ବାଲୁକାକଳାରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ: ଦେଖନ୍ତୁ ଭିଡିଓ

Shrimandir Parikrama project; ପୁରୀ: ‘ଶ୍ରୀମନ୍ଦିର ପରିକ୍ରମା ପ୍ରକଳ୍ପ’ ଉଦଘାଟନକୁ ନେଇ ଚଳଚଞ୍ଚଳ ଶ୍ରୀକ୍ଷେତ୍ର ପୁରୀ । ତେବେ ବାଲୁକା ଶିଳ୍ପୀ ସୁଦାମ ପ୍ରଧାନ ଏହି ଅବସରରେ ଏକ ସୁନ୍ଦର କଳାକୃତି କରିଛନ୍ତି । ସେ ବାଲୁକାରେ ‘ଶ୍ରୀମନ୍ଦିର ପରିକ୍ରମା ପ୍ରକଳ୍ପ’ର ଏକ ଅବିକଳ ପ୍ରତିକୃତି ନିର୍ମାଣ କରିଛନ୍ତି । ଯାହାକି ବେଶ୍ ଆକର୍ଷଣୀୟ ହେଇଛି । ଏହି ବାଲୁକା କଳାରେ ସୁଦାମ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଅବିକଳ ରୂପରେଖକୁ ଅତି ନିଖୁଣ ଭାବେ ବର୍ଣ୍ଣନା କରିଛନ୍ତି । ତେବେ ଏହି ସୁନ୍ଦର କଳାକୃତିକୁ ନିର୍ମାଣ କରିବା ପାଇଁ ତାଙ୍କୁ 7ଦିନ ଲାଗିଛି । ଦୈନିକ 12 ରୁ 13 ଘଣ୍ଟା ନିଜ ସହଯୋଗୀଙ୍କ ସହ କାମ କରି ଏହି ଚମତ୍କାର ବାଲୁକା କଳାକୁ ଗଢ଼ିବାରେ ସଫଳ ହୋଇଛନ୍ତି ସୁଦାମ । ଏହି ବାଲୁକା କଳାର ଦୈର୍ଘ୍ୟ 8 ଫୁଟ୍, ପ୍ରସ୍ଥ 8 ଫୁଟ୍ ଓ ଉଚ୍ଚତା ମାତ୍ର ୨.୫ ଫୁଟ୍ ରହିଛି । ତେବେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଦ୍ୱାରା ଭକ୍ତ ବେଶ ଉପକୃତ ହେବେ । ଏଥିପାଇଁ ଶିଳ୍ପୀ ସୁଦାମ ପ୍ରଧାନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ମଧ୍ୟ ଦେଇଛନ୍ତି ।

ତେବେ ଆସନ୍ତାକାଲି (୧୭ ତାରିଖ, ବୁଧବାର) ପୌଷ ଶୁକ୍ଳ ସପ୍ତମୀ ତିଥିରେ ଅପରାହ୍ନ ୧ଟା ୧୫ ରୁ ୧ଟା ୩୦ ମଧ୍ୟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଫଳକ ଉନ୍ମୋଚନ କରିବେ । ଏଥିସହ ୧ଟା ୩୦ ରୁ ୨ଟା ମଧ୍ୟରେ ଗଜପତି ମହାରାଜା ଦିବ୍ୟସିଂହ ଦେବଙ୍କ ଦ୍ବାରା ଯଜ୍ଞର ପୂର୍ଣ୍ଣାହୁତି ସହ ଆରତୀ ଓ ପୁଷ୍ପାଞ୍ଜଳି ଅନୁଷ୍ଠିତ ହେବ। ସେହିପରି ୨ଟା ରୁ ୨ଟା ୩୦ ମଧ୍ୟରେ ଅନ୍ତଃପ୍ରଦକ୍ଷିଣ ପଥରେ ନାମ ସଂକୀର୍ତ୍ତନ ସହ ଶୋଭାଯାତ୍ରା ଅନୁଷ୍ଠିତ ହେବ । ୨ଟା ୩୦ ରୁ ୩ଟା ମଧ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସଭାଗୃହରେ ପହଞ୍ଚି ସମ୍ବର୍ଦ୍ଧିତ କରିବାର କାର୍ଯ୍ୟକ୍ରମ ରହିଛି ।

ଇଟିଭି ଭାରତ, ପୁରୀ