ଅସରାଏ ବର୍ଷାରେ ବେହାଲ ଭୁବନେଶ୍ୱର; ରାସ୍ତାରେ ଆଣ୍ଠୁଏ ପାଣି, ବୁଡ଼ିଲା ଗାଡ଼ି

ଭୁବନେଶ୍ବର: ଅସରାଏ ବର୍ଷାରେ ଭାସିଲା ରାଜଧାନୀ । ଲଘୁଚାପ ଜନିତ ବର୍ଷା ପାଣିରେ ଉବୁଟୁବୁ ହେଲା ଭୁବନେଶ୍ବର । କେଇ ଘଣ୍ଟା ମଧ୍ୟରେ ସହରରେ ଦେଖାଦେଲା ଜଳବନ୍ଦୀ ସମସ୍ୟା । ଆଜି ବର୍ଷାରେ ଢେର ଭିଜିଛି ଭୁବନେଶ୍ବର । ପ୍ରବଳ ବର୍ଷା ଯୋଗୁଁ ରାସ୍ତା ଉପରେ ଆଣ୍ଠୁଏ ଉଚ୍ଚର ପାଣି ଲହଡ଼ି ଭାଙ୍ଗୁଛି । ଡ୍ରେନ୍‌ ପାଣି ଉଛୁଳି ରାସ୍ତାରେ ଭାସୁଛି । ଡ୍ରେନ୍‌ ଜାମ ଯୋଗୁଁ ବର୍ଷା ଜଳ ନିଷ୍କାସିତ ହୋଇପାରୁନାହିଁ । ଫଳରେ ସାଧାରଣ ଯାତାୟତ ଏକ ପ୍ରକାର ଠପ ହୋଇଯାଇଛି । ପ୍ରବଳ ବର୍ଷାରେ ଲିଙ୍ଗରାଜ ମନ୍ଦିର ନିକଟ ରାସ୍ତା ବୁଡ଼ିଯାଇଥିବା ବେଳେ ଅଧାବୁଡ଼ା ଅବସ୍ଥାରେ ବହୁ ଗାଡ଼ି ରହିଛି । ଭୀମପୁର ମୌଜା, ଫରେଷ୍ଟ ପାର୍କ ନିକଟ ରାସ୍ତା ଏବଂ ଇସ୍କନ ମନ୍ଦିର ସାମ୍ନାରେ ପ୍ରବଳ ପାଣି ଯୋଗୁଁ କାର ଓ ବାଇକ ବୁଡ଼ିଯାଇଥିବା ଦେଖିବାକୁ ମିଳିଛି । ସେପଟେ ୱାର୍ଡ ନମ୍ବର 52ର ମଧ୍ୟ ସମାନ ଅବସ୍ଥା । କଟକରେ ମଧ୍ୟ ପ୍ରବଳ ବର୍ଷା ହୋଇଛି । ଆଜି ରାତି ୮ ଯାଏ ୬ ଜିଲ୍ଲାରେ ପ୍ରବଳ ବର୍ଷା ହେବାର ଆଶଙ୍କା ରହିଛି ।

ଇଟିଭି ଭାରତ, ଭୁବନେଶ୍ବର