ହାଇଦ୍ରାବାଦ: ସାଧାରଣତଃ ମିଠା ଜାତୀୟ ଖାଦ୍ୟକୁ ସ୍ବାସ୍ଥ୍ୟ ଅପକାରୀ ବୋଲି ଆମେ କହିଥାଉ । ବାସ୍ତବରେ ମଧ୍ୟ ଏପରି ହୋଇଥାଏ । ଅନେକ ମିଠା ଜାତୀୟ ଖାଦ୍ୟ ଅଛି ଯାହା ଆମ ଶରୀରକୁ କ୍ଷତି ପହଞ୍ଚାଇ ଥାଏ । ହେଲେ ଜାଣନ୍ତି କି, ଏପରି ମଧ୍ୟ ଏକ ମିଠା ଅଛି, ଯାହା ସ୍ବାସ୍ଥ୍ୟ ପାଇଁ ବେଶ୍ ଉପକାରୀ । ଆଜ୍ଞା ହଁ, ତାହା ହେଉଛି ମହୁ । ମହୁରେ ଏପରି ଅନେକ ଭଲ ଗୁଣ ରହିଛି, ସେଥିପାଇଁ ଏହାକୁ ଆୟୁର୍ବେଦିକ ଔଷଧ ପାଇଁ ଏକ ଆଦର୍ଶ ଭାବରେ ବିବେଚନା କରାଯାଏ ।
ଯଦି ଆମେ ଏହାର ପୁଷ୍ଟିକର ବିଷୟବସ୍ତୁ ସମ୍ପର୍କରେ ଆଲୋଚନା କରିବା ତେବେ ମହୁରେ ଫ୍ରୁକ୍ଟୋଜ, ନିୟାସିନ, କାର୍ବୋହାଇଡ୍ରେଟ, ରାଇବୋଫ୍ଲାଭିନ, ଭିଟାମିନ୍ ବି6, ଭିଟାମିନ୍ ଏ, ଭିଟାମିନ୍ ସି, ଆଇରନ୍, ମ୍ୟାଗ୍ନେସିୟମ୍, କ୍ୟାଲସିୟମ୍, କ୍ୟାଲୋରୀ, ସୋଡିୟମ୍, ପୋଟାସିୟମ୍ ଏବଂ ଡାଏଟାରୀ ଫାଇବର ଅନ୍ତର୍ଭୁକ୍ତ । ଆଣ୍ଟିବାୟୋଟିକ୍ ଏବଂ ଆଣ୍ଟି-ଅକ୍ସିଡାଣ୍ଟ ଗୁଣ ମହୁରେ ପ୍ରଚୁର ପରିମାଣରେ ଭରି ରହିଥାଏ ।
କାନାଡାର ଟରୋଣ୍ଟୋ ୟୁନିଭରସିଟିର ବିଶେଷଜ୍ଞମାନେ ଜାଣିବାକୁ ପାଇଛନ୍ତି ଯେ, ମହୁ କୋଲେଷ୍ଟ୍ରଲ ଏବଂ ରକ୍ତଚାପରେ ଉନ୍ନତି ଆଣିବାରେ ଆଶ୍ଚର୍ଯ୍ୟଜନକ ଭାବେ କାର୍ଯ୍ୟ କରିପାରିବ । ସେମାନେ କୁହନ୍ତି ଯେ, ମହୁ ଉପବାସ ସମୟରେ ରକ୍ତରେ ଗ୍ଲୁକୋଜର ସ୍ତର, ଫ୍ୟାଟି ଲିଭର ରୋଗ ମାର୍କର ଏବଂ ଖରାପ କୋଲେଷ୍ଟ୍ରଲ ମଧ୍ୟ ହ୍ରାସ କରିଥାଏ । ଉଚ୍ଚ କୋଲେଷ୍ଟ୍ରଲ ପ୍ରାୟତ ଏକ ନୀରବ ଘାତକ ଭାବରେ ଜଣାଶୁଣା, କାରଣ ଏହା ଠିକ୍ ସମୟରେ ସମାଧାନ କରାନଗଲେ କରୋନାରୀ ହୃଦ୍ରୋଗ କରିପାରେ ।
