ନୂଆଦିଲ୍ଲୀ: ଆସନ୍ତାକାