ସୁବର୍ଣ୍ଣପୁର ଗସ୍ତରେ ପ୍ରବୀଣ ତୋଗାଡିଆ, ହିନ୍ଦୁଙ୍କ ଉପରେ ଆକ୍ରମଣକୁ କଲେ ନିନ୍ଦା

ସୁବର୍ଣ୍ଣପୁର: ଅନ୍ତଃରାଷ୍ଟ୍ରୀୟ ହିନ୍ଦୁ ପରିଷଦର ଅଧ୍ୟକ୍ଷ ପ୍ରବୀଣ ତୋଗାଡିଆ ଆଜି ସୁବର୍ଣ୍ଣପୁର ଜିଲ୍ଲା ଗସ୍ତ କରିଛନ୍ତି । ସେ ଜିଲ୍ଲା ସର୍କିଟ ହାଉସ ଠାରେ ଏକ ସାମ୍ବାଦିକ ସମ୍ମିଳନୀ କରିଛନ୍ତି । ଏହି ଅବସରରେ ପ୍ରବୀଣ ତୋଗାଡିଆଙ୍କ ସହ ଆଲୋଚନା କରିଛନ୍ତି ଇଟିଭି ଭାରତ ପ୍ରତିନିଧି । ନିକଟରେ ଦେଶର ବିଭିନ୍ନ ପ୍ରଦେଶରେ ସାମ୍ପ୍ରଦାୟିକ ଦଙ୍ଗା ଘଟିଛି । ରାମନବମୀ ଶୋଭାଯାତ୍ରା ଏବଂ ହନୁମାନ ଜୟନ୍ତୀରେ ହିନ୍ଦୁମାନଙ୍କ ଉପରେ ଯେଉଁଭଳି ଆକ୍ରମଣ ହୋଇଛି ତାହାକୁ ନିନ୍ଦା କରିଛନ୍ତି ହିନ୍ଦୁ ପରିଷଦ ଅଧ୍ୟକ୍ଷ । ଦଙ୍ଗାରେ ହିନ୍ଦୁ ସମ୍ପ୍ରଦାୟର ଲୋକେ ପୀଡିତ ହେଉଥିବା ବେଳେ ସେମାନେ ଜେଲ୍ ମଧ୍ୟ ଯାଉଛନ୍ତି । ଦିଲ୍ଲୀ ତଥା ଗୁଜୁରାଟ ଦଙ୍ଗାରେ କେବଳ ହିନ୍ଦୁମାନେ ହିଁ କ୍ଷତିଗ୍ରସ୍ତ ହେଉଛନ୍ତି । ତେବେ ଏହିସବୁ ଦଙ୍ଗାରୁ ରାଜନୈତିକ ଦଳଗୁଡିକର ଭୋଟ ହାତେଇବା ପରି କାର୍ଯ୍ୟକୁ ବରଦାସ୍ତ କରିବେ ନାହିଁ ବୋଲି କହିଛନ୍ତି ପ୍ରବୀଣ ତୋଗଡିଆ । ଏହାସଙ୍ଗେ ସଙ୍ଗେ ଉତ୍ତରପ୍ରଦେଶ କାଶୀ ସହରରେ ଧାର୍ମିକ ସମସ୍ୟା ସମାଧାନ ହେବା ସହିତ କୃଷ୍ଣଙ୍କ ମଥୁରା ନଗରୀ ଭବ୍ୟ ରୂପ ଧାରଣ କରିବ ବୋଲି ସେ ଆଶାବ୍ୟକ୍ତ କରିଛନ୍ତି । ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