ନୟାଗଡ଼ରେ ଜମୁଛି ବୋଇତ ବନ୍ଦାଣ ଉତ୍ସବ, ସାମିଲ ହେଲେ ସିନେ ତାରକା

ଜିଲ୍ଲାରେ ଜମୁଛି ବୋଇତ ବନ୍ଦାଣ ଉତ୍ସବ । କାର୍ତ୍ତିକ ପୂର୍ଣ୍ଣିମା ଅବସରରେ ବୋଇତ ବନ୍ଦାଣ ଉତ୍ସବ ନେଇ ଗାଁ ଠୁଁ ସହର ଉତ୍ସବ ମୁଖର । ଭୋରୁ ଡ଼ଙ୍ଗା ଛଡ଼ା ନୀତି ସହ ଆରମ୍ଭ ହୋଇଛି ଦିନ । ନୟାଗଡ଼ ଜିଲ୍ଲାରେ ଉତ୍ସାହର ସହ ପାଳିତ ହୋଇଯାଇଛି ବୋଇତ ବନ୍ଦାଣ ଉତ୍ସବ । ନୟାଗଡ଼ ସହର ଦକ୍ଷିଣକାଳୀ ମନ୍ଦିର ନିକଟସ୍ଥ ସାଗର ପୁଷ୍କରିଣୀରେ ସୁସଜ୍ଜିତ ନୌକାରେ ସାଧବ ପୁଅଙ୍କ ସହ ଅଭିନେତା ଆକାଶ ଦାଶ ଏବଂ ଅଭିନେତ୍ରୀ ଏଲିନା ସାମନ୍ତରାୟ ନୌବିହାର କରିଥିଲେ । ସ୍ଥାନୀୟ କଳାକାରମାନେ ବୋଇତ ବନ୍ଦାଣ ଐତିହ୍ୟ ପରମ୍ପରାଙ୍କୁ ନୃତ୍ୟ ମାଧ୍ୟମରେ ପରିବେଷଣ କରିଥିଲେ । ଆୟୋଜିତ ଉତ୍ସବରେ ନୟାଗଡ଼ ଜିଲ୍ଲାପାଳ, ଏସପି ଏବଂ ନୟାଗଡ଼ ବିଧାୟକ ଅରୁଣ କୁମାର ସାହୁ , ସତ୍ୟନାରାୟଣ ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସାସ୍କୃତିକ କାର୍ଯ୍ୟକ୍ରମ ଦେଖିବା ପାଇଁ ସାଗର ପୁଷ୍କରିଣୀ କୂଳରେ ହଜାର ହଜାର ଲୋକଙ୍କ ସମାଗମ ହୋଇଥିଲା । ଐତିହ୍ୟ ପରମ୍ପରାକୁ ଉଜ୍ଜୀବିତ ରଖିବା ପାଇଁ 2004 ମସିହାରୁ ବୋଇତ ବନ୍ଦାଣ କମିଟି ପକ୍ଷରୁ ସ୍ଥାନୀୟ ବାସିନ୍ଦାଙ୍କ ସହଯୋଗରେ ସାଗର ପୁଷ୍କରିଣୀରେ ନୌବିହାର ସହ ବୋଇତ ବନ୍ଦାଣ ଉତ୍ସବ ପାଳିତ ହେଉଥିବା କୁହାଯାଇଛି । ଦକ୍ଷିଣ କାଳୀ ପଡ଼ିଆରେ 5 ଦିନ ଧରି ଚାଲିଥିବା ବୋଇତ ବନ୍ଦାଣ ଉତ୍ସବ ଆଜି ସନ୍ଧ୍ୟାରେ ଉଦଯାପିତ ହେବ ।