰਤ ਬਣਾਇਆ ਗਿਆ ਹੈ, ਜਿਸ ਨੂੰ ਬੌਬੀ ਬਾਜਵਾ ਦੁਆਰਾ ਨਿਰਦੇਸ਼ਿਤ ਕੀਤਾ ਗਿਆ ਹੈ ਅਤੇ ਇਸ ਨੂੰ ਜਲਦ ਹੀ ਵੱਖ ਵੱਖ ਪਲੇਟਫ਼ਾਰਮ 'ਤੇ ਜਾਰੀ ਕਰ ਦਿੱਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਸ ਗੀਤ ਦੇ ਪਹਿਲੇ ਲੁੱਕ ਅਤੇ ਹੋਰਨਾਂ ਪਹਿਲੂਆਂ ਦਾ ਰਸਮੀ ਐਲਾਨ ਵੀ ਜਲਦ ਹੀ ਕਰ ਦਿੱਤਾ ਜਾਵੇਗਾ।
