ਚੰਡੀਗੜ੍ਹ: ਪੰਜਾਬੀ ਸੰਗੀਤ ਜਗਤ ਵਿੱਚ ਸਫ਼ਲ ਵਜ਼ੂਦ ਸਥਾਪਿਤ ਕਰ ਚੁੱਕੇ ਗਾਇਕ ਕੇਐਸ ਮੱਖਣ ਅਪਣਾ ਇੱਕ ਹੋਰ ਗਾਣਾ ਅਟੈਕ ਅਪਣੇ ਚਾਹੁੰਣ ਵਾਲਿਆਂ ਦੇ ਸਨਮੁੱਖ ਕਰਨ ਜਾ ਰਹੇ ਹਨ, ਜੋ ਜਲਦ ਹੀ ਵੱਖ-ਵੱਖ ਸੰਗੀਤਕ ਪਲੇਟਫ਼ਾਰਮ ਉਪਰ ਰਿਲੀਜ਼ ਹੋਣ ਜਾ ਰਿਹਾ ਹੈ।
ਗੋਲਡਨ ਰਿਕਾਰਡਸ ਦੇ ਲੇਬਲ ਅਧੀਨ ਸੰਗੀਤਕ ਮਾਰਕੀਟ ਵਿੱਚ ਪੇਸ਼ ਕੀਤੇ ਜਾ ਰਹੇ ਉਕਤ ਗਾਣੇ ਦੇ ਬੋਲ ਜੱਸਾ ਨੱਤ ਨੇ ਰਚੇ ਹਨ, ਜਦਕਿ ਇਸ ਦਾ ਸੰਗੀਤ ਸੰਯੋਜਨ ਵਾਜ਼ ਬੁਆਏ ਦੁਆਰਾ ਅੰਜ਼ਾਮ ਦਿੱਤਾ ਹੈ, ਜੋ ਇਸ ਤੋਂ ਪਹਿਲਾਂ ਵੀ ਬੇਸ਼ੁਮਾਰ ਸੁਪਰ ਹਿੱਟ ਗਾਣਿਆ ਦਾ ਸੰਗੀਤ ਤਿਆਰ ਕਰ ਚੁੱਕੇ ਹਨ।
ਸੰਗੀਤ ਨਿਰਮਾਤਾ ਗੁਰੀ ਮਾਂਗਟ ਅਤੇ ਕਾਰਜਕਾਰੀ ਨਿਰਮਾਤਾ ਨਵਜੀਤ ਮਾਂਗਟ ਵੱਲੋਂ ਵੱਡੇ ਪੱਧਰ ਉੱਪਰ ਲਾਂਚ ਕੀਤੇ ਜਾ ਰਹੇ ਉਕਤ ਟਰੈਕ ਦਾ ਮਿਊਜ਼ਿਕ ਵੀਡੀਓ ਵੀ ਕਾਫ਼ੀ ਵੱਡੇ ਪੱਧਰ ਉੱਪਰ ਫਿਲਮਾਇਆ ਗਿਆ ਹੈ, ਜਿਸ ਦੀ ਨਿਰਦੇਸ਼ਨਾ ਗੋਪੀ ਢਿੱਲੋਂ ਦੁਆਰਾ ਕੀਤੀ ਗਈ ਹੈ, ਜਿੰਨ੍ਹਾਂ ਅਨੁਸਾਰ ਬਿੱਟੂ ਢੇਸੀ ਦੇ ਵਿਸ਼ੇਸ਼ ਸਹਿਯੋਗ ਅਧੀਨ ਸਾਹਮਣੇ ਲਿਆਂਦੇ ਜਾ ਰਹੇ ਉਕਤ ਸੰਗੀਤਕ ਪ੍ਰੋਜੈਕਟ ਨੂੰ ਹਰ ਪੱਖੋਂ ਅਲਹਦਾ ਰੂਪ ਦੇਣ ਦੀ ਕੋਸ਼ਿਸ਼ ਪੂਰੀ ਟੀਮ ਵੱਲੋਂ ਕੀਤੀ ਗਈ ਹੈ, ਜੋ ਗਾਇਕ ਕੇਐਸ ਮੱਖਣ ਦੀ ਵਿਲੱਖਣ ਗਾਇਨ ਸ਼ੈਲੀ ਦਾ ਵੀ ਸੁਣਨ ਵਾਲਿਆਂ ਨੂੰ ਅਹਿਸਾਸ ਕਰਵਾਏਗਾ।
