ନୂଆଦିଲ୍ଲୀ: ମାର୍ଚ୍ଚ 8ରେ ସମଗ୍ର ବିଶ୍ୱରେ ପାଳନ ହେବ ଅନ୍ତର୍ଜାତୀୟ ମହିଳା ଦିବସ । ସମାଜ ପ୍ରତି ମହିଳାଙ୍କ ଅବଦାନକୁ ମନେପକାଇବା ଉଦ୍ଦେଶ୍ୟରେ ଏହି ଦିବସ ପାଳନ କରାଯାଏ । ଏକ ପରିବାର ଏକ ଦେଶ କିପରି ତା'ର ନାରୀଶକ୍ତିକୁ ପାଥେୟ କରି ସମଗ୍ର ବିଶ୍ବ ଦରବାରରେ ପରିଚୟ ସୃଷ୍ଟି କରିପାରିଛି ତାହାକୁ ମନେପକାଏ ଏହି ଦିବସ । ତେବେ ଏହି ପରିପ୍ରେକ୍ଷୀରେ ଆସନ୍ତୁ ଜାଣିବା ରାଜନୀତି କ୍ଷେତ୍ରରେ ଆମ ଦେଶର ମହିଳାମାନଙ୍କର ଥିବା ବିଶେଷ ଅବଦାନ ବାବଦରେ...
ଇନ୍ଦିରା ପ୍ରିୟଦର୍ଶିନୀ- ଆମ ଦେଶର ରାଜନୀତିରେ ପ୍ରସିଦ୍ଧ ମହିଳାମାନଙ୍କ ମଧ୍ୟରେ ସବୁଠାରୁ ବଡ ନାମ ହେଉଛି ଇନ୍ଦିରା ଗାନ୍ଧୀ, ଯିଏକି ଦେଶର ପୂର୍ବତନ ପ୍ରଧାନମନ୍ତ୍ରୀ ତଥା ଆଇରନ୍ ଲେଡି ଭାବରେ ଜଣାଶୁଣା । ଦେଶର ପ୍ରଥମ ତଥା ଏକମାତ୍ର ପ୍ରଧାନମନ୍ତ୍ରୀ ଭାବରେ ସେ ଗୌରବମଣ୍ଡନ କରୁଛନ୍ତି । ତାଙ୍କ ଶାସନ ପ୍ରକ୍ରିୟାକୁ ଇତିହାସ ମନେ ପକାଇଦିଏ । ପାକିସ୍ତାନକୁ ଦୁଇ ଭାଗ କରିବା କ୍ଷେତ୍ରରେ ତାଙ୍କ ଅବଦାନ ଥିଲା ସ୍ମରଣୀୟ ।
ଦ୍ରୌପଦୀ ମୁର୍ମୁ- ଦେଶର ପ୍ରଥମ ଦଳିତ ତଥା ଆଦିବାସୀ ରାଷ୍ଟ୍ରପତି ହେବାର ଗୌରବମଣ୍ଡନ କରି ସମସ୍ତଙ୍କ ପାଇଁ ପ୍ରେରଣର ଉତ୍ସ ପାଲଟିଛନ୍ତି ଦ୍ରୌପଦୀ ମୁର୍ମୁ । ସେ ହେଉଛନ୍ତି ପ୍ରଥମ ଆଦିବାସୀ ମହିଳା ଯିଏକି ଦେଶର ସର୍ବୋଚ୍ଚ ପଦବୀର ଆସନ ଅଳଙ୍କୃତ କରିଛନ୍ତି । 2000 ମସିହାରେ ଜଣେ ବିଧାୟକ ଭାବରେ ଦ୍ରୌପଦୀ ମୁର୍ମୁଙ୍କ ରାଜନୈତିକ ଯାତ୍ରା ଆରମ୍ଭ ହୋଇଥିଲା । 2002 ରେ, ନବୀନ ପଟ୍ଟନାୟକ ସରକାରରେ ତାଙ୍କୁ ମତ୍ସ୍ୟ ଓ ପଶୁ ସମ୍ପଦ ବିକାଶ ମନ୍ତ୍ରଣାଳୟର ଦାୟିତ୍ବ ମିଳିଥିଲା । ଏହା ପରେ ସେ ଝାଡଖଣ୍ଡର ରାଜ୍ୟପାଳ ଭାବରେ କାର୍ଯ୍ୟ କରିଥିଲେ । 18 ମଇ 2015 ରୁ 12 ଜୁଲାଇ 2021 ପର୍ଯ୍ୟନ୍ତ ସେ ଝାଡଖଣ୍ଡର ରାଜ୍ୟପାଳ ଦାୟିତ୍ବ ତୁଲାଇଥିଲେ । ବର୍ତ୍ତମାନ ସେ ଦେଶର 15ତମ ରାଷ୍ଟ୍ରପତି ଦାୟିତ୍ବ ସମ୍ପାଦନ କରୁଛନ୍ତି ।
