ଚୋର ଗ୍ୟାଙ୍ଗକୁ ଧରି ପୋଲିସର ଜିମା ଦେଲେ ଗ୍ରାମବାସୀ

ଖୋର୍ଦ୍ଧା: ଘରେ ପଶି କଳାକନା ବୁଲାଉଥିବା ଏକ ଚୋର ଗ୍ୟାଙ୍ଗକୁ ଧରି ପୋଲିସର ଜିମା ଦେଇଛନ୍ତି ଗ୍ରାମବାସୀ । ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ହଜ ପଞ୍ଚାୟତର ମୁକ୍ତାପୁର ଗ୍ରାମରେ ରବିବାର ବିଳମ୍ବିତ ରାତିରେ ଚୋର ଗ୍ୟାଙ୍ଗକୁ ଧରିଛନ୍ତି ଗ୍ରାମବାସୀ ।  ସୂଚନା ଅନୁଯାୟୀ, ଏହି ଚୋରମାନେ ଗ୍ରାମର ନିତ୍ୟାନନ୍ଦ ଜେନା ଓ ଧ୍ରୁବ ଚରଣ ବେହେରାଙ୍କ ଘରେ ପଶି ପରିବାର ଲୋକଙ୍କୁ ବହାରପଟୁ ତାଲା ପକାଇ ସେମାନଙ୍କ ଘରୁ ଲକ୍ଷାଧିକ ଟଙ୍କାର ଆସବାବପତ୍ର ସହ ଟଙ୍କା ଅଳଙ୍କାର ନେଇ କଳାକନା ବୁଲାଇଛନ୍ତି । 

ଲୁଟ୍ କରି ଫେରୁଥିବାବେଳେ ସେହି ଗ୍ରାମର କିଛି ଯୁବକଙ୍କ ହାବୁଡ଼ରେ ପଡ଼ିଯାଇଥିଲେ ଚୋର । ଏହି ଯୁବକମାନେ ଡାଳତୋଳାରୁ ଯାତ୍ରା ଦେଖି ଫେରୁଥିବାବେଳେ ଚୋର ସନ୍ଦେହରେ ସେମାନଙ୍କୁ ଅଟକାଇଥିଲେ । ଏବଂ ଗାଁରୁ ଲୁଟ୍ କରି ଫେରୁଥିବା ଜାଣିପାରି ସେମାନଙ୍କୁ ଉତ୍ତମମଧ୍ୟମ ଦେଇ ଜଙ୍କିଆ ଥାନାରେ ଜିମା ଦେଇଛନ୍ତି । ସେହିପରି ଅନ୍ୟ ଜଣେ ଚୋର ମଧ୍ୟ ନିକଟସ୍ଥ ଜଙ୍ଗଲରେ ଲୁଚିଥିବାବେଳେ ଗ୍ରାମର ଯୁବକମାନେ ଆଜି ମଧ୍ୟାହ୍ନରେ ତାକୁ କାବୁ କରି ପୋଲିସକୁ ହସ୍ତାନ୍ତର କରିଥିବା ଜଣାପଡ଼ିଛି । ଏହି ଗ୍ୟାଙ୍ଗରେ ମୋଟ 4 ପୁରୁଷ 2 ମହିଳା ଓ 4 ଜଣ ନାବାଳକ ଥିବା ଗ୍ରାମବାସୀମାନେ କହିଛନ୍ତି । ଏହି ଅଞ୍ଚଳରେ କିଛିଦିନ ହେବ ଚୋରୀ, ଛିନତାଇ ଆଦି ଅପରାଧ ବୃଦ୍ଧି ପାଉଥିବାବେଳେ ପୋଲିସ ପାଟ୍ରୋଲିଂ କରୁନଥିବା ଅଭିଯୋଗ ହୋଇଛି ।

ଇଟିଭି ଭାରତ, ଖୋର୍ଦ୍ଧା