ଜୟଦେବ ଗୌରବ ସମ୍ମାନ ୨୦୨୩ ଉଦଘାଟିତ, ଚାରଚାନ୍ଦ୍‌ ଲଗାଇଲେ ବଲିଉଡ୍‌ର ବ୍ୟାଡମ୍ୟାନ୍‌

ନିଆଳି: ଖୋର୍ଦ୍ଧା ଜିଲ୍ଲା ବାଲିପାଟଣା ହାଇସ୍କୁଲ ଖେଳ ପଡିଆ ସଭା ମଣ୍ଡପରେ ଉଦଘାଟିତ ହୋଇଯାଇଛି ‌ଜୟଦେବ ଗୌରବ ସମ୍ମାନ ୨୦୨୩  । ସିଦ୍ଧି ବିନାୟକ ଚାରିଟେବୁଲ ଟ୍ରଷ୍ଟ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜିତ ହୋଇଯାଇଛି । ଏଥିରେ ବଲିଉଡର ଲୋକପ୍ରିୟ ଖଳନାୟକ ଗୁଲସନ ଗ୍ରୋଭର ଯୋଗ ଦେଇ ଦର୍ଶକଙ୍କୁ ନିଜ ଡାଇଲଗରେ ମନୋରଞ୍ଜନ କରିଥିଲେ । ଉପସ୍ଥିତ ଦର୍ଶକ ଅତି ନିକଟରୁ ଗୁଲସନଙ୍କୁ ଦେଖିବା ସହିତ ପ୍ରତ୍ୟେକ ଡାଇଲଗକୁ ଉପଯୋଗ କରିଥିଲେ। ଏଥି ସହିତ ନିଜ ନିଜ ମୋବାଇଲରେ ତାଙ୍କ ଭିଡିଓ ଉତ୍ତୋଳନ କରିଥିଲେ । ଗୁଲସନ ଗ୍ରୋଭର ୪୫ ମିନିଟ କାଳ ଉପସ୍ଥିତ ଦର୍ଶକମାନଙ୍କୁ ମନୋରଞ୍ଜନ ଖୋରାକ ଯୋଗାଇଥିଲେ। ଅନ୍ୟମାନଙ୍କ ମଧ୍ୟରେ ପପୁ ପମପମ୍, ଓଡ଼ିଶୀ, ପାଇକ ଆଖଡ଼ା, ପ୍ରିନ୍ସ ଡ୍ଯାନ୍ସ ଗ୍ରୃପ ଦ୍ବାରା ପରିବେଶିତ ନୃତ୍ୟକୁ ଉପସ୍ଥିତ ଦର୍ଶକ ଭରପୁର ଉପଭୋଗ କରିଥିଲେ । ସେହିପରି କଳା, ସାହିତ୍ୟ, କବି, ଲେଖକ, କଳାକାର, ପ୍ରଶାସନ ଅଧିକାର, ବୃଦ୍ଧିଜୀବୀ ଏବଂ ଗଣମାଧ୍ୟମ ପ୍ରତିନିଧିମାନଙ୍କୁ ଜୟଦେବ ଗୌରବ ସମ୍ମାନ ୨୦୨୩ରେ ସମ୍ମାନିତ କରାଯାଇଥିଲା । ସିଦ୍ଧି ବିନାୟକ ଚାରିଟେବୁଲ୍‌ ଟ୍ରଷ୍ଟ ଅଧ୍ୟକ୍ଷ ସତ୍ୟପ୍ରିୟ ବେହେରାଙ୍କ ସଭାପତିରେ ଉଦଘାଟିତ ଜୟଦେବ ଗୌରବ ସମ୍ମାନ ଦିବସରେ ମୁଖ୍ୟ ଅତିଥି ଭାବରେ ଐତିହାସିକ ପ୍ରଫୁଲ୍ଲ ଚନ୍ଦ୍ର ତ୍ରିପାଠୀ, ମୁଖ୍ୟବକ୍ତା ଟ୍ରଷ୍ଟର ସଦସ୍ୟ ରୁଦ୍ର ପ୍ରସାଦ ଭଞ୍ଜ, ଭାବଗ୍ରାହୀ ଗୋଚ୍ଛାୟତଙ୍କ ସମେତ ବହୁ ବରିଷ୍ଠ ବ୍ୟକ୍ତି ଯୋଗ ଦେଇଥିଲେ । ଜୟଦେବ ଗୌରବ ସମ୍ମାନ ୨୦୨୩ ଏବଂ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଯୋଗୁଁ ଅଞ୍ଚଳର ବହୁ ପ୍ରତିଭା ନିଜର ପାରିଦର୍ଶିଦା ପ୍ରଦର୍ଶନ କରିଥିଲେ । ତେବେ ଏହି କାର୍ଯ୍ୟକ୍ରମ ତିନି ଦିନ ଧରି ଅନୁଷ୍ଠିତ ହେବ ।  

ଇଟିଭି ଭାରତ, ନିଆଳି