ସୁଷମା ସ୍ୱରାଜ- ଭାରତୀୟ ଜନତା ପାର୍ଟିର ଅନ୍ୟ ଜଣେ ପ୍ରଭାବଶାଳୀ ନାରୀ ନେତ୍ରୀ ହେଉଛନ୍ତି ସୁଷମା ସ୍ୱରାଜ । ଭାରତୀୟ ରାଜନୀତିରେ ବିଜେପିକୁ ଦୃଢ କରିବାରେ ସୁଷମାଙ୍କର ଏକ ବିଶେଷ ଭୂମିକା ଥିଲା । ଭାରତୀୟ ଜନତା ପାର୍ଟିର ସ୍ତମ୍ଭ କୁହାଯାଉଥିବା ଅଟଳ ବିହାରୀ ବାଜପେୟୀ, ଏଲ.କେ ଆଡଭାନୀ, ମୁରଲୀ ମନୋହର ଯୋଶୀଙ୍କ ସହ କାନ୍ଧ କାନ୍ଧରେ କାନ୍ଧ ମିଶାଇ ଦଳ ପାଇଁ କାମ କରିଥିଲେ ସୁଷମା ସ୍ବରାଜ । ସେ ଦଳର ମହିଳା ନେତ୍ରୀଙ୍କ ମଧ୍ୟରେ ଶୀର୍ଷରେ ଥିଲେ । ବିଜେପି ସରକାରରେ ସେ ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟ ପରିଚାଳନା କରିଥିଲେ । ସେ ବୈଦେଶିକ ବ୍ୟାପାର ମନ୍ତ୍ରଣାଳୟ, ସୂଚନା ପ୍ରସାରଣ ମନ୍ତ୍ରଣାଳୟରେ କାର୍ଯ୍ୟ କରିଥିଲେ । ସେ ଜବାହାରଲାଲ ନେହେରୁଙ୍କ ପରେ ଦ୍ବିତୀୟ ଥିଲେ, ଯିଏକି ବୈଦେଶିକ ମନ୍ତ୍ରୀ ଭାବେ ସମ୍ପୂର୍ଣ୍ଣ 5 ବର୍ଷର ଦାୟିତ୍ବ ତୁଲାଇଥିଲେ । ଏହା ସାଙ୍ଗକୁ ସେ ମଧ୍ୟ ଦିଲ୍ଲୀ ମୁଖ୍ୟମନ୍ତ୍ରୀ ଆସନରେ ମଧ୍ୟ ଅଧିଷ୍ଠିତ ହୋଇଥିଲେ ।
ନିର୍ମଳା ସୀତାରମଣ- ନିର୍ମଳା ସୀତାରମଣ ହେଉଛନ୍ତି ଦେଶର ପ୍ରଥମ ଅର୍ଥମନ୍ତ୍ରୀ, ଯିଏ ଅର୍ଥମନ୍ତ୍ରୀ ଭାବେ ପୂର୍ଣ୍ଣକାଳୀନ ବଜେଟ୍ ଉପସ୍ଥାପନ କରିବାର ଗୌରବ ହାସଲ କରିଛନ୍ତି । ସେ 2006 ରେ ଭାରତୀୟ ଜନତା ପାର୍ଟି ପକ୍ଷରୁ ରାଜନୈତିକ ଯାତ୍ରା ଆରମ୍ଭ କରିଥିଲେ ଏବଂ ମୋଦି ସରକାରରେ ପ୍ରଥମେ ପ୍ରତିରକ୍ଷା ମନ୍ତ୍ରୀ ଏବଂ ପରେ ଅର୍ଥମନ୍ତ୍ରୀ ଭାବେ ନିଜର ଦକ୍ଷ କାର୍ଯ୍ୟଶୈଳୀ ପ୍ରଦର୍ଶନ କରିଛନ୍ତି । ଫୋର୍ବସର ବାର୍ଷିକ ତାଲିକାରେ ନିର୍ମଳା ସୀତାରମଣ ବିଶ୍ୱର 100 ଜଣ ଶକ୍ତିଶାଳୀ ମହିଳାଙ୍କ ମଧ୍ୟରେ ସ୍ଥାନ ପାଇଥିଲେ ।
