ହାଇଦ୍ରାବାଦ: ଖୁବଶୀଘ୍ର ସରକାରୀ ଟେଲିକମ କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ (BSNL) 3G ସେବା ବନ୍ଦ କରିବାକୁ ଯାଉଛି । ଖରାପ ନେଟୱର୍କକୁ ନେଇ ବାରମ୍ବାର ଅଭିଯୋଗ ଆସୁଥିବା ବେଳେ ଏହାକୁ ହ୍ରାସ କରିବା ଲାଗି କମ୍ପାନୀ ଏହି ପଦକ୍ଷେପ ନେଇଥିବା କୁହାଯାଉଛି । ଭାରତରେ ବିଏସଏନଏଲ କେବଳ 2G, 3G ଓ 4G ସେବା ଯୋଗାଉଥିବା ଟେଲିକମ କମ୍ପାନୀ । ପ୍ରାଥମିକ ପର୍ଯ୍ୟାୟରେ ଜାନୁଆରୀ 15 ତାରିଖଠାରୁ କେବଳ ବିହାର କ୍ୟାପିଟାଲ ସିଟି ପାଟନା ଓ ଅନ୍ୟ କିଛି ଜିଲ୍ଲାଗୁଡ଼ିକରେ 3G ସେବା ବନ୍ଦ ହେବାକୁ ଯାଉଛି ।
ବିହାରରୁ ଆରମ୍ଭ
ଅନେକ ଗଣମାଧ୍ୟମ ସଂସ୍ଥାରେ ପ୍ରକାଶିତ ରିପୋର୍ଟ ଅନୁଯାୟୀ, ବିଏସଏନଏଲ ମୁଖ୍ୟ ଜେନେରେଲ ମ୍ୟାନେଜର ଆର.କେ ଚୌଧୁରୀ କହିଛନ୍ତି ଯେ 4G ନେଟୱର୍କ ବିହାରର ଅନେକ ଜିଲ୍ଲାରେ ଅପଡେଟ ହୋଇଛି । ଫଳରେ ଅଧାରୁ ଅଧିକ ଜିଲ୍ଲାରେ 3G ନେଟୱର୍କ ସୁବିଧା ସମ୍ପୂର୍ଣ୍ଣ ଭାବେ ବନ୍ଦ କରାଯିବ । ଏହି ଜାନୁଆରୀ 15 ତାରିଖଠାରୁ ଆରମ୍ଭ ହେବ । କୁହାଯାଉଛି ପ୍ରଥମ ପର୍ଯ୍ୟାୟରେ ବିଏସଏନଏଲ ମୁଙ୍ଗେର, ଖଗଡ଼ିଆ, ବେଗୁସରାୟ, କଟିହାର, ମୋତିହାରିରେ 3G ନେଟୱର୍କ ବନ୍ଦ କରାଯାଇଛି । ଏହାପରେ ପାଟନା ସହିତ ଅନ୍ୟ ଜିଲ୍ଲାରେ 3ଜି ନେଟୱର୍କ ବନ୍ଦ କରାଯିବ । ଏହାଦ୍ବାରା 3G SIM ରଖିଥିବା ଗ୍ରାହକ କେବଳ କଲ୍ କରିପାରିବେ, ସେମାନଙ୍କୁ ଇଣ୍ଟରନେଟ୍ ସେବା ମିଳିବ ନାହିଁ । ଯେଉଁମାନେ କେବଳ କଲ୍ ଓ ମେସେଜ ପାଇଁ ମୋବାଇଲ ବ୍ୟବହାର କରୁଛନ୍ତି, ସେମାନେ 3G SIM ବ୍ୟବହାର କରିପାରିବେ ।
3G SIM ବଦଳାଇ ମାଗଣାରେ ପାଆନ୍ତୁ ନୂଆ 4G SIM
ବିଏସଏନଏଲ ମୋବାଇଲ ସେବାର ପ୍ରିନ୍ସିପାଲ ଜେନେରାଲ ମ୍ୟାନେଜର ଶଙ୍କର ପ୍ରସାଦ କହିଛନ୍ତି ଯେ 3G ସିମ୍ ଥିଲେ ଏହାକୁ ବଦଳାଇ 4G ସିମ୍ ଆଣନ୍ତୁ । ଏଥିଲାଗି କୌଣସି ଅର୍ଥ ଖର୍ଚ୍ଚ କରିବାକୁ ପଡ଼ିବ ନାହିଁ । ମାଗଣାରେ 3G ସିମକାର୍ଡଧାରୀଙ୍କୁ 4G SIM ମିଳିବ । ଗ୍ରାହକ ଏଥିଲାଗି ନିକଟସ୍ଥ ଗ୍ରାହକ ସୁବିଧା କେନ୍ଦ୍ର କିମ୍ବା ବିଏସଏନଏଲ କାର୍ଯ୍ୟାଳୟ ଯାଇପାରିବେ ।
କେବେଠୁ ଆରମ୍ଭ ହେଲା BSNL 4G ସର୍ଭିସ ?
କହି ରଖୁଛୁ କି, ଡିସେମ୍ବର 2024ରେ ସରକାରୀ ଟେଲିକମ କମ୍ପାନୀ ଭାରତର 4ଟି ପ୍ରମୁଖ ସହର ଦିଲ୍ଲୀ, ମୁମ୍ବାଇ, କୋଲକାତା ଓ ଚେନ୍ନାଇରେ 4G ସେବା ଆରମ୍ଭ କରିଛି । ଜୁନ 2025 ସୁଦ୍ଧା ସମସ୍ତ ସର୍କଲରେ 4ଜି ସେବା ଉପଲବ୍ଧ କରିବାକୁ କମ୍ପାନୀ ଯୋଜନା କରୁଛି । ଖାଲି ସେତିକି ନୁହେଁ 2025 ପ୍ରାରମ୍ଭରୁ କମ୍ପାନୀ ୟୁଜରଙ୍କୁ 5G ସେବା ପ୍ରଦାନ କରିବାକୁ ମଧ୍ୟ ଲକ୍ଷ୍ୟ ରଖିଛି ।
କେଉଁ ପ୍ରକାର ସେବା ପ୍ରଦାନ କରେ BSNL ?
ଏହି ସରକାରୀ ଟେଲିକମ କମ୍ପାନୀ ମୋବାଇଲ ଲାଗି ପ୍ରି-ପେଡ୍ ଓ ପୋଷ୍ଟପେଡ୍ ପ୍ଲାନ ସହିତ ଲ୍ୟାଣ୍ଡଲାଇନ, ବ୍ରଡବ୍ୟାଣ୍ଡ, ଫାଇବର ଲାଗି ଅନେକ ଶସ୍ତା ପ୍ଲାନ ପ୍ରଦାନ କରିଥାଏ ।
- ମୋବାଇଲ ସେବା
- ଲ୍ୟାଣ୍ଡଲାଇନ ସେବା
- ବ୍ରଡବ୍ୟାଣ୍ଡ ସେବା
- ଫାଇବର ସେବା
