ମରି ଯାଉଛି ମହାନଦୀ, ଡିସେମ୍ବରରେ ଶୁଖିଗଲାଣି ନଦୀ ଶଯ୍ୟା

ବୌଦ୍ଧ: ମରି ମରି ଯାଉଛି ଓଡିଶାର ଲାଇଫ ଲାଇନ ମହାନଦୀ । ବର୍ତ୍ତମାନ ଡିସେମ୍ବର ମାସ ଆରମ୍ଭରୁ ମହାନଦୀ ଶୁଷ୍କ ହେବାକୁ ବସିଲାଣି । ଓଡିଶାରେ ମହାନଦୀ ସର୍ବାଧିକ ପ୍ରବାହିତ ହେଉଥିବା ଜିଲ୍ଲା ହେଲା ବୌଦ୍ଧ ଜିଲ୍ଲା । ବୌଦ୍ଧ ଜିଲ୍ଲାରେ ମହାନଦୀ ମନମୁଣ୍ଡା ଠାରୁ ମାରଡା ପର୍ଯ୍ୟନ୍ତ 110 କିଲୋମିଟର ରୁ ଉର୍ଦ୍ଧ୍ବ ପ୍ରବାହିତ ହେଉଥିବା ବେଳେ ଅନେକ ସ୍ଥାନରେ ଆଶାତୀତ ଭାବରେ ମହାନଦୀର ଜଳଧାର ଶୁଖି ଗଲାଣି । ଗୋଟିଏ ପଟରେ ବର୍ଷା ଦିନରେ ମହାନଦୀ କୂଳ ଲଙ୍ଘି ନଦୀକୂଳିଆ ଅଞ୍ଚଳ ପାଇଁ ବିପଦ ସୃଷ୍ଟି କରୁଥିବା ବେଳେ ଅନ୍ୟ ପଟରେ ଡିସେମ୍ବର ମାସରୁ ଜୁଲାଇ ମାସ ପର୍ଯ୍ୟନ୍ତ ମହାନଦୀ ସମ୍ପୂର୍ଣ୍ଣ ଶୁଷ୍କ ହୋଇପଡୁଛି । ଏନେଇ ମହାନଦୀରୁ ମାଛମାରି ଜୀବିକା ଅର୍ଜନ କରୁଥିବା ଧିବର ସଂପ୍ରଦାୟର ଲୋକେ ମଧ୍ୟ ଗଭୀର ପ୍ରଭାବିତ ହୋଇଛନ୍ତି । ଇଟିଭି ଭାରତ, ବୌଦ୍ଧ