Dantewada Mao Attack: ୨ ମାଓ ସମର୍ଥକଙ୍କୁ ଗିରଫ କଲା ରାଇଘର ପୋଲିସ

ନବରଙ୍ଗପୁର: ଦୁଇ ମାଓ ସମର୍ଥକଙ୍କୁ ଗିରଫ କରି ଆଜି କୋର୍ଟ ଚାଲାଣ କଲା ରାଇଘର ପୋଲିସ । ଏମାନେ ମାଓବାଦୀମାନଙ୍କୁ ସୂଚନା ଦେବା ସହ ଅନ୍ୟାନ୍ୟ କାର୍ଯ୍ୟରେ ସହାୟତା କରୁଥିବା ପୋଲିସ ଜାଣିବାକୁ ପାଇଛି । ଗତ ବୁଧବାର ଓଡ଼ିଶା ଛତିଶଗଡ ସୀମାନ୍ତ ସାଇବାନିଠାରେ ମାଓବାଦୀ ଓ ଏସଓଜି ମଧ୍ୟରେ ଗୁଳି ବିନିମୟ ପରେ ଏସଓଜି ଫେରୁଥିବା ସମୟରେ ହେମଲାଲ ନାଗେଶ ଓ ପ୍ରକାଶ ମାର୍କୋମଙ୍କୁ ଜଙ୍ଗଲ ମଧ୍ୟରେ ସନ୍ଦିଗ୍ଧ ଅବସ୍ଥାରେ ଧରିଥିଲେ । ଏମାନେ ମାଓବାଦୀମାନଙ୍କୁ ବିଭିନ୍ନ ସାହାଯ୍ୟ କରୁଥିବା ସହ ପୋଷ୍ଟର ଓ ବ୍ୟାନର ଲଗେଇବାରେ ସାହାଯ୍ୟ କରୁଥିଲେ ।  ସେମାନଙ୍କ ନିକଟରୁ ମାଓ ପୋଷ୍ଟର ବ୍ୟାନର ଜବତ କରିଛି ପୋଲିସ । ହେମାଲାଲ ନାଗେଶ ଏବଂ ​​ପ୍ରକାଶ ମାର୍କମ ମେନପୁର ନୂଆପଡା ନବରଙ୍ଗପୁର ଜିଲ୍ଲାର ଅନେକ ମାମଲା ସହ ରାଇଘର ଥାନା ଏବଂ ହାତିଗା ଓ ନାକ୍ଟିସେମଡା ଅଞ୍ଚଳରେ ମାଓ କାର୍ଯ୍ୟକଳାପ ସହ ଜଡ଼ିତ । ମାଓ ନେତା ସୁନୀଲଙ୍କ ନେତୃତ୍ବରେ ପରିଚାଳିତ ମାଓବାଦୀ ଗୋଷ୍ଠୀ ସେମାନଙ୍କର ସମ୍ପୃକ୍ତି  ଥିବା ସ୍ବୀକାର କରିଥିଲେ ବୋଲି ପୋଲିସ ପକ୍ଷରୁ ପ୍ରେସ ବିଜ୍ଞପ୍ତିରେ ପ୍ରକାଶ କରାଯାଇଛି । 

ଇଟିଭି ଭାରତ, ନବରଙ୍ଗପୁର