ନ୍ୟୁୟର୍କ: ଚଳିତ ମାସ 11ରେ ବିଶ୍ବ ପାର୍କିନ୍ସନ ଦିବସ ପାଳନ କରାଯାଇଛି । ରୋଗ ବାବଦରେ ଲୋକଙ୍କୁ ସଚେତନ କରିବା ଉଦ୍ଦେଶ୍ୟରେ ଏହି ଦିବସ ପାଳନ କରାଯାଏ । ଆଉ ଠିକ୍ ଏହି ମାସରେ ହିଁ ପାର୍କିନ୍ସନ ଭଳି ମସ୍ତିଷ୍କ ବ୍ୟାଧିର ନିରାକରଣ ଦିଗରେ ଚିକିତ୍ସା ବିଜ୍ଞାନକୁ ମିଳିଛି ସଫଳତା । ବୈଜ୍ଞାନିକମାନେ ଏକ ଏପରି କୌଶଳର ଉଦ୍ଭାବନ କରିଛନ୍ତି, ଯାହା ପାର୍କିନ୍ସନ ରୋଗକୁ ଆଗୁଆ ଚିହ୍ନଟ କରିବାରେ ସହାୟକ ହେବ । ଏହା ସାହାଯ୍ୟରେ ରୋଗୀଙ୍କୁ ସଠିକ୍ ସମୟରେ ଉପଯୁକ୍ତ ଚିକିତ୍ସା ପ୍ରଦାନ କରିବା ମଧ୍ୟ ସହଜ ହୋଇପାରିବ ।
ଆମେରିକାର ଅନୁସନ୍ଧାନକାରୀମାନେ ଏହି ଅନୁସନ୍ଧାନ କରିଛନ୍ତି । ମସ୍ତିଷ୍କରେ ଜମାଟ ବାନ୍ଧୁଥିବା ଅସ୍ୱାଭାବିକ ପ୍ରୋଟିନ୍(Abnormal Protein) ଚିହ୍ନଟ କରିବାରେ ଏହି କୌଶଳ ଏକ ଗେମ୍-ଚେଞ୍ଜର୍ ଭାବେ କାର୍ଯ୍ୟ କରିବ । ଏହି ଆବନର୍ମାଲ୍ ପ୍ରୋଟିନ୍ ପାର୍କିନ୍ସନ ରୋଗ କରାଇଥାଏ । ଲାନସେଟ୍ ସ୍ନାୟୁବିଜ୍ଞାନ ପତ୍ରିକାରେ(ନ୍ୟୁରୋଲୋଜି ଜର୍ଣ୍ଣାଲ) ପ୍ରକାଶିତ ଅନୁସନ୍ଧାନ ଅନୁସାରେ, ଏହି କୌଶଳକୁ ଆଲଫା-ସିନୁକ୍ଲିନ୍ ସିଡ୍ ଆମ୍ପ୍ଲାଇଫେସନ୍ ଆସେ(Alpha-synuclein seed amplification assay, Alpha Syn-SAA) କୁହାଯାଉଛି । ଏହି କୌଶଳ ନ୍ୟୁରୋଡିଜେନେରେଟିଭ୍(ସ୍ନାୟୁ ବିକାର) ରୋଗରେ ଆକ୍ରାନ୍ତ ଲୋକଙ୍କୁ ସଠିକ୍ ଭାବରେ ଚିହ୍ନଟ କରିବା ସହ ରୋଗୀଙ୍କ ପାଇଁ ଏହା କେତେ ବିପଦପୂର୍ଣ୍ଣ ରହିବ, ତାହା ଦର୍ଶାଇବ ।
ଏହା ମଧ୍ୟ ପଢନ୍ତୁ:- World Parkinson's Day: ଜାଣନ୍ତୁ ପାର୍କିନ୍ସନ୍ ଦିବସ ପାଳନ ପଛର ଉଦ୍ଦେଶ୍ୟ
