ବଡ଼ଧରଣର ଡକାୟତି ଗ୍ୟାଙ୍ଗ ପର୍ଦ୍ଦାଫାସ, ବନ୍ଧୁକ ସହ 4ଟି ଅଫୁଟା ଗୁଳି ଜବତ

ଭଦ୍ରକ: ବାଂଶଡା ପୋଲିସକୁ ମିଳିଛି ବଡ଼ ସଫଳତା । ବଡ ଧରଣର ଡକାୟତି ଗ୍ୟାଙ୍ଗ ପର୍ଦ୍ଦାଫାସ । ବନ୍ଧୁକ ସହ 4ଟି ଅଫୁଟା ଗୁଳି ଜବତ । ସୂଚନାଯୋଗ୍ୟ, ଗତ ନଭେମ୍ବର ମାସ ୨ ତାରିଖରେ ବାଂଶଡା ଥାନା ଶସିକାଦେଇପୁର ବିଜୟ ନାୟକଙ୍କ ଘର ଭିତରେ ପଶି ବନ୍ଧୁକ ଦେଖାଇ ଲୁଟ କରିଥିଲା ଏହି ଗ୍ୟାଙ୍ଗ । କେବଳ ଏତିକି ନୁହେଁ ଦୋସିଙ୍ଗା ବଜାରରେ ଥିବା ଏକ ଗହଣା ଦୋକାନରୁ ଚୋରି ଏବଂ ଘର ଭଡା ବାହାନାରେ ପରମାନନ୍ଦପୁରରେ ବୃଦ୍ଧା ଦମ୍ପତିଙ୍କୁ ବନ୍ଧୁକ ଦେଖାଇ ଟଙ୍କା ଏବଂ ସୁନା ଗହଣା ଲୁଟରେ ସମ୍ପୃକ୍ତି ଥିଲା ଏହି ଗ୍ୟାଙ୍ଗ । ଏଭଳି ଘଟଣା ବାରମ୍ବାର ଧାମରା, ଚାନ୍ଦବାଲି ଏବଂ ବାଂଶଡା ଥାନା ଅଧିନରେ ଘଟୁଥିବାରୁ ତିନି ଥାନା ଅଧିକାରୀଙ୍କ ନିଦ ହଜି ଯାଇଥିଲା । 

ପୋଲିସ ଏହାକୁ ଗମ୍ଭୀରତା ସହ ନେଇ ତଦନ୍ତ ଆରମ୍ଭ କରିଥିଲା । ବିଭିନ୍ନ ସ୍ଥାନରେ ଚଢ଼ାଉ ପରେ ଏହି ଲୁଟେରାଙ୍କ ଠିକଣା ପାଇଥିଲା ପୋଲିସ । ଏହି ଲୁଟ୍ ଘଟଣାରେ ପୋଲିସ ୬ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ଦେଢ଼ କେଜିର ରୂପା, ସ୍ବର୍ଣ୍ଣ ଅଳଙ୍କାର ଜବତ କରିଛି । ସେହିପରି ଗୋଟିଏ ବନ୍ଧୁକ ସହ ୪ଟି ଅଫୁଟା ଗୁଳି ଏବଂ ଦୁଇଟି ମୋଟର ସାଇକେଲ ମଧ୍ୟ ଜବତ କରିଛି ପୋଲିସ । ତେବେ ଗିରଫ ଅଭିଯୁକ୍ତ ମାନେ ବାଲେଶ୍ଵର ଏବଂ ଭଦ୍ରକ ଜିଲ୍ଲାର ବୋଲି ସୂଚନା ମିଳିଛି । 

ଇଟିଭି ଭାରତ, ଭଦ୍ରକ