ପଶୁ ହେଲେ ବି ମା', ଛୁଆ ପଛରେ 3କିମି ଦୌଡିଲା ଗାଈ

ଭୁବନେଶ୍ବର: ମା' । ଗୋଟିଏ ଅକ୍ଷର । କିନ୍ତୁ ଆବେଗ ବିଶାଳ । ଛୁଆ ନଜରରୁ ଟିକେ ଦୂରେଇ ଗଲେ ମା' ବିକଳ ହୁଏ । ମା' ମଣିଷ ହେଉ ଅବା ପଶୁ । ଏଭଳି କିଛି ଚିତ୍ର ଦେଖିବାକୁ ମିଳିଛି କଙ୍କ୍ରିଟ ସହର ଭୁବନେଶ୍ବରରେ । ଭୁବନେଶ୍ବର ଇନଫୋସିଟି-ପଟିଆ ରାସ୍ତା ମଝିରେ ଗୋଟିଏ ବାଛୁରୀ ଦୁର୍ଘଟଣାର ଶିକାର ହୋଇ ଛଟପଟ ହେଉଥିଲା । ପିଲାର ଯନ୍ତ୍ରଣାରେ କାତର ହୋଇ ମା' ସାହାଯ୍ୟ ଖୋଜୁଥିଲା । ଏହି ଖବର ପାଇବା ପରେ ଗୋ ସେବକମାନେ ଆସି ସେଠାରେ ପହଞ୍ଚିଥିଲେ । ପ୍ରଥମେ ବାଛୁରୀଟିର ପ୍ରାଥମିକ ଚିକିତ୍ସା କରାଇଥିଲେ । ଭଲ ନ ହେବାରୁ ତାକୁ ହସ୍ପିଟାଲକୁ ନେବାକୁ ମନସ୍ଥ କରିଥିଲେ । ସ୍କୁଟିରେ ନେବା ସମୟରେ ତା ମା' ବି ସାଙ୍ଗରେ ଧାଇଁଥିଲା । ଗୋ ସେବକମାନଙ୍କ ପିଛା ଛାଡ଼ି ନ ଥିଲା । ଇନଫୋସିଟି ଛକରୁ ପଟିଆ ପର୍ଯ୍ୟନ୍ତ ରାସ୍ତାରେ ପାଖାପାଖି ୩ କିଲୋମିଟରରୁ ଅଧିକ ସ୍କୁଟି ପଛରେ ଦୌଡ଼ିଥିଲା ମା' ଗାଈ । ବାଟରେ ଏଭଳି ଭାବବିହ୍ବଳ ଦୃଶ୍ୟକୁ ଦେଖି ଘଡ଼ିଏ ଅଟକି ଯାଉଥିଲେ ପଥଚାରୀ । ଯେଉଁଠି ସ୍କୁଟି ଟିକେ ଅଟକି ଯାଉଥିଲା ଗାଈଟି ତା ପିଲାକୁ ଚାଟି ପକାଉଥିଲା । ଗାଈଟି ଦୌଡୁଥିବାରୁ ଦେଖି ଗୋ ସେବକମାନେ ଆଉ ଆଗକୁ ଯାଇ ପାରିନଥିଲେ । ରାସ୍ତାରେ ହିଁ ବାଛୁରୀର ଚିକିତ୍ସା କରାଯାଇଥିଲା । ସବୁଠୁ ବଡ଼କଥା ହେଲା ଚିକିତ୍ସା ସମୟରେ ଗୋ ସେବକ ଏବଂ ଡାକ୍ତରଙ୍କର କୌଣସି କ୍ଷତି କରି ନ ଥିଲା ଗାଈ । ଚିକିତ୍ସା ପରେ ଏକ ଘରେ ବାଛୁରୀକୁ ରଖାଯାଇଥିଲା । କିନ୍ତୁ ଗଭୀର କ୍ଷତ ଯୋଗୁଁ ବାଛୁରୀର ମୃତ୍ୟୁ ହୋଇଥିବା ଜଣାପଡିଛି । ଇଟିଭି ଭାରତ, ଭୁବନେଶ୍ବର