୧୦ ମାସର ଝିଅକୁ ଧରି ନଦୀକୁ ଡେଇଁବା ଘଟଣା, ଦିନକ ପରେ ବାପାର ମିଳିଲା ମୃତଦେହ

କଟକ: ୧୦ ମାସର ଝିଅକୁ ଧରି ବାପା ନଦୀକୁ ଡେଇଁବା ଘଟଣା । ଦିନକ ପରେ ମିଳିଲା ବାପାର ମୃତଦେହ । ଦୀର୍ଘ ୨୪ ଘଣ୍ଟାରୁ ଊର୍ଦ୍ଧ୍ବ ସମୟ ଧରି ସର୍ଚ୍ଚ ଅପରେସନ ପରେ ସନ୍ଧ୍ୟା ସମୟରେ ପ୍ରକାଶ ପ୍ରଧାନଙ୍କ ମୃତଦେହ ଉଦ୍ଧାର କଲା ବାରଙ୍ଗ ଅଗ୍ନିଶମ । ରବିବାର ୧୦ ମାସର ଶିଶୁକୁ ନେଇ ବଢି ନଦୀରେ ଡେଇଁବା ପରେ ନିଖୋଜ ଥିଲେ ପ୍ରକାଶ । କଟକ ସଦର ଥାନା ଅନ୍ତର୍ଗତ ସିଡୁଆ ନଦୀରରେ ଏହି ଘଟଣା ଘଟିଥିଲା । ପାରିବାରିକ କଳହକୁ ନେଇ ପ୍ରକାଶ ପ୍ରଧାନ ନିଜ ଝିଅକୁ ଧରି ନଦୀକୁ ଡେଇଁ ପଡ଼ିଥିଲେ । 

ସୌଭାଗ୍ୟ ବସତଃ ସେଠାରେ ଉପସ୍ଥିତ ସ୍ଥାନୀୟ ଲୋକେ ଶିଶୁକୁ ଉଦ୍ଧାର କରି ଡାକ୍ତରଖାନାକୁ ପଠାଇଥିଲେ । ବର୍ତ୍ତମାନ ଶିଶୁ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ଅନ୍ୟପଟେ ନଦୀକୁ ଡେଇଁବା ପରେ ପ୍ରକାଶଙ୍କ କୌଣସି ପତ୍ତା ମିଳିନଥିଲା । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ଅନେକ ଖୋଜାଖୋଜି କରିଥିଲା । ଆଜି ସକାଳୁ ପୁଣି ସର୍ଚ୍ଚ ଅପରେସନ ହୋଇଥିବା ବେଳେ ସନ୍ଧ୍ୟାରେ ତାଙ୍କର ମୃତଦେହ ଉଦ୍ଧାର ହୋଇଛି । ମୃତଦେହ ବ୍ୟବଚ୍ଛେଦ ପାଇଁ ଏସସିବି ମେଡ଼ିକାଲକୁ ପଠାଯାଇଛି । 

ଇଟିଭି ଭାରତ, କଟକ