ନୟାଗଡ଼ରେ କାଳବୈଶାଖୀ ତାଣ୍ଡବ: ଭାଙ୍ଗିଲା ମୋବାଇଲ ଟାୱାର, ୬ ଆହତ

ନୟାଗଡ଼: ମାତ୍ର ଘଣ୍ଟାଏ ପାଇଁ ହେଲା କିନ୍ତୁ ସବୁ ବିଗାଡି ଦେଲା । ନୟାଗଡ଼ରେ ଦେଖିବାକୁ ମିଳିଛି କାଳବୈଶାଖୀ ତାଣ୍ଡବ । 3ଟି ବ୍ଲକରେ ସ୍ଥିତି ଅଣାୟତ୍ତ କରିଛି ପବନ । ନୟାଗଡ଼, ନୂଆଗାଁ ଏବଂ ଓଡଗାଁ ବ୍ଲକରେ କାଳବୈଶାଖୀ ସ୍ଥିତି ବେହାଲ କରିଛି । ଏହି କାଳବୈଶାଖୀରେ ଗଛ ଏବଂ ଛପର ଆଜବେଷ୍ଟ ପଡି 3 ଟି ବ୍ଲକରୁ ସମୁଦାୟ 6 ଜଣ ବ୍ୟକ୍ତି ଆହତ ହୋଇଛନ୍ତି । ଶରଣକୁଳ ବଜାର ଅଞ୍ଚଳରେ ଥିବା ବିଏସଏନଏଲ ମୋବାଇଲ ଟାୱାର ଭାଙ୍ଗି ପଡିଛି । ଅନେକ ସ୍ଥାନରେ ଘର ଛପର ଉଡିଯାଇଥିବାବେଳେ ବଡ଼ ବଡ଼ ଗଛ ମଧ୍ୟ ଭାଙ୍ଗି ପଡିଛି । ପବନର ବେଗ ଏପରି ଥିଲା ଯେ ତାଳ ଏବଂ ନଡ଼ିଆ ଗଛ ମଧ୍ୟ ନଇଁଯାଇଛି । ଅନେକ ଦୋକାନ ଘର ମଧ୍ୟ ଭାଙ୍ଗି ପଡ଼ିଥିବା ଦେଖିବାକୁ ମିଳିଛି । ଅନେକ ସ୍ଥାନରେ ବିଦ୍ୟୁତ ଖୁଣ୍ଟ ଭାଙ୍ଗି ପଡିବାରୁ ବିଦ୍ୟୁତ ସରବରାହ ବନ୍ଦ ରହିଛି । ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