ਚੰਡੀਗੜ੍ਹ: ਪੰਜਾਬ ਯੂਨੀਵਰਸਿਟੀ ਸੈਨੇਟ ਚੋਣਾਂ ਦਾ ਬਿਗਲ ਵੱਜ ਚੁੱਕਿਆ ਹੈ। ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦੀਆਂ ਹਦਾਇਤਾਂ ਦੀ ਪਾਲਣਾ ਕਰਦਿਆਂ ਆਖਰਕਾਰ ਮੰਗਲਵਾਰ ਨੂੰ ਪੰਜਾਬ ਯੂਨੀਵਰਸਿਟੀ ਪ੍ਰਸ਼ਾਸਨ ਨੇ ਸੈਨੇਟ ਚੋਣਾਂ ਦਾ ਅੰਤਮ ਸਮਾਂ ਸੂਚੀ ਜਾਰੀ ਕਰ ਦਿੱਤਾ। 26 ਅਪ੍ਰੈਲ ਤੋਂ 16 ਮਈ 2021 ਤੱਕ, ਪੀਯੂ ਪ੍ਰਸ਼ਾਸਨ ਸਾਰੇ ਅੱਠ ਹਲਕਿਆਂ ਅਧੀਨ ਆਉਂਦੀਆਂ ਸੀਟਾਂ ਲਈ ਚੋਣ ਪੂਰੀ ਕਰੇਗਾ। ਸੈਨੇਟ ਚੋਣਾਂ ਲਈ, ਪੀਯੂ ਦੁਆਰਾ ਪਹਿਲਾਂ ਤੋਂ ਚੱਲ ਰਹੀ ਪ੍ਰਕਿਰਿਆ ਨੂੰ ਅੱਗੇ ਤੋਰਿਆ ਜਾਵੇਗਾ।
ਸ਼ਡਿਊਲ ਨੂੰ ਲੈ ਕੇ ਪੀਯੂ ਚਾਂਸਲਰ ਦੇ ਦਫ਼ਤਰ ਤੋਂ ਇਜਾਜ਼ਤ ਵੀ ਮੰਗੀ ਗਈ ਸੀ, ਜੋ ਪ੍ਰਵਾਨਗੀ ਦੇ ਤੁਰੰਤ ਬਾਅਦ ਪੀਯੂ ਨੇ ਮੰਗਲਵਾਰ ਦੁਪਹਿਰ ਨੂੰ ਹੀ ਚੋਣ ਪ੍ਰੋਗਰਾਮ ਜਾਰੀ ਕੀਤਾ। ਇਸ ਤਹਿਤ ਪੀਯੂ 21 ਦਿਨਾਂ ਦੇ ਅੰਦਰ ਸਾਰੀਆਂ ਸੀਟਾਂ ਲਈ ਚੋਣ ਪ੍ਰਕਿਰਿਆ ਨੂੰ ਪੂਰਾ ਕਰ ਲਵੇਗੀ। ਰਜਿਸਟਰਡ ਗ੍ਰੈਜੂਏਟ ਹਲਕੇ ਦੀਆਂ 15 ਸੀਟਾਂ ਲਈ ਵੋਟਿੰਗ 16 ਮਈ ਨੂੰ ਹੋਵੇਗੀ ਅਤੇ ਵੋਟਾਂ ਦੀ ਗਿਣਤੀ 18 ਮਈ ਤੋਂ ਸ਼ੁਰੂ ਹੋਵੇਗੀ।
ਗ਼੍ਰੈਜੂਏਟ ਚੋਣ ਖੇਤਰ ਲਈ ਚੰਡੀਗੜ੍ਹ ਸਮੇਤ ਦੇਸ਼ ਦੇ 6 ਰਾਜਾਂ ਵਿੱਚ ਵੋਟਿੰਗ ਲਈ 280 ਵੋਟ ਵੇਂਦਰਾਂ 'ਤੇ ਤਿੰਨ ਲੱਖ 60 ਹਜ਼ਾਰ ਤੋਂ ਵੱਧ ਵੋਟਰ ਆਪਣੀ ਵੋਟ ਦੀ ਵਰਤੋਂ ਕਰਨਗੇ।
ਹਾਈਕੋਰਟ ਦੇ ਦਖ਼ਲ ਬਾਅਦ ਚੋਣਾਂ ਦਾ ਫ਼ੈਸਲਾ
ਪੀਯੂ ਸੈਨੇਟ ਚੋਣਾਂ ਨੂੰ ਲੈ ਕੇ ਕਈ ਮਹੀਨਿਆਂ ਤੋਂ ਮਾਮਲਾ ਹਾਈਕੋਰਟ ਵਿੱਚ ਸੀ। ਪੀਯੂ ਗਵਰਨਿੰਗ ਬਾਡੀ ਸੈਨੇਟ ਦਾ ਕਾਰਜਕਾਲ ਅਕਤੂਬਰ ਅਤੇ ਸਿੰਡੀਕੇਟ ਦਾ ਦਸੰਬਰ ਵਿੱਚ ਖਤਮ ਹੋ ਗਿਆ ਹੈ। ਪੀਯੂ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ, ਸੈਨੇਟ-ਸਿੰਡੀਕੇਟ ਦੇ ਬਗੈਰ ਪੰਜ ਮਹੀਨਿਆਂ ਤੋਂ ਕੰਮ ਚੱਲ ਰਿਹਾ ਹੈ। ਪੀਯੂ ਗਵਰਨਿੰਗ ਬਾਡੀ ਮੁੜ ਭਰ ਨੂੰ ਲੈ ਕੇ ਸੈਨੇਟ ਅਤੇ ਸਿੰਡੀਕੇਟ ਚੋਣਾਂ ਲਗਾਤਾਰ ਲਟਕਦੀਆਂ ਆ ਰਹੀਆਂ ਸਨ।
ਮਾਮਲੇ ਵਿੱਚ ਪੀਯੂ ਦੇ ਸਾਬਕਾ ਸੈਨੇਟ ਪ੍ਰੋਫ਼ੈਸਰ ਕੇਸ਼ਵ ਮਲਹੋਤਰਾ ਸਮੇਤ ਸੱਤ ਹੋਰ ਲੋਕਾਂ ਨੇ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਵਿੱਚ ਪਟੀਸ਼ਨ ਦਾਇਰ ਕੀਤੀ ਸੀ। ਹਾਈਕੋਰਟ ਨੇ ਮਾਮਲੇ ਵਿੱਚ ਫ਼ੈਸਲਾ ਦਿੰਦਿਆਂ ਦੋ ਮਹੀਨਿਆਂ ਦੇ ਅੰਦਰ ਚੋਣਾਂ ਕਰਵਾਉਣ ਦੇ ਨਿਰਦੇਸ਼ ਜਾਰੀ ਕਰ ਦਿੱਤੇ। ਉਪਰੰਤ ਪੀਯੂ ਪ੍ਰਸ਼ਾਸਨ ਹਰਕਤ ਵਿੱਚ ਆਇਆ ਅਤੇ ਮੰਗਲਵਾਰ ਨੂੰ ਸੈਨੇਟ ਚੋਣਾਂ ਦਾ ਪ੍ਰੋਗਰਾਮ ਜਾਰੀ ਕਰ ਦਿੱਤਾ। ਸੈਨੇਟ ਚੋਣਾਂ ਦਾ ਪ੍ਰੋਗਰਾਮ ਕੁੱਝ ਇਸ ਤਰ੍ਹਾਂ ਰਹੇਗਾ:
| ਚੋਣ ਖੇਤਰ ਦਾ ਨਾਂਅ | ਚੋਣ ਤਰੀਕ | ਵੋਟਿੰਗ ਤਰੀਕ | ਕੁੱਲ ਉਮੀਦਵਾਰ | ਬੂਥ | ਕੁੱਲ ਵੋਟਰ |
| ਫ਼ੈਕਲਟੀ | 26 ਅਪ੍ਰੈਲ | 26 ਅਪ੍ਰੈਲ | 12 | 06 | 754 |
| ਪ੍ਰਿੰਸੀਪਲ ਟੈਕਨੀਕਲ ਐਂਡ ਪ੍ਰੌਫ਼ੈਸ਼ਨਲ ਕਾਲਜ | 3 ਮਈ | 5 ਮਈ | 05 | 28 | 52 |
| ਸਟਾਫ਼ ਟੈਕਨੀਕਲ ਐਂਡ ਪ੍ਰੌਫ਼ੈਸ਼ਨਲ ਕਾਲਜ | 3 ਮਈ | 5 ਮਈ | 05 | 28 | 783 |
| ਪ੍ਰੋਫ਼ੈਸਰ ਯੂਨੀਵਰਸਿਟੀ ਟੀਚਿੰਗ ਡਿਪਾਰਟਮੈਂਟ | 10 ਮਈ | 12 ਮਈ | 06 | 05 | 279 |
| ਐਸੋਸੀਏਟ ਐਂਡ ਅਸਿਸਟੈਂਟ ਪ੍ਰੋਫ਼ੈਸਰ ਯੂਨੀਵਰਸਿਟੀ | 10 ਮਈ | 12 ਮਈ | 07 | 05 | 439 |
| ਹੈਡ ਆਫ਼ ਆਰਟਸ ਕਾਲਜ | 16 ਮਈ | 18 ਮਈ | 11 | 69 | 55 |
| ਐਸੋਸੀਏਟ ਐਂਡ ਅਸਿਸਟੈਂਟ ਪ੍ਰੋ਼ਫ਼ੈਸਰ ਆਰਟਸ ਕਾਲਜ | 16 ਮਈ | 18 ਮਈ | 15 | 69 | 2423 |
| ਰਜਿਸਟਰਡ ਗ੍ਰੈਜੂਏਟ | 16 ਮਈ | 18 ਮਈ | 43 | 280 | 361879 |
ਪੂਸਾ ਪ੍ਰਧਾਨ ਦੀਪਕ ਕੌਸ਼ਿਕ ਨੇ ਕਿਹਾ ਕਿ ਪੀਯੂ ਸੈਨੇਟ ਚੋਣ ਪ੍ਰੋਗਰਾਮ ਜਾਰੀ ਹੋਣ ਨਾਲ ਹੁਣ ਉਮੀਦ ਹੈ ਕਿ ਛੇਤੀ ਗਵਰਨਿੰਗ ਕਮੇਟੀ ਦਾ ਗਠਨ ਹੋਵੇਗਾ। ਪੀਯੂ ਨਾਲ ਜੁੜੇ ਗਈ ਬਕਾਇਆ ਮਾਮਲਿਆਂ ਦਾ ਨਿਪਟਾਰਾ ਹੋ ਜਾਵੇਗਾ। ਅਕਾਦਮਿਕ ਮਾਮਲਿਆਂ 'ਤੇ ਵੀ ਹੁਣ ਧਿਆਨ ਦਿੱਤਾ ਜਾਵੇਗਾ। ਪੂਟਾ ਇਸ ਲਈ ਲੰਮੇ ਸਮੇਂ ਤੋਂ ਸੰਘਰਸ਼ ਕਰ ਰਿਹਾ ਸੀ। ਗਵਰਨਿੰਗ ਕਮੇਟੀ ਸੈਨੇਟ-ਸਿੰਡੀਕੇਟ ਤੋਂ ਬਾਅਦ ਟੀਚਰ, ਨਾਨ-ਟੀਚਿੰਗ ਅਤੇ ਵਿਦਿਆਰਥੀਆਂ ਦੀਆਂ ਸਮੱਸਿਆਵਾਂ ਹੁਣ ਛੇਤੀ ਹੱਲ ਹੋ ਸਕਣਗੀਆਂ।
