Power Cut: ବିଦ୍ୟୁତକାଟ ନେଇ ହନ୍ତସନ୍ତ ରାଜ୍ୟବାସୀ, ମଉନ ବ୍ରତରେ ମନ୍ତ୍ରୀ

ପୁରୀ: ରାଜ୍ୟରେ ଭୀଷଣ ଗ୍ରୀଷ୍ମ ପ୍ରବାହ ଜାରି ରହିଥିବା ବେଳେ ଏପଟେ ବାରମ୍ବାର ବିଦ୍ୟୁତ କାଟ ହେଉଛି । ଅସହ୍ୟ ଗରମରେ ରାଜ୍ୟବାସୀ କଲବଲ ହେଉଛନ୍ତି । ହେଲେ କାହିଁକି ବାରମ୍ବାର ବିଦ୍ୟୁତ କାଟ ହେଉଛି ଏହାର ଉତ୍ତର ଶକ୍ତି ମନ୍ତ୍ରୀଙ୍କ ପାଖରେ ନାହିଁ । ବାରମ୍ବାର ଗଣମାଧ୍ୟମ ପ୍ରତିନିଧି ଶକ୍ତି ମନ୍ତ୍ରୀଙ୍କୁ ଏହାର ସମସ୍ୟା ନେଇ ପ୍ରଶ୍ନ କରୁଥିବା ବେଳେ ଶକ୍ତିମନ୍ତ୍ରୀ ଏହାର ଉତ୍ତର ଦେଉନାହାନ୍ତି । 

ପୁରୀରେ ଆଜି ରଥଯାତ୍ରା ସମୀକ୍ଷା ବୈଠକରେ ଯୋଗ ଦେଇଥିଲେ ଶକ୍ତି ମନ୍ତ୍ରୀ । ସାମ୍ବାଦିକମାନେ ଏହାର ପ୍ରଶ୍ନ କରୁଥିବା ବେଳେ ଶକ୍ତିମନ୍ତ୍ରୀ ସବୁ ଶୁଣି କେବଳ ଚଉକି ଉପରେ ନିଦ୍ରା ବିଷ୍ଣୁ ଭଳି ବସି ରହିଥିଲେ । ଶୁଣି ନ ଶୁଣିଲା ଭଳି ପ୍ରସଙ୍ଗ ଏଡ଼ାଇ ଚାଲି ଯାଇଛନ୍ତି । ସାମ୍ବାଦିକମାନେ ଏହି ପ୍ରଶ୍ନ ମନ୍ତ୍ରୀଙ୍କ କାର ପାଖକୁ ଯାଇ ମନ୍ତ୍ରୀଙ୍କୁ ପଚାରିବାରୁ ମନ୍ତ୍ରୀ ଏହାର କୌଣସି ଉତ୍ତର ମଧ୍ୟ ରଖିନାହାନ୍ତି । 

ପ୍ରଶ୍ନ ଉଠୁଛି ରାଜ୍ୟବାସୀ ଅଘୋଷିତ ବିଦ୍ୟୁତ କାଟ ନେଇ କଲବଲ ହେଉଥିବା ବେଳେ ଶକ୍ତି ମନ୍ତ୍ରୀ ଚୁପ କାହିଁକି ? ବିଦ୍ୟୁତ ବଳକା ରାଜ୍ୟ ଭାବେ, ବିଦ୍ୟୁତ ସଂସ୍କାରରେ ଓଡ଼ିଶା ଉଚ୍ଚ ପ୍ରଶଂସା ପାଇଥିବା ମନ୍ତ୍ରୀ ଦାବି କରୁଥିବା ବେଳେ ଓଡ଼ିଶା ବାସୀଙ୍କ ଉତ୍ତର କାହିଁକି ଦେଇ ପାରୁନାହାନ୍ତି ?   

ଇଟିଭି ଭାରତ, ପୁରୀ