ସୋନିଆ ଗାନ୍ଧୀ- ସୋନିଆ ଗାନ୍ଧୀ ଆମ ଦେଶରେ ଜଣେ ଶକ୍ତିଶାଳୀ ରାଜନୈତିକ ମହିଳା ଭାବରେ ଜଣାଶୁଣା । ସେ ଦୀର୍ଘଦିନ ଧରି କଂଗ୍ରେସର ସଭାପତି ଭାବେ ଦାୟିତ୍ବ ତୁଲାଇଛନ୍ତି । ସେ କଂଗ୍ରେସ ଶାସନ ସମୟରେ ୟୁନାଇଟେଡ୍ ପ୍ରୋଗ୍ରେସିଭ୍ ଆଲାଇନ୍ସ (ୟୁପିଏ)ର ଚେୟାରମ୍ୟାନ୍ ଭାବରେ ମଧ୍ୟ କାର୍ଯ୍ୟ କରିଥିଲେ ।
ସୁମିତ୍ରା ମହାଜନ- ସୁମିତ୍ରା ମହାଜନ ଭାରତୀୟ ଜନତା ଦଳର ବରିଷ୍ଠ ନେତାଙ୍କ ମଧ୍ୟରେ ଜଣେ, ସ୍ନେହରେ ଲୋକେ ତାଙ୍କୁ ତାଇ ବୋଲି ଡାକନ୍ତି । 1989 ରେ ଇନ୍ଦୋର ଲୋକସଭା ଆସନରୁ ସୁମିତ୍ରା ମହାଜନ ପ୍ରଥମେ ଭାରତୀୟ ଜନତା ପାର୍ଟିର ସାଂସଦ ଭାବରେ ନିର୍ବାଚିତ ହୋଇଥିଲେ । ସେବେଠାରୁ ସେ ଲଗାତାର ଆଠ ଥର ଲୋକସଭା ନିର୍ବାଚନରେ ଜିତିଛନ୍ତି । ସେ ହେଉଛନ୍ତି ଏକମାତ୍ର ମହିଳା ସାଂସଦ, ଯିଏକି ଏଭଳି ସଫଳତା ହାସଲ କରିଛନ୍ତି । ସେ ସମାନ ଲୋକସଭା ଆସନରୁ ଲଗାତାର ଆଠ ଥର ପାଇଁ ନିର୍ବାଚିତ ହୋଇଛନ୍ତି । ଏହା ପରେ 2014 ରୁ 2019 ପର୍ଯ୍ୟନ୍ତ ଲୋକସଭାର ବାଚସ୍ପତି ଦାୟିତ୍ବ ତୁଲାଇ ଥିଲେ ।
ମୀରା କୁମାର- ମୀରା କୁମାର କଂଗ୍ରେସର ଜଣେ ପ୍ରମୁଖ ନେତା ଭାବେ ବିବେଚନା କରାଯାଏ । ସେ ବିହାରର ସାସାରାମ ଲୋକସଭା ଆସନରୁ ସାଂସଦ ହୋଇଥିଲେ । ତାଙ୍କୁ 2009 ରୁ 2014 ପର୍ଯ୍ୟନ୍ତ ଲୋକସଭାର ପ୍ରଥମ ମହିଳା ବାଚସ୍ପତି ଭାବରେ ନିଯୁକ୍ତ କରାଯାଇଥିଲା । ଏହା ପରେ, 2017 ରେ ଅନୁଷ୍ଠିତ ରାଷ୍ଟ୍ରପତି ନିର୍ବାଚନରେ ସେ ରାମନାଥ କୋବିନ୍ଦଙ୍କ ବିରୁଦ୍ଧରେ ୟୁପିଏ ପ୍ରାର୍ଥୀ ଭାବରେ ପ୍ରତିଦ୍ୱନ୍ଦ୍ୱିତ୍ବ କରିଥିଲେ ।
ଶିଲା ଦୀକ୍ଷିତ- ଶିଲା ଦୀକ୍ଷିତଙ୍କୁ କଂଗ୍ରେସର ଜଣେ ଶକ୍ତିଶାଳୀ ନାରୀନେତ୍ରୀ ଭାବରେ ବିବେଚନା କରାଯାଏ । ସେ ଦିଲ୍ଲୀରେ ବିଜେପିକୁ ଅଡୁଆରେ ପକାଇ କଂଗ୍ରେସକୁ କ୍ରମାଗତ ତିନି ଥର ବିଜୟୀ କରିବାରେ ସଫଳ ନେତୃତ୍ୱ ନେଇଥିଲେ ଏବଂ 1998 ରୁ 2013 ପର୍ଯ୍ୟନ୍ତ ଦିଲ୍ଲୀର ମୁଖ୍ୟମନ୍ତ୍ରୀ ଥିଲେ । ଏହା ପରେ, ନିର୍ବାଚନରେ ପରାଜୟ ପରେ 11 ମାର୍ଚ୍ଚ 2014 ରେ ଶିଲା ଦୀକ୍ଷିତଙ୍କୁ କେରଳର ରାଜ୍ୟପାଳ କରାଯାଇଥିଲା, କିନ୍ତୁ 25 ଅଗଷ୍ଟ 2014 ରେ ସେ ଏହି ପଦରୁ ଇସ୍ତଫା ଦେଇଥିଲେ ।
ଏହା ମଧ୍ୟ ପଢନ୍ତୁ:- Women's Day Special: ଋତୁସ୍ରାବରେ ଆଚାର ଡବା ନଛୁଇଁବା କେତେ ଯୁକ୍ତିଯୁକ୍ତ, ଜାଣନ୍ତୁ
ମମତା ବାନାର୍ଜୀ- ମମତା ବାନାର୍ଜୀ ମଧ୍ୟ ଦେଶର ରାଜନୈତିକ କ୍ଷେତ୍ରର ଶକ୍ତିଶାଳୀ ମହିଳାମାନଙ୍କ ମଧ୍ୟରୁ ଅନ୍ୟ ଜଣେ । ସେ କଂଗ୍ରେସରୁ ତାଙ୍କର ରାଜନୈତିକ କ୍ୟାରିୟର ଆରମ୍ଭ କରିବା ପରେ ନିଜର ଦଳ ଗଠନ କରିଥିଲେ । ସେ କେନ୍ଦ୍ର ସରକାରରେ ରେଳମନ୍ତ୍ରୀ ତଥା ପଶ୍ଚିମବଙ୍ଗରେ ମୁଖ୍ୟମନ୍ତ୍ରୀ ଭାବରେ ଅନେକ ଗୁରୁତ୍ୱପୂର୍ଣ୍ଣ କାର୍ଯ୍ୟ କରିଛନ୍ତି । କହି ରଖୁଛୁ ଯେ, ମମତା ବାନାର୍ଜୀ ପଶ୍ଚିମବଙ୍ଗରେ 34 ବର୍ଷର ବାମପନ୍ଥୀ ସରକାରକୁ ହଟାଇ ମୁଖ୍ୟମନ୍ତ୍ରୀ ହୋଇଥିଲେ । ଏବେ ମଧ୍ୟ ସେ ମୁଖ୍ୟମନ୍ତ୍ରୀ ଦାୟିତ୍ବ ତୁଲାଉଛନ୍ତି ।
ଜୟଲଳିତା- ଜୟଲଳିତା ଦକ୍ଷିଣ ଭାରତର ରାଜନୀତିରେ ଏକ ବଡ ନାମ ଭାବରେ ବିବେଚନା କରାଯାଏ, ଯିଏ ଚଳଚ୍ଚିତ୍ର କ୍ୟାରିୟର ପରେ ନିଜର ରାଜନୈତିକ କ୍ୟାରିଅର୍ ଆରମ୍ଭ କରିଥିଲେ । କିନ୍ତୁ ସେ ରାଜନୀତିରେ ମଧ୍ୟ ଏକ ବଡ଼ ସ୍ଥାନ ହାସଲ କରିଥିଲେ । ସେ 14 ବର୍ଷରୁ ଅଧିକ ସମୟ ଧରି ତାମିଲନାଡୁରେ ମୁଖ୍ୟମନ୍ତ୍ରୀ ଦାୟିତ୍ବ ତୁଲାଇଥିଲେ ।
ମାୟାବତୀ- ମାୟାବତୀଙ୍କୁ ଦଳିତ ରାଜନୀତିର ନେତ୍ରୀ ବୋଲି କୁହାଯାଏ । କାନସିରାମ ମିଶନକୁ ଆଗେଇ ନେବା ସହ ମାୟାବତୀ ଉତ୍ତରପ୍ରଦେଶରେ ବହୁଜନ ସମାଜପାର୍ଟିର ମୁଖ୍ୟ ଭାବେ ଦାୟିତ୍ବ ତୁଲାଇଛନ୍ତି । ଏଥିସହ ସେ ଚାରି ଚାରି ଥର ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଆସନ ଅଳଙ୍କୃତ କରିଛନ୍ତି । ମାୟାବତୀ ଦଳିତଙ୍କ ଉନ୍ନତି ପାଇଁ ଅନେକ ଗୁରୁତ୍ୱପୂର୍ଣ୍ଣ ଯୋଜନା ଆରମ୍ଭ କରିଥିଲେ । ଏହା ସହିତ ଦଳିତ ସମାଜର ମହାନ ପୁରୁଷଙ୍କ ନାମରେ ଅନେକ ଅନୁଷ୍ଠାନ ଏବଂ ପ୍ରତିଷ୍ଠାନ ନିର୍ମାଣ କରିଛନ୍ତି । ସର୍ବସାଧାରଣ ସ୍ଥାନରେ ଦଳିତ ସମାଜର ବହୁ ମହାନ ବ୍ୟକ୍ତିଙ୍କ ନାମରେ ଅନେକ ପ୍ରତିମୂର୍ତ୍ତି ମଧ୍ୟ ସ୍ଥାପନ କରିଥିଲେ । ଏହି କାରଣ ପାଇଁ ତାଙ୍କୁ ଅନେକ ସମାଲୋଚନାର ଶିକାର ହେବାକୁ ପଡିଥିଲା । ମାତ୍ର ସେ ତାଙ୍କ କାର୍ଯ୍ୟରୁ ଓହରି ନଥିଲେ ।
ବସୁନ୍ଧରା ରାଜ ସିନ୍ଧିଆ- ରାଜସ୍ଥାନର ପ୍ରଥମ ମହିଳା ମୁଖ୍ୟମନ୍ତ୍ରୀ ହେବାର ଗୌରବ ହାସଲ କରିଛନ୍ତି ବସୁନ୍ଧରା ରାଜ ସିନ୍ଧିଆ । ଭାରତୀୟ ଜନତା ପାର୍ଟିର ବରିଷ୍ଠ ନେତା ରାଜମାତା ବିଜୟରାଜସିନ୍ଧିଆଙ୍କ ଝିଅ ବାସୁନ୍ଧରା ରାଜ ସିନ୍ଧିଆ ତାଙ୍କ ମାଆଙ୍କ ପଥ ଅନୁସରଣ କରି ଭାରତୀୟ ଜନତା ପାର୍ଟି ପକ୍ଷରୁ ରାଜନୈତିକ ଇନିଂସ ଆରମ୍ଭ କରିଥିଲେ । ସେ ଦୁଇ ଦୁଇ ଥର ରାଜସ୍ଥାନର ମୁଖ୍ୟମନ୍ତ୍ରୀ ହୋଇଥିଲେ ।
ଜୟା ବଚ୍ଚନ- ଯଦିଓ ଲୋକମାନେ ଜୟା ବଚ୍ଚନଙ୍କୁ ଜଣେ ଫିଲ୍ମ ଅଭିନେତ୍ରୀ ଭାବରେ ଜାଣିଛନ୍ତି, ବର୍ତ୍ତମାନ ସେ କିନ୍ତୁ ରାଜନୈତିକ କ୍ଷେତ୍ରରେ ନିଜର ଆଉ ଏକ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି । ସେ ସମାଜବାଦୀ ପାର୍ଟି ପକ୍ଷରୁ ଲଗାତାର ତିନି ଥର ପାଇଁ ରାଜସ୍ଥାନର ସାଂସଦ ହୋଇଛନ୍ତି । ସେ ତାଙ୍କର ରାଜନୈତିକ କ୍ୟାରିୟର 2004 ରେ ସମାଜବାଦୀ ପାର୍ଟିରୁ ଆରମ୍ଭ କରିଥିଲେ । ସେବେଠାରୁ ସେ କ୍ରମାଗତ ଭାବରେ ରାଜ୍ୟସଭା ସାଂସଦ ରହିଆସିଛନ୍ତି ।
ସୁପ୍ରିୟା ସୁଲେ-ସୁପ୍ରିୟା ସୁଲେ ମରାଠା ରାଜନୀତିରେ ଜଣେ ଶକ୍ତିଶାଳୀ ନାରୀନେତ୍ରୀ ଭାବରେ ଜଣାଶୁଣା । ଶରଦ ପାୱାରଙ୍କ ଝିଅ ସୁପ୍ରିୟା ସୁଲେ ବାରମତୀ ଲୋକସଭା ଆସନକୁ ସାଂସଦ ଭାବରେ ପ୍ରତିନିଧିତ୍ୱ କରିଛନ୍ତି । 2009 ରେ, ସେ ପ୍ରଥମ ଥର ପାଇଁ ବାରମତୀ ଲୋକସଭା ନିର୍ବାଚନ ଜିତିଥିଲେ ।