ଏହା ସହିତ, ଉଚ୍ଚ ରକ୍ତରେ ଶର୍କରା ହେଉଛି ଡାଇବେଟିସ୍ର ମୁଖ୍ୟ କାରଣ । ତଥାପି, ମହୁ ଏହି ଦୁଇଟି ରୋଗକୁ ନିୟନ୍ତ୍ରଣ କରିପାରେ ବୋଲି ଜଣାପଡିଛି, ଯାହା ବିଶେଷଜ୍ଞଙ୍କୁ ଚକିତ କରିଛି । କାରଣ ମହୁରେ ୮୦ ପ୍ରତିଶତ ଶର୍କରା ଥାଇ ମଧ୍ୟ ଏହା ମଧୁମେହ ଏବଂ ଉଚ୍ଚ ରକ୍ତଚାପକୁ ହ୍ରାସ କରିବା ବିଶେଷଜ୍ଞମାନଙ୍କୁ ଆଶ୍ଚର୍ଯ୍ୟ କରିଛି । ସାଧାରଣତଃ ମହୁରେ ପ୍ରୋଟିନ୍ସ, ବାୟୋଆକ୍ଟିଭ୍ କମ୍ପାଉଣ୍ଡ୍ସ, ଶର୍କରା ଏବଂ ଅର୍ଗାନିକ୍ ଏସିଡ୍ ଥାଏ ।
ସାମୂହିକ ଭାବରେ, ଏହି ଉପାଦାନଗୁଡ଼ିକରେ ପାର୍ଶ୍ୱ ପ୍ରତିକ୍ରିୟା ଅପେକ୍ଷା ଭଲ ଗୁଣ ରହିଛି । ଏହା ମଧ୍ୟ ଜଣାପଡିଛି ଯେ, ଏହି ପରୀକ୍ଷଣରେ ଅଂଶଗ୍ରହଣ କରିଥିବା ଲୋକଙ୍କର ଏକ ସୁସ୍ଥ ଖାଦ୍ୟ ଥିଲା, ଯେଉଁଥିରେ ଶର୍କରା ସହିତ ଦୈନିକ କ୍ୟାଲୋରୀ ଗ୍ରହଣର ମାତ୍ର ୧୦ ପ୍ରତିଶତ ରହିଥାଏ । ଯେଉଁମାନେ ପୂର୍ବରୁ ଚିନିରୁ ଦୂରେଇ ରୁହନ୍ତି, ସେମାନଙ୍କ ପାଇଁ ଖାଦ୍ୟରେ ମହୁ ମିଶାଇବା ଜରୁରୀ ନୁହେଁ । କିନ୍ତୁ ଯେଉଁମାନେ କିଛି ପ୍ରକାରର ଚିନି ଖାଉଛନ୍ତି, ଏକ ନିରାପଦ ବିକଳ୍ପ ଭାବେ ମହୁ କାର୍ଯ୍ୟ କରିଥାଏ ।
ମହୁର ଉପକାରିତା
ଆୟୁର୍ବେଦ କ୍ଷେତ୍ରରେ ମଧ୍ୟ ମହୁର ବେଶ୍ ଉପକାରୀ ଗୁଣ ରହିଛି । ମହୁ ଖାଇବା ଦ୍ବାରା ସ୍ବାସ୍ଥ୍ୟରେ ଉନ୍ନତି ଆସିବା ସହ ସୌନ୍ଦର୍ଯ୍ୟ ମଧ୍ୟ ବୃଦ୍ଧି ପାଇଥାଏ । ଅନେକ ଘରୋଇ ଉପଚାର ମହୁକୁ ନେଇ ଗଠିତ । ଯାହାକି ଏକ ନିର୍ଦ୍ଦିଷ୍ଟ ଉପାୟରେ ଉପକାର କରିଥାଏ । ଯେପରିକି ଉଷୁମ ପାଣିରେ ମହୁ ଖାଇବା ଦ୍ବାରା ହଜମ ପ୍ରକ୍ରିୟା, କୋଷ୍ଠକାଠିନ୍ୟ, ଗଳା ଯନ୍ତ୍ରଣା, ଓଜନ ହ୍ରାସ ଆଦିରେ ସାହାଯ୍ୟ କରେ । ଫେସମାସ୍କରେ ମଧ୍ୟ ମହୁକୁ ବ୍ୟବହାର କଲେ ତ୍ବଚାରେ ଉଜ୍ଜ୍ବଳ ଆସିଥାଏ ।
