ଡମ୍ପିଂ ୟାର୍ଡ଼ରେ ଅର୍ଦ୍ଧଦଗ୍ଧ ବ୍ୟକ୍ତିଙ୍କ ସନ୍ଦେହଜନକ ମୃତ୍ୟୁ, ହତ୍ୟା ସନ୍ଦେହ ଆଣିଲେ ପରିବାର ଲୋକ

କଟକ : କଟକରେ ଘଟିଛି ଯୁବକଙ୍କ ସନ୍ଦେହଜନକ ମୃତ୍ୟୁ  । କଟକ ଜିଲ୍ଲାର ଚୌଦ୍ବାର ଥାନା ଅନ୍ତର୍ଗତ ବିରାଟଗାଦି ନିକଟରୁ ନିଆଁରେ ପୋଡି ହୋଇଯାଇଥିବା ଅବସ୍ଥାରେ ଜଣେ ବ୍ୟକ୍ତିଙ୍କୁ ଉଦ୍ଧାର କରାଯାଇଥିଲା  । ଏହାପରେ ତାଙ୍କୁ ଏସସିବି ମେଡିକାଲକୁ ସ୍ଥାନାନ୍ତରିତ କରାଯାଇଥିଲା  । ଶେଷରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି ।  ମୃତ ବ୍ୟକ୍ତିଙ୍କ ନାମ ନିଶ୍ଚଳ ରଞ୍ଜନ ମହାପାତ୍ର ଅଟେ ଓ ତାଙ୍କ ଘର ନିଆଳି ଗୋବିନ୍ଦପୁର ଅଞ୍ଚଳରେ ବୋଲି ସୂଚନା ମିଳିଛି  । ପେଶାରେ ସେ ଜଣେ ବସ କଣ୍ଡକ୍ଟର ଥିଲେ  । ତେବେ ନିଶ୍ଚଳ କିପରି ଓ କାହିଁକି ଚୌଦ୍ବାର ଆସିଥିଲେ ଏବଂ ତାଙ୍କ ଦେହରେ କିପରି ନିଆଁ ଲାଗିଲା ତାହା ଅସ୍ପଷ୍ଟ ରହିଛି । ଗତକାଲି ବିଳମ୍ବିତ ରାତିରେ ବିରାଟଗାଦି ନିକଟରେ ଥିବା ଏକ ଡମ୍ପିଂ ୟାର୍ଡ ଭିତରୁ ଅର୍ଦ୍ଧଦଗ୍ଧ ଅବସ୍ଥାରେ ନିଶ୍ଚଳଙ୍କୁ ଠାବ କରାଯାଇଥିଲା । ସ୍ଥାନୀୟ ଲୋକଙ୍କ ଠାରୁ ଖବର ପାଇ ଚୌଦ୍ବାର ଥାନା ପୋଲିସ ଘଟଣାସ୍ଥଳରେ ପହଁଚିବା ସହ ଗୁରୁତର ଆହତ ଅବସ୍ଥାରେ ନିଶ୍ଚଳଙ୍କୁ ଏସସିବି ମେଡିକାଲରେ ଭର୍ତ୍ତି କରାଇଥିଲା । 

ଏହା ମଧ୍ୟ ପଢନ୍ତୁ... ବ୍ୟକ୍ତିଙ୍କ ସନ୍ଦେହଜନକ ମୃତଦେହ ଉଦ୍ଧାର, ହତ୍ୟା ଅଭିଯୋଗ ଆଣିଲେ ବାପା

କିନ୍ତୁ ଏସସିବିରେ ପହଁଚିବା ପରେ ତାଙ୍କର ମୃତ୍ୟୁ ହୋଇଯାଇଥିଲା । ନିଶ୍ଚଳଙ୍କ ମୃତ୍ୟୁ ପରେ ଚୌଦ୍ବାର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜ୍ଜୁ କରି ମୃତ ଦେହର ପୋଷ୍ଟମର୍ଟମ କରି ପରିବାର ଲୋକଙ୍କୁ ହସ୍ତାନ୍ତରିତ କରିଛି । ସେପଟେ ପରିବାର ଲୋକେ ଏହାକୁ ଏକ ଦୃର୍ଘଟଣା ବୋଲି ମାନିବାକୁ ନାରାଜ । ନିଶ୍ଚଳଙ୍କ ସାନ ଭାଇଙ୍କ କହିବା ମୁତାବକ ପରିବାରରେ କୌଣସି ଚାପ ନଥିବା ବେଳେ ବେଶ ହସଖୁସିରେ ସେ ଥିଲେ ।  

ଗତକାଲି ଜଣେ କେହି ଅଜଣା ବ୍ୟକ୍ତି ଏକ ଲାଲ ରଙ୍ଗର ସ୍କୁଟି ରେ ଆସିଥିଲେ ଓ ଘରେ କାହାକୁ କିଛି ନ ଜଣାଇ  ନିଶ୍ଚଳ ତାଙ୍କ ସହ ଘରୁ ବାହାରିଥିଲେ  ଏବଂ ବହୁତ ସମୟ ଯାଏଁ ତାଙ୍କର ଖୋଜ ଖବର ମିଳି ନଥିବା ବେଳେ ବିଳମ୍ବିତ ରାତିରେ ନିକଟସ୍ଥ ଫାଣ୍ଡିରୁ ତାଙ୍କ ପରିବାରକୁ ତାଙ୍କର ପୋଡି ହୋଇଯାଇଥିବାର ସୂଚନା ଦିଆଯାଇଥିଲା  । ଏହା ପରେ ପରିବାର ଲୋକ ମେଡିକାଲରେ ପହଁଚିବା ବେଳକୁ ତାଙ୍କର ମୃତ୍ୟୁ ଖବର ମିଳିଥିଲା । ତେବେ ଏହା ପଛରେ ଅନ୍ୟ କିଛି କାରଣ ରହିଥିବା ଅଭିଯୋଗ କରିଛନ୍ତି ପରିବାର ।

ଇଟିଭି ଭାରତ, କଟକ