ସୁକିନ୍ଦାଗଡରେ ବିଗ୍ରହ ପରିବର୍ତ୍ତନ ନେଇ ପୂଜା କାର୍ଯ୍ୟ ଆରମ୍ଭ, ଯୋଗଦେଲେ ସ୍ଥାନୀୟ ରାଜା ଓ ମନ୍ତ୍ରୀ

Kalash yatra:

ଯାଜପୁର: ଯାଜପୁର ଜିଲ୍ଲା ସୁକିନ୍ଦା ନିର୍ବାଚନ ମଣ୍ଡଳୀ ସୁକିନ୍ଦାଗଡ଼ରେ ୨୩୦ ବର୍ଷରୁ ଉର୍ଦ୍ଧ୍ବ ସମୟ ପରେ ଜଗନ୍ନାଥ ମନ୍ଦିରର ବିଗ୍ରହ ହେବ ପରିବର୍ତ୍ତନ । ଏନେଇ ଚିହ୍ନଟ ହୋଇଥିବା ଦାରୁକୁ ଛେଦନ ହେବାକୁ ପୁରୀ ଶ୍ରୀମନ୍ଦିର ପକ୍ଷରୁ ଅନୁମତି ମିଳିଛି । ଦାରୁ ଛେଦନଠାରୁ ବିଗ୍ରହ ପ୍ରତିଷ୍ଠା ପର୍ଯ୍ୟନ୍ତ ସମସ୍ତ କାର୍ଯ୍ୟ ସୂଚାର ରୂପେ ସମ୍ପାଦନ କରିବା ପାଇଁ ବ୍ୟାପକ ପ୍ରସ୍ତୁତି ହୋଇଛି । ତେବେ ପ୍ରଭୁଙ୍କ ଏହି କାର୍ଯ୍ୟକୁ ସମ୍ପାଦନ କରିବା ପାଇଁ ସମସ୍ତ ଗ୍ରାମବାସୀ ଓ ଆଖପାଖ ପଡ଼ୋଶୀଙ୍କ ସାହାଯ୍ୟ ସହଯୋଗରେ ଏକ ବିଶାଳ କଳସ ଶୋଭାଯାତ୍ରା ଅନୁଷ୍ଠିତ ହୋଇ ସୁକିନ୍ଦା ବଙ୍ଗଳା ପରିସରରେ ଥିବା ଦାରୁ ଯଜ୍ଞ ମଣ୍ଡପରେ ପହଞ୍ଚିଛି । ଆଜିର ଏହି ବିଶେଷ କାର୍ଯ୍ୟକ୍ରମରେ ପୁରୀରୁ ଆସିଥିବା ମହାରଣା ଚିନ୍ତାମଣି ମହାରଣା ଓ ସୁକିନ୍ଦାଗଡ଼ର ରାଜା ସାହେବ ଭୂଦେବ ଭୂପତି ହରିଚନ୍ଦନ ମହାପାତ୍ର ଓ ସ୍ଥାନୀୟ ସେବାୟତ ଯୋଗ ଦେଇଥିଲେ । ସୁକିନ୍ଦା ବଙ୍ଗଳାରେ କଳସ ଶୋଭାଯାତ୍ରା ପହଞ୍ଚିବା ପରେ ସମସ୍ତ ଶ୍ରଦ୍ଧାଳୁଙ୍କ ସହିତ ରାଜ୍ୟ ଗ୍ରାମ୍ୟ ଉନ୍ନୟନ ମନ୍ତ୍ରୀ ପ୍ରିତିରଞ୍ଜନ ଘଡ଼ାଇ ଦାରୁ ପରିକ୍ରମା କରିବା ପରେ ଏବେ ମହା ଆଡ଼ମ୍ବରରେ ପୂଜାର୍ଚ୍ଚନା ଜାରି ରହିଥିବା ଦେଖିବାକୁ ମିଳିଛି ।

ଇଚିଭି ଭାରତ, ଯାଜପୁର