ମସ୍ତିଷ୍କରେ ଆଲଫା-ସିନୁକ୍ଲିନ୍ ପ୍ରୋଟିନ୍ ଏଗ୍ରିଗେଟ୍ସ ଭୁଲ୍ ଶୈଳୀରେ ଏକାଠି ହେଲେ ପାର୍କିନ୍ସନ୍ ରୋଗ ହୋଇଥାଏ । ଅଧ୍ୟୟନରୁ ଜଣାପଡିଛି ଯେ, ପାର୍କିନ୍ସନ୍ ବାୟୋମାର୍କର୍ ଚିହ୍ନଟ କରିବାରେ Alpha Syn-SAA କୌଶଳ ବେଶ୍ ପ୍ରଭାବୀ, ଏହା ଦ୍ବାରା ପ୍ରାଥମିକ ଅବସ୍ଥାରେ ରୋଗୀମାନଙ୍କଠାରେ ରୋଗର ସଠିକ୍ ନିରାକରଣ ସମ୍ଭବ ହୋଇପାରିବ ।
ଅଧିକନ୍ତୁ, ଫଳାଫଳଗୁଡିକ ଏହା ମଧ୍ୟ ସୂଚିତ କରେ ଯେ ମସ୍ତିଷ୍କରେ ଡୋପାମିନେରଜିକ୍ କ୍ଷତି ଇମେଜିଙ୍ଗ୍ ଦ୍ୱାରା ଦେଖାଯିବା ପୂର୍ବରୁ ମିସ୍ଫୋଲ୍ଡେଡ୍ ଆଲଫା-ସିନୁକ୍ଲିନ୍ ଚିହ୍ନଟ ହୋଇପାରେ, ବହୁ ପରିମାଣର ସ୍ନାୟୁଗତ କ୍ଷତି ଘଟିବା ପୂର୍ବରୁ ଏହି ବିକୃତ ପ୍ରୋଟିନଗୁଡିକର ଜମାଟ ବାନ୍ଧିବାକୁ ଚିହ୍ନଟ କରିଥାଏ । ପେନସିଲଭାନିଆ ପେରେଲମ୍ୟାନ୍ ସ୍କୁଲ୍ ଅଫ୍ ମେଡିସିନ୍ର ପ୍ରଫେସର ଆଣ୍ଡ୍ରିୟୁ କହିଛନ୍ତି ଯେ, ପାର୍କିନ୍ସନ୍ ରୋଗର ପାଥୋଲୋଜି ପାଇଁ ଏକ ପ୍ରଭାବଶାଳୀ ଜୈବ ମାର୍କର୍ ଚିହ୍ନଟ କରିବା ଦ୍ବାରା ଆମେ ଏହି ରୋଗର ଚିକିତ୍ସା ପାଇଁ ଗଭୀର ପ୍ରଭାବ ପକାଇପାରିବୁ । ଏହା ପୂର୍ବରୁ ଲକ୍ଷଣ ଚିହ୍ନଟ କରିବା, ରୋଗୀଙ୍କ ବିଭିନ୍ନ ଉପସେଟ ପାଇଁ ସର୍ବୋତ୍ତମ ଚିକିତ୍ସା ଚିହ୍ନଟ କରିବା ଏବଂ କ୍ଲିନିକାଲ୍ ପରୀକ୍ଷାକୁ ତ୍ୱରାନ୍ୱିତ କରିବା ଦିଗରେ ସମ୍ଭବ ସହାୟକ ହୋଇପାରେ ।
ପାର୍କିନ୍ସନ୍ ରୋଗ କଣ: ଏହି ରୋଗ ହେଉଛି ହେଉଛି ଏକ ନ୍ୟୁରୋଡିଜେନେରେଟିଭ୍ ବ୍ୟାଧି, ଯାହା ମୁଖ୍ୟତଃ ମସ୍ତିଷ୍କର ସ୍ନାୟୁକୁ ପ୍ରଭାବିତ କରିଥାଏ । ଏହି ରୋଗ ହେଲେ ଶାରୀରିକ ସନ୍ତୁଳନ ବଜାୟ ରହେ ନାହିଁ । ଏହାର ଲକ୍ଷଣ ହଠାତ୍ ଦେଖାଯାଏ ନାହିଁ । ଧୀରେଧୀରେ ସଙ୍କେତ ବିକଶିତ ହୁଏ । ରୋଗର ବିବିଧତା ହେତୁ ଲକ୍ଷଣର ରୂପ ପ୍ରାୟତଃ ବ୍ୟକ୍ତିଙ୍କଠାରୁ ଭିନ୍ନ ଭିନ୍ନ ହୋଇଥାଏ । ଏହି କାରଣରୁ ରୋଗ ବିଳମ୍ବର ଚିହ୍ନଟ ହୋଇଥାଏ, ଫଳରେ ରୋଗୀଙ୍କର ସଠିକ୍ ଚିକିତ୍ସା ସମ୍ଭବ ହୋଇପାରେନି ।
