Hockey World cup 2023: ଉଦଘାଟନୀ ଉତ୍ସବ ପାଇଁ ସଜେଇ ହେଉଛି ସିଲଭରସିଟି

କଟକ: ହାତରେ ଆଉ ଅଳ୍ପ ଦିନ। ୨୦୨୩ ପୁରୁଷ ହକି ବିଶ୍ବକପ (2023 FIH Men's Hockey World cup)ର ଉଦଘାଟନୀ ଉତ୍ସବ ପୂର୍ବରୁ କଟକରେ ପ୍ରସ୍ତୁତି ପ୍ରକ୍ରିୟା ଜୋରଦାର ଚାଲିଛି (2023 Hockey World Cup to inaugurate in Cuttack) । ଯେହେତୁ କଟକରେ ଏହି ମେଗା ଆୟୋଜନର ଉଦଘାଟନୀ ଉତ୍ସବ ଅନୁଷ୍ଠିତ ହେବ ସେନେଇ କଟକର ସବୁ ଦିଗକୁ କରାଯାଉଛି ସରସ ଓ ସୁନ୍ଦର (Beautification work in Cuttack)। ବୁଧବାରଠାରୁ ଶିଖରପୁରଠୁ ବାରବାଟୀ ଷ୍ଟାଡିୟମ ପର୍ଯ୍ୟନ୍ତ ରାସ୍ତାର ଦୁଇ ପାର୍ଶ୍ବରେ ଥିବା ଗଛଗୁଡ଼ିକ ଉପରେ ଅଗ୍ନିଶମ ବିଭାଗ ପକ୍ଷରୁ ଜଳ ସିଞ୍ଚନ କରାଯାଇଛି । ଅନ୍ୟପଟେ ରାସ୍ତାର ପାଦଚଲା ରାସ୍ତାରେ ବିଭିନ୍ନ ସୌନ୍ଦର୍ଯ୍ୟକରଣ କାର୍ଯ୍ୟ, ରାସ୍ତା ଘାଟର ପରିମଳ ଦିଗକୁ ବୁଲି ସମୀକ୍ଷା କରିଛନ୍ତି ସିଏମସି ମେୟର ଓ କମିଶନର। ପଦଯାତ୍ରା ମାଧ୍ୟମରେ କାଳିଆ ବୋଦା ନିକଟରୁ ଯୋବ୍ରା ପର୍ଯ୍ୟନ୍ତ ସମସ୍ତ କାର୍ଯ୍ୟକୁ ତଦାରଖ କରିଛନ୍ତି ମେୟର, କମିଶନର ଓ ବିଧାୟକ। ଆସନ୍ତା ୧୧ ତାରିଖ ଦିନ ବାରବାଟୀ ଷ୍ଟାଡିୟମରେ ହକି ବିଶ୍ବକପର ଉଦଘାଟନୀ ଉତ୍ସବ ଆୟୋଜିତ ହେବ । ଏଣୁ ଯୁଦ୍ଧକାଳୀନ ଭିତ୍ତିରେ ତମାମ କାର୍ଯ୍ୟକୁ ଶେଷ କରିବା ପାଇଁ ପ୍ରୟାସ ଜାରି ରଖିଛି ସିଏମସି । ଇଟିଭି ଭାରତ, କଟକ