ਹਾਲ ਹੀ ਵਿੱਚ ਅਪਣੇ ਕਈ ਮਕਬੂਲ ਗਾਣੇ ਜਾਰੀ ਕਰ ਚੁੱਕੇ ਕੇਐਸ ਮੱਖਣ ਹਮੇਸ਼ਾ ਅਪਣੇ ਖਾਸ ਗਾਇਨ ਅੰਦਾਜ਼ ਲਈ ਜਾਣੇ ਜਾਂਦੇ ਹਨ, ਜੋ ਅਮੂਮਨ ਵਿਵਾਦਾਂ ਦਾ ਵੀ ਚਾਹੇ ਹਿੱਸਾ ਰਹੇ ਹਨ, ਪਰ ਇਸ ਉਤਰਾਅ ਚੜਾਅ ਭਰੇ ਕਰੀਅਰ ਅਤੇ ਜੀਵਨ ਪੜਾਵਾਂ ਦੇ ਬਾਵਜੂਦ ਉਨ੍ਹਾਂ ਅਪਣੀ ਗਾਇਨ ਕਰਮਭੂਮੀ ਵਿੱਚ ਬਰਾਬਰਤਾ ਬਣਾਈ ਰੱਖੀ ਹੈ, ਜਿਸ ਦਾ ਇਜ਼ਹਾਰ ਪਿਛਲੇਂ ਲੰਮੇਂ ਸਮੇਂ ਤੋਂ ਬੈਕ-ਟੂ-ਬੈਕ ਸਾਹਮਣੇ ਆ ਰਹੇ ਉਨ੍ਹਾਂ ਦੇ ਗਾਣੇ ਲਗਾਤਾਰ ਕਰਵਾ ਰਹੇ ਹਨ।
ਸਾਲ 2013 ਵਿੱਚ ਸਾਹਮਣੇ ਆਈ ਪੰਜਾਬੀ ਫਿਲਮ 'ਸੱਜਣ: ਦਾ ਰਿਅਲ ਫਰੈਂਡ' ਤੋਂ ਇਲਾਵਾ 'ਪਿੰਕੀ ਮੋਗੇ ਵਾਲੀ', 'ਜੁਗਨੀ ਹੱਥ ਕਿਸੇ ਦੇ ਆਈ ਨਾ' ਅਤੇ 'ਕਿਰਦਾਰ ਏ ਸਰਦਾਰ' ਦਾ ਵੀ ਬਤੌਰ ਅਦਾਕਾਰ ਪ੍ਰਭਾਵੀ ਹਿੱਸਾ ਰਹੇ ਹਨ ਗਾਇਕ ਕੇ ਐੱਸ ਮੱਖਣ, ਜਿੰਨ੍ਹਾਂ ਨੂੰ ਸਿਨੇਮਾ ਪਰਦਾ ਜਿਆਦਾ ਰਾਸ ਨਹੀਂ ਆ ਸਕਿਆ ਅਤੇ ਇਹੀ ਕਾਰਨ ਹੈ ਕਿ ਪਾਲੀਵੁੱਡ ਤੋਂ ਅਦਾਕਾਰ ਦੇ ਤੌਰ ਉਤੇ ਹੀ ਉਹ ਦੂਰੀ ਹੀ ਬਣਾ ਚੱਲ ਰਹੇ ਹਨ।
ਇਹ ਵੀ ਪੜ੍ਹੋ:
