ਹੈਦਰਾਬਾਦ: ਇੰਸਟਾਗ੍ਰਾਮ ਦਾ ਇਸਤੇਮਾਲ ਦੇਸ਼ ਭਰ ਦੇ ਕਰੋੜਾਂ ਯੂਜ਼ਰਸ ਕਰਦੇ ਹਨ। ਇਸ ਲਈ ਕੰਪਨੀ ਆਏ ਦਿਨ ਆਪਣੇ ਗ੍ਰਾਹਕਾਂ ਨੂੰ ਖੁਸ਼ ਕਰਨ ਲਈ ਨਵੇਂ ਫੀਚਰਸ ਪੇਸ਼ ਕਰਦੀ ਰਹਿੰਦੀ ਹੈ। ਦੱਸ ਦੇਈਏ ਕਿ ਯੂਜ਼ਰਸ ਨੂੰ ਵੀਡੀਓਜ਼ ਐਡਿਟ ਕਰਨ 'ਚ ਥਰਡ ਪਾਰਟੀ ਐਪਾਂ ਦਾ ਇਸਤੇਮਾਲ ਕਰਨਾ ਪੈਂਦਾ ਹੈ, ਜਿਸ ਕਾਰਨ ਕਾਫ਼ੀ ਮੁਸ਼ਕਿਲ ਹੁੰਦੀ ਹੈ। ਇਸ ਲਈ ਹੁਣ ਇੰਸਟਾਗ੍ਰਾਮ ਨੇ ਇੱਕ 'ਐਡਿਟਸ' ਨਾਮ ਦੀ ਐਪ ਨੂੰ ਪੇਸ਼ ਕਰਨ ਦਾ ਐਲਾਨ ਕਰ ਦਿੱਤਾ ਹੈ।
ਇੰਸਟਾਗ੍ਰਾਮ ਦੇ ਮੁਖੀ ਐਡਮ ਮੋਸੇਰੀ ਨੇ ਕੀਤਾ ਐਲਾਨ
ਇੰਸਟਾਗ੍ਰਾਮ ਦੇ ਮੁਖੀ ਐਡਮ ਮੋਸੇਰੀ ਨੇ ਆਪਣੇ ਯੂਜ਼ਰਸ ਅਤੇ ਖਾਸ ਤੌਰ 'ਤੇ ਵੀਡੀਓਜ਼ ਬਣਾਉਣ ਵਾਲਿਆਂ ਲਈ ਕੁਝ ਨਵੇਂ ਐਲਾਨ ਕੀਤੇ ਹਨ। ਇਨ੍ਹਾਂ ਵਿੱਚ ਰੀਲਾਂ ਦੀ ਲੰਬਾਈ ਨੂੰ ਵਧਾਉਣਾ ਅਤੇ ਵੀਡੀਓ ਨਿਰਮਾਤਾਵਾਂ ਲਈ ਇੱਕ ਨਵੀਂ 'ਐਡਿਟਸ' ਐਪ ਲਾਂਚ ਕਰਨਾ ਸ਼ਾਮਲ ਹੈ। ਇੰਸਟਾਗ੍ਰਾਮ 'ਤੇ ਵੀਡੀਓ ਜਾਂ ਰੀਲ ਅਪਲੋਡ ਕਰਨ ਵਾਲੇ ਯੂਜ਼ਰਸ ਹੁਣ ਵੱਧ ਤੋਂ ਵੱਧ 3 ਮਿੰਟ ਦੀ ਰੀਲ ਅਪਲੋਡ ਕਰ ਸਕਦੇ ਹਨ। ਇਸ ਤੋਂ ਇਲਾਵਾ, ਯੂਜ਼ਰਸ ਆਪਣੀ ਰੀਲ ਐਡਿਟ ਕਰਨ ਲਈ ਇੰਸਟਾਗ੍ਰਾਮ ਦੀ ਨਵੀਂ ਐਪ 'ਐਡਿਟਸ' ਦੀ ਵਰਤੋਂ ਕਰ ਸਕਦੇ ਹਨ।
ਇੰਸਟਾਗ੍ਰਾਮ ਨੇ 'ਐਡਿਟਸ' ਐਪ ਕੀਤੀ ਲਾਂਚ
ਇੰਸਟਾਗ੍ਰਾਮ ਨੇ ਆਪਣੇ ਯੂਜ਼ਰਸ ਨੂੰ ਰੀਲਾਂ ਦੀ ਐਡਿਟਿੰਗ ਕਰਨ ਲਈ ਬਿਹਤਰ ਸਹੂਲਤਾਂ ਪ੍ਰਦਾਨ ਕਰਨ ਲਈ ਇੱਕ ਨਵਾਂ ਐਪ ਲਾਂਚ ਕੀਤਾ ਹੈ। ਇਸ ਐਪ ਦਾ ਨਾਮ 'ਐਡਿਟਸ' ਹੈ। ਇਸ ਐਪ ਵਿੱਚ ਉਪਭੋਗਤਾ ਪਹਿਲਾਂ ਨਾਲੋਂ ਵਧੇਰੇ ਰਚਨਾਤਮਕ ਤਰੀਕੇ ਨਾਲ ਵੀਡੀਓਜ਼ ਨੂੰ ਐਡਿਟ ਕਰ ਸਕਦੇ ਹਨ। ਇਸ ਐਪ 'ਚ ਇੰਸਟਾਗ੍ਰਾਮ ਐਪ 'ਚ ਮੌਜੂਦ ਐਡਿਟ ਟੂਲਸ ਨਾਲੋਂ ਵੀਡਿਓ ਐਡਿਟ ਕਰਨ ਲਈ ਬਿਹਤਰ ਅਤੇ ਜ਼ਿਆਦਾ ਟੂਲ ਉਪਲਬਧ ਹੋਣਗੇ। ਇਹ ਇੱਕ ਮੋਬਾਈਲ ਵੀਡੀਓ ਐਡੀਟਿੰਗ ਐਪ ਹੈ, ਜਿਸ ਵਿੱਚ ਉੱਚ ਗੁਣਵੱਤਾ ਵਾਲੇ ਵੀਡੀਓ ਕੈਪਚਰ, ਡਰਾਫਟ ਅਤੇ ਵੀਡੀਓਜ਼ ਲਈ ਸਮਰਪਿਤ ਟੈਬ, ਰੈਜ਼ੋਲਿਊਸ਼ਨ ਲਈ ਕੈਮਰਾ ਸੈਟਿੰਗ, ਫਰੇਮ ਰੇਟ ਅਤੇ ਡਾਇਨਾਮਿਕ ਰੇਂਜ ਸਮੇਤ ਕਈ ਵਿਸ਼ੇਸ਼ਤਾਵਾਂ ਹੋਣਗੀਆਂ। ਇਸ ਤੋਂ ਇਲਾਵਾ, ਇੰਸਟਾਗ੍ਰਾਮ ਦੀ ਇਸ ਨਵੀਂ ਐਡੀਟਿੰਗ ਐਪ 'ਚ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਯਾਨੀ AI ਫੀਚਰਸ ਵੀ ਹੋਣਗੇ, ਜਿਸ ਦੀ ਮਦਦ ਨਾਲ ਯੂਜ਼ਰਸ ਨੂੰ ਸ਼ਾਨਦਾਰ ਐਨੀਮੇਸ਼ਨ ਨਾਲ ਵੀਡੀਓ ਐਡਿਟ ਕਰਨ ਦਾ ਮੌਕਾ ਮਿਲੇਗਾ।
ਯੂਜ਼ਰਸ ਨੂੰ ਕਿਹੜੀਆਂ ਬਿਹਤਰ ਸਹੂਲਤਾਂ ਮਿਲਣਗੀਆਂ?
ਇੰਸਟਾਗ੍ਰਾਮ ਹੈੱਡ ਨੇ ਆਪਣੇ ਇੰਸਟਾਗ੍ਰਾਮ ਅਤੇ ਥ੍ਰੈਡਸ 'ਤੇ ਪੋਸਟ ਕੀਤੀ ਇੱਕ ਵੀਡੀਓ ਪੋਸਟ ਰਾਹੀਂ ਇਸ ਨਵੀਂ ਐਪ 'ਐਡਿਟਸ' ਬਾਰੇ ਜਾਣਕਾਰੀ ਦਿੱਤੀ ਹੈ। ਉਨ੍ਹਾਂ ਨੇ ਆਪਣੀ ਪੋਸਟ 'ਚ ਦੱਸਿਆ ਹੈ ਕਿ ਅੱਜ ਅਸੀਂ ਇੱਕ ਨਵੀਂ ਐਪ 'ਐਡਿਟਸ' ਲਾਂਚ ਕੀਤੀ ਹੈ। ਇਹ ਐਪ ਉਨ੍ਹਾਂ ਲਈ ਹੈ ਜੋ ਆਪਣੇ ਫੋਨ 'ਤੇ ਵੀਡੀਓਜ਼ ਬਣਾਉਂਦੇ ਹਨ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਅੱਜ ਕੱਲ੍ਹ ਬਹੁਤ ਕੁਝ ਹੋ ਰਿਹਾ ਹੈ ਪਰ ਕੋਈ ਗੱਲ ਨਹੀਂ। ਕ੍ਰਿਏਟਰਸ ਲਈ ਸਭ ਤੋਂ ਵਧੀਆ ਸੰਦ ਲਿਆਉਣਾ ਸਾਡਾ ਫਰਜ਼ ਹੈ। ਇਹ ਐਪ ਇੱਕ ਸਧਾਰਨ ਐਡਿਟਸ ਐਪ ਨਹੀਂ ਹੈ। ਇਸ ਵਿੱਚ ਵੀਡੀਓ ਰਿਕਾਰਡ ਕਰਨ ਲਈ ਬਹੁਤ ਉੱਚ ਗੁਣਵੱਤਾ ਵਾਲਾ ਕੈਮਰਾ ਹੈ ਅਤੇ ਇਸ ਤੋਂ ਇਲਾਵਾ ਇੱਥੇ ਐਡਿਟ ਟੂਲ ਵੀ ਹਨ ਜੋ ਤੁਸੀਂ ਆਪਣੇ ਵੀਡੀਓ ਨੂੰ ਐਡਿਟ ਕਰਨ ਅਤੇ ਉਨ੍ਹਾਂ ਨੂੰ ਆਪਣੇ ਦੋਸਤਾਂ ਜਾਂ ਹੋਰ ਕ੍ਰਿਏਟਰਸ ਨਾਲ ਸਾਂਝਾ ਕਰਨ ਲਈ ਵਰਤ ਸਕਦੇ ਹੋ।
ਹੋਰ ਪਲੇਟਫਾਰਮਾਂ 'ਤੇ ਵੀ ਅਪਲੋਡ ਕੀਤੀ ਜਾ ਸਕੇਗੀ ਵੀਡੀਓ
ਤੁਸੀਂ ਇੰਸਟਾਗ੍ਰਾਮ ਦੇ ਇਸ ਵੀਡੀਓ ਐਡੀਟਿੰਗ ਐਪ ਨਾਲ ਐਡਿਟ ਵੀਡੀਓ ਨੂੰ ਹੋਰ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਵੀ ਅਪਲੋਡ ਕਰ ਸਕਦੇ ਹੋ। ਇੰਸਟਾਗ੍ਰਾਮ ਹੈੱਡ ਨੇ ਕਿਹਾ ਐਪਲ ਯੂਜ਼ਰਸ ਫਿਲਹਾਲ iOS ਐਪ ਸਟੋਰ ਤੋਂ ਇਸ ਐਪ ਨੂੰ ਪ੍ਰੀ-ਆਰਡਰ ਕਰ ਸਕਦੇ ਹਨ ਅਤੇ ਇਹ ਐਪ ਜਲਦੀ ਹੀ ਐਂਡਰਾਇਡ ਡਿਵਾਈਸਾਂ 'ਤੇ ਵੀ ਆ ਜਾਵੇਗੀ। ਇਹ ਐਪ ਅਗਲੇ ਮਹੀਨੇ ਤੱਕ ਡਾਊਨਲੋਡ ਲਈ ਉਪਲਬਧ ਨਹੀਂ ਹੋਵੇਗੀ ਉਦੋਂ ਤੱਕ ਅਸੀਂ ਵੀਡੀਓ ਨਿਰਮਾਤਾਵਾਂ ਦੇ ਫੀਡਬੈਕ ਅਨੁਸਾਰ ਐਪ ਨੂੰ ਬਿਹਤਰ ਬਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਤਾਂ ਜੋ ਉਨ੍ਹਾਂ ਦਾ ਅਨੁਭਵ ਬਿਹਤਰ ਹੋ ਸਕੇ।
ਇਹ ਵੀ ਪੜ੍ਹੋ:-
