ଜଙ୍ଗଲରୁ ନିଖୋଜ ବୃଦ୍ଧଙ୍କ କଙ୍କାଳ ଠାବ: ହାତୀ ଆକ୍ରମଣରେ ମୃତ୍ୟୁ ସନ୍ଦେହ

ଢେଙ୍କାନାଳ: ସଂରକ୍ଷିତ ଜଙ୍ଗଲରୁ ନିଖୋଜ ବୃଦ୍ଧଙ୍କ କଙ୍କାଳ ଠାବ ହୋଇଛି । ହାତୀ ଆକ୍ରମଣରେ ବୃଦ୍ଧଙ୍କ ଜୀବନ ଯାଇଥିବା ସନ୍ଦେହ କରାଯାଉଛି। ଏନେଇ ପୋଲିସ ଓ ବନବିଭାଗର ଘଟଣାସ୍ଥଳରେ ତଦନ୍ତ ଜାରି କରିଛନ୍ତି। ସୂଚନା ଅନୁସାରେ, ଢେଙ୍କାନାଳ ଜିଲ୍ଲା ପରଜଙ୍ଗ ଥାନା କଙ୍କିଳି ଗ୍ରାମ ନିକଟସ୍ଥ ସୁନ୍ଦରାଖୋଲ ସରଂକ୍ଷିତ ଜଙ୍ଗଲରେ ଠାବ ହୋଇଛି ନିଖୋଜ ବୃଦ୍ଧଙ୍କ କଙ୍କାଳ। ମୃତକ ଜଣକ ବାଲିପଶି ଗ୍ରାମର ବେଣୁଧର ସାହୁ ବୋଲି ଜଣାପଡିଛି। 

ବେଣୁଧର ଗତ ଜୁଲାଇ ୭ ତାରିଖରେ କଙ୍କିଳି ଗ୍ରାମକୁ ଟୋଲ ମଞ୍ଜି ପେଡିବାକୁ ଆସି ନିଖୋଜ ଥିଲେ। ତେବେ ପରିବାର ଲୋକ ବହୁ ଖୋଜା ଖୋଜି କରିବା ପରେ ମଧ୍ୟ କୌଣସି ସନ୍ଧାନ ପାଇ ପାରିନଥିଲେ |ଆଜି ସକାଳେ କଙ୍କିଳି ଗ୍ରାମର କିଛି ଲୋକ ଛତୁ ଖୋଜିବାକୁ ଗାଁ ନିକଟସ୍ଥ ଜଙ୍ଗଲକୁ ଯାଇଥିଲେ। ଜଙ୍ଗଲ ଭିତରେ ଏକ କଙ୍କାଳ ପଡ଼ିଥିବା ଦେଖିବା ପରେ ନିଖୋଜ ବୃଦ୍ଧଙ୍କ ପରିବାରକୁ ଖବର ଦେଇଥିଲେ। ଖବର ପାଇ ମୃତକଙ୍କ ପରିବାର ଘଟଣାସ୍ଥଳକୁ ଆସି ପୋଷାକ ଚିହ୍ନଟ କରିବା ସହ ପୋଲିସକୁ ଖବର ଦେଇଥିଲେ। ଖବର ପାଇ ପରଜଙ୍ଗ ପୋଲିସ ଓ ବନବିଭାଗ ଘଟଣାସ୍ଥଳକୁ ଯାଇ ଅଧିକ ତଦନ୍ତ କରିଛନ୍ତି । ପାରିପାର୍ଶ୍ବିକ ପରିସ୍ଥିତିରୁ ହାତୀ ଆକ୍ରମଣରେ ବୃଦ୍ଧଙ୍କ ମୃତ୍ୟୁ ହୋଇଥିବା ସନ୍ଦେହ କରାଯାଉଛି।

ଇଟିଭି ଭାରତ, ଢେଙ୍କାନାଳ