ବୌଦ୍ଧରେ ହକି ଫିବର୍: ପ୍ରଥମ ଥର ଆୟୋଜିତ ହେଲା ରାହାଗିରି

ବୌଦ୍ଧ: ସାରା ରାଜ୍ୟକୁ ଘାରିଛି ହକି ଫିବର୍ । ବିଶ୍ବକପ୍ ପାଇଁ ସମସ୍ତେ ଉତ୍ସାହିତ ଥିବାବେଳେ ବୌଦ୍ଧ ଜିଲ୍ଲାରେ ମଧ୍ୟ ହକି ଫିବର୍ ଦେଖାଯାଇଛି । ଆଜି ଏହି କ୍ରୀଡା ମହାକୁମ୍ଭର ଉଦଘାଟନୀ ଉତ୍ସବ ଥିବାବେଳେ ଜିଲ୍ଲାରେ ପ୍ରଥମ ଥର ପାଇଁ ରାହାଗିରି ବା ପଥ ଉତ୍ସବ ଆୟୋଜିତ ହୋଇଛି । ପାରମ୍ପରିକ ବାଦ୍ୟଯନ୍ତ୍ର ସହ ନାଚଗୀତ ଭଳି ରଙ୍ଗାରଙ୍ଗ କାର୍ଯ୍ୟକ୍ରମ ମଧ୍ୟରେ ମସଗୁଲ ହୋଇଛନ୍ତି ବୌଦ୍ଧବାସୀ । ଜିଲ୍ଲା ସଦର ମହକୁମାଠାରେ ଏହି ପଥ ଉତ୍ସବ ଆୟୋଜିତ ହୋଇଛି । ଗୋଟିଏ ପଟେ କଣ୍ଟାମାଳ ବ୍ଲକର ସୀମାନ୍ତରେ ଖଡଙ୍ଗ ଲୋକମହୋତ୍ସବ ନେଇ ଲୋକଙ୍କ ମଧ୍ୟରେ ଉତ୍ସାହ ଦେଖାଯାଉଥିବା ବେଳେ ଅନ୍ୟପଟରେ ବୌଦ୍ଧ ଠାରେ ପଥ ଉତ୍ସବରେ କଳାକାରଙ୍କ ଠାରୁ ନେଇ ଜିଲ୍ଲା ପ୍ରଶାସନ ଓ ସ୍ଥାନୀୟ ବସିନ୍ଦା ଭରପୁର ମଜା ଉଠାଇଛନ୍ତି । ଏହି ଉତ୍ସବରେ ବିଭିନ୍ନ ବର୍ଗର କଳାକାର ସାମିଲ ହୋଇଛନ୍ତି । ସଂଗୀତ, ନୃତ୍ୟ, ଚିତ୍ରକଳା, ବାଦ୍ୟଯନ୍ତ୍ର, ଏରୋବିକ, ବ୍ରାସବ୍ୟାଣ୍ଡ ରଙ୍ଗୋଲୀ କାର୍ଯ୍ୟକ୍ରମ ଦେଖିବାକୁ ମିଳିଛି । ଖୋଦ୍ ବୌଦ୍ଧ ଜିଲ୍ଲାପାଳ, ଏସପି, ପିଡି, ଅତିରିକ୍ତ ଜିଲ୍ଲାପାଳଙ୍କ ସମେତ ସମସ୍ତ ବିଭାଗୀୟ ଅଧିକାରୀ କର୍ମଚାରୀ, ଗଣମାଧ୍ୟମ ଓ ବୌଦ୍ଧ ସହରର ସମସ୍ତ ବର୍ଗର ନାଗରିକ ଭାଗ ନେଇ ପରସ୍ପରକୁ ଉତ୍ସାହିତ କରିଛନ୍ତି । ଇଟିଭି ଭାରତ, ବୌଦ୍ଧ