Raja 2023: ଧୁମଧାମ୍‌ରେ ରଜ ପାଳୁଛନ୍ତି ରାଉରକେଲା ବାସିନ୍ଦା

ରାଉରକେଲା: ଆଜି ହେଉଛି ପବିତ୍ର ରଜ ପର୍ବ । ଓଡ଼ିଆଙ୍କ ନିଆରା ଏବଂ ପ୍ରସିଦ୍ଧ ପର୍ବ ହେଉଛି ରଜ । ଏହାକୁ ନେଇ ରାଉରକେଲା ସହରର  ବିଭିନ୍ନ ସ୍ଥାନରେ ରଜ ମଉଜ ପାଳନ କରାଯାଉଛି । ଆଜି ରଜର ରଙ୍ଗରେ ରଙ୍ଗେଇ ହୋଇଛି ଷ୍ଟିଲ୍‌ ସିଟି । ଗରିବଠାରୁ ଧନୀ ଏବଂ ଓଡ଼ିଆଠାରୁ ଆରମ୍ଭ କରି ଅଣ ଓଡିଆ ସମସ୍ତେ ଖୁବ ଉତ୍ସାହର ସହ ପାଳନ କରୁଛନ୍ତି ରଜ ଉତ୍ସବ । ଉତ୍ସାହ ଓ ଉଦ୍ଦୀପନାରେ ଭରି ରହିଥିବା ଏହି ତିନିଦିନିଆ ଉତ୍ସବରେ ଭୂଦେବୀଙ୍କୁ ଶ୍ରଦ୍ଧାଞ୍ଜଳୀ ଅର୍ପଣ କରାଯାଇଥାଏ। ପ୍ରଥମ ଦିନକୁ "ପହିଲି ରଜ", ଦ୍ୱିତୀୟ ଦିନକୁ "ରଜ ସଂକ୍ରାନ୍ତି" ଏବଂ ତୃତୀୟ ଦିନକୁ "ବସୁମତୀ ସ୍ନାନ" କୁହାଯାଏ । ଏହି ପର୍ବଟି ପୃଥିବୀ ମାତାଙ୍କୁ ସମ୍ମାନ ଦେବା ପାଇଁ ଆନୁଷ୍ଠାନିକ ସ୍ନାନ ସହିତ ଶେଷ ହୋଇଥାଏ । ରଜ ଉତ୍ସବର ପ୍ରଥମ ଦିନ ପହିଲି ରଜ ସହିତ ଆରମ୍ଭ ହୋଇଥାଏ ଯାହାକି ପ୍ରସ୍ତୁତି ଏବଂ ଆଶାର ସମୟ । ଏହି ଦିନ ମହିଳା ଓ ଯୁବତୀମାନେ ନିଜ ସୌନ୍ଦର୍ଯ୍ୟ ବୃଦ୍ଧି ପାଇଁ ବିଭିନ୍ନ ପ୍ରକାରର କାର୍ଯ୍ୟ କରିଥାନ୍ତି । ସେମାନେ ନୂତନ ବସ୍ତ୍ର ପରିଧାନ କରିବା ସହ ପାରମ୍ପରିକ ଅଳଙ୍କାରରେ ନିଜକୁ ସଜାନ୍ତି ।  ଯୁବତୀମାନେ ଦୋଳି ଖେଳିବାର ଅପୂର୍ବ ଆନନ୍ଦ ଉପଭୋଗ କରିଥାଆନ୍ତି ।

ଇଟିଭି ଭାରତ, ରାଉରକେଲା