NMACC Gala: 'ରଘୁପତି ରାଜା ରାମ' ଗୀତରେ ନୀତାଙ୍କ ଭାରତନାଟ୍ୟମ, ବିମୋହିତ ଦର୍ଶକ

ମୁମ୍ବାଇ: ଶୁକ୍ରବାର ନୀତା ମୁକେଶ ଅମ୍ବାନି ସାଂସ୍କୃତିକ କେନ୍ଦ୍ର (NMACC)ର ଉଦଘାଟନ ହୋଇଛି । ଏହି ଗ୍ରାଣ୍ଡ ସେରିମନିରେ ଫିଲ୍ମ, ସ୍ପୋର୍ଟ୍ସ, ବଲିଉଡ ଜଗତର ଅନେକ ପରିଚିତ ଚେହେରା ସମେତ ଅନେକ ଶିଳ୍ପପତି ଯୋଗ ଦେଇଛନ୍ତି । ଏହି ଉଦଘାଟନୀ ସମାରୋହରେ ନୀତା ଅମ୍ବାନି ନିଜ ନୃତ୍ୟକଳାରେ ଉପସ୍ଥିତ ଦର୍ଶକଙ୍କୁ ବିମୋହିତ କରିଛନ୍ତି । ସେ ଜଣେ ଭାରତନାଟ୍ୟମ ନୃତ୍ୟଶିଳ୍ପୀ ହୋଇଥିବା ବେଳେ 'ରଘୁପତି ରାଜାରାମ' ସଙ୍ଗୀତରେ ନୃତ୍ୟ ପରିବେଷଣ କରିଛନ୍ତି । ଏହି ନୃତ୍ୟ ପ୍ରଦର୍ଶନ ଲାଗି ନୀତା ଏକ ରେଡ ଓ ପିଙ୍କ୍‌ ଲେହେଙ୍ଗାକୁ ଗୁଜୁରାତି ଷ୍ଟାଇଲରେ ପିନ୍ଧିଥିବା ଦେଖିବାକୁ ମିଳିଛି । ମୁମ୍ବାଇର ବାନ୍ଦ୍ରା କୁର୍ଲା କମ୍ପ୍ଲେକ୍ସରେ ଥିବା ଜିଓ ୱାର୍ଲ୍ଡ ସେଣ୍ଟର ମଧ୍ୟରେ ରହିଛି ଏହି ସାଂସ୍କୃତିକ କେନ୍ଦ୍ର । ଭାରତୀୟ କଳା, ଐତିହ୍ୟ ଓ ନୃତ୍ୟର ପ୍ରଚାରପ୍ରସାର ଉଦ୍ଦେଶ୍ୟରେ ନିର୍ମିତ ହୋଇଛି ଏହି କେନ୍ଦ୍ର । ଏହାକୁ ଯେକୌଣସି କଳାକାର ମାଗଣାରେ ବ୍ୟବହାର କରିପାରିବେ । ଏଥିରେ ୨୦୦୦ ସିଟ୍‌ କ୍ଷମତା ବିଶିଷ୍ଟ ଥିଏଟର ରହିଛି । ଶୁକ୍ରବାର ଏହି କେନ୍ଦ୍ରର ଉଦଘାଟନୀ ସମାରୋହରେ ଅନେକ ବଲିଉଡ ଓ କିଛି ହଲିଉଡ କଳାକାର ଯୋଗ ଦେଇଥିଲେ ।