ਬਰੇਲੀ: ਉੱਤਰ ਪ੍ਰਦੇਸ਼ ਦੇ ਬਰੇਲੀ ਤੋਂ ਵਿਧਾਇਕ ਰਾਜੇਸ਼ ਮਿਸ਼ਰਾ ਉਰਫ਼ ਪੱਪੂ ਭਰਤੌਲ ਦੀ ਧੀ ਦੇ ਪ੍ਰੇਮ ਵਿਆਹ ਮਾਮਲੇ ਵਿੱਚ ਇੱਕ ਨਵਾਂ ਟਵਿੱਸਟ ਆ ਗਿਆ ਹੈ। ਵਿਧਾਇਕ ਦੀ ਧੀ ਵਿਆਹ ਦਾ ਜੋ ਸਰਟੀਫਿਕੇਟ ਵਿਖਾ ਰਹੀ ਹੈ। ਉਸਨੂੰ ਫਰਜ਼ੀ ਦੱਸਿਆ ਜਾ ਰਿਹਾ ਹੈ। ਅਜਿਹਾ ਕੋਈ ਹੋਰ ਨਹੀਂ, ਬਲਕਿ ਉਸ ਮੰਦਿਰ ਦੇ ਮਹੰਤ ਕਹਿ ਰਹੇ ਹਨ, ਜਿਸ ਮੰਦਿਰ 'ਚ ਵਿਧਾਇਕ ਦੀ ਧੀ ਦਾ ਵਿਆਹ ਹੋਇਆ ਸੀ। ਮਹੰਤ ਪਰਸ਼ੂਰਾਮ ਦਾ ਕਹਿਣਾ ਹੈ ਕਿ ਇਹ ਵਿਆਹ ਫਰਜ਼ੀ ਹੈ।
ਉੱਥੇ ਹੀ ਕੁੜੀ ਦੇ ਪਿਤਾ ਰਾਜੇਸ਼ ਮਿਸ਼ਰਾ ਨੇ ਮੀਡੀਆ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਅਜਿਤੇਸ਼ ਦੀ ਜਾਤ ਨਹੀਂ, ਬਲਕਿ ਉਸਦੀ ਉਮਰ ਨਾਲ ਇਤਰਾਜ਼ ਸੀ। ਅਜਿਤੇਸ਼ ਸਾਕਸ਼ੀ ਤੋਂ 9 ਸਾਲ ਵੱਡਾ ਹੈ। ਰਾਜੇਸ਼ ਨੇ ਦੱਸਿਆ ਕਿ ਜੇ ਉਨ੍ਹਾਂ ਨੂੰ ਜ਼ਿਆਦਾ ਪਰੇਸ਼ਾਨ ਕੀਤਾ ਗਿਆ ਤਾਂ ਉਹ ਜਾਨ ਦੇ ਦੇਣਗੇ।
ਦੱਸ ਦਈਏ ਕਿ ਅਜਿਤੇਸ਼ ਸਾਕਸ਼ੀ ਦੇ ਭਰਾ ਦਾ ਦੋਸਤ ਸੀ ਤੇ ਉਹ ਉਨ੍ਹਾਂ ਦੇ ਘਰ ਆਉਂਦਾ-ਜਾਂਦਾ ਰਹਿੰਦਾ ਸੀ। ਪਰਸ਼ੂਰਾਮ ਦਾਸ ਨੇ ਦੱਸਿਆ ਕਿ ਉਨ੍ਹਾਂ ਦੇ ਮੰਦਿਰ 'ਚ ਕੋਈ ਵਿਆਹ ਨਹੀਂ ਹੋਇਆ ਹੈ ਤੇ ਪੰਡਿਤ ਝੂਠ ਬੋਲ ਰਿਹਾ ਹੈ, ਇਹ ਮੰਦਿਰ ਮੇਰਾ ਹੈ, ਜੇ ਅਜਿਹਾ ਹੁੰਦਾ ਤਾਂ ਸਰਟੀਫਿਕੇਟ 'ਤੇ ਸਾਡੀ ਮੁਹਰ ਤੇ ਫੋਟੋ ਜ਼ਰੂਰ ਹੁੰਦੀ।
- ਈਟੀਵੀ ਭਾਰਤ ਦੀ ਪੜਤਾਲ 'ਚ ਸਾਹਮਣੇ ਆਇਆ ਹੈ ਕਿ ਪੰਡਿਤ ਫਰਜ਼ੀ ਹੈ, ਰਾਮਜਾਨਕੀ ਮੰਦਿਰ ਚ ਵਿਆਹ ਹੁੰਦਾ ਹੀ ਨਹੀਂ।
- ਰਾਮਜਾਨਕੀ ਮੰਦਿਰ ਦੇ ਮਹੰਤ ਦੀ ਮੰਨੀਏ ਤਾਂ ਮੰਦਿਰ 'ਚ ਭਜਨ-ਕੀਰਤਨ ਤੋਂ ਇਲਾਵਾ ਕੋਈ ਹੋਰ ਦੂਜਾ ਕੰਮ ਨਹੀਂ ਹੁੰਦਾ।
- ਮਹੰਤ ਦਾ ਕਹਿਣਾ ਹੈ ਕਿ ਇਹ ਸਾਜਿਸ਼ ਦਾ ਹਿੱਸਾ ਹੈ, ਤਾਂ ਕਿ ਕਿਸੀ ਤਰ੍ਹਾਂ ਮੰਦਿਰ 'ਤੇ ਕਬਜ਼ਾ ਕੀਤਾ ਜਾ ਸਕੇ।
ਇਹੀ ਨਹੀਂ ਇਸ ਖੁਲਾਸੇ ਦੇ ਨਾਲ ਹੀ ਇੱਕ ਹੋਰ ਗੱਲ ਵੀ ਸਾਹਮਣੇ ਆਈ ਹੈ, ਕਿਹਾ ਜਾ ਰਿਹਾ ਸੀ ਕਿ ਵਿਧਾਇਕ ਦੀ ਧੀ ਸਾਕਸ਼ੀ ਨੇ ਜਿਸ ਅਜਿਤੇਸ਼ ਨਾਲ ਵਿਆਹ ਕਰਵਾਇਆ ਹੈ, ਉਸਦਾ ਪਹਿਲਾਂ ਤੋਂ ਹੀ ਵਿਆਹ ਹੋ ਚੁੱਕਿਆ ਹੈ, ਪਰ ਹੁਣ ਇਹ ਸਾਹਮਣੇ ਆ ਰਿਹਾ ਹੈ ਕਿ ਉਸਦਾ ਪਹਿਲਾਂ ਵਿਆਹ ਨਹੀਂ ਸਿਰਫ਼ ਮੰਗਣੀ ਹੋਈ ਸੀ।
ਦੱਸ ਦਈਏ ਕਿ ਇੱਕ ਦਲਿਤ ਮੁੰਡੇ ਨਾਲ ਵਿਆਹ ਕਰਾਉਣ ਨੂੰ ਲੈ ਕੇ ਬਰੇਲੀ ਦੇ ਵਿਧਾਇਕ ਦੀ ਧੀ ਸਾਕਸ਼ੀ ਚਰਚਾ ਚ ਆਈ। ਸਾਕਸ਼ੀ ਨੇ ਸੋਸ਼ਲ ਮੀਡੀਆ ਤੇ ਦੋ ਵੀਡੀਓ ਪਾਏ, ਜਿਸ ਤੋਂ ਬਾਅਦ ਇਹ ਮਾਮਲਾ ਹੋਰ ਵੀ ਭੱਖ ਗਿਆ। ਇਸ ਵੀਡੀਓ 'ਚ ਉਸਨੇ ਦਲਿਤ ਮੁੰਡੇ ਨਾਲ ਵਿਆਹ ਕਰਵਾਉਣ ਕਾਰਨ ਆਪਣੀ, ਉਸਦੇ ਪਤੀ ਤੇ ਉਸਦੇ ਸਹੁਰੇ ਪਰਿਵਾਰ ਦੀ ਜਾਨ ਨੂੰ ਖ਼ਤਰਾ ਦੱਸਿਆ। ਇਸ ਦੌਰਾਨ ਉਹ ਕਹਿ ਰਹੀ ਸੀ ਕਿ ਜੇ ਉਸਦੇ ਪਿਤਾ ਅਤੇ ਉਸਦੇ ਪਰਿਵਾਰ ਵਾਲੇ ਉਸ ਤੱਕ ਪੁੱਜ ਗਏ ਤਾਂ ਉਸਦੀ ਜਾਨ ਲੈ ਲੈਣਗੇ। ਇਸਦੇ ਨਾਲ ਹੀ ਕੁੜੀ ਨੇ ਬਰੇਲੀ ਦੇ ਸੰਸਦ ਮੈਂਬਰ ਤੇ ਪ੍ਰਸ਼ਾਸਨ ਤੋਂ ਮਦਦ ਦੀ ਮੰਗ ਕੀਤੀ ਹੈ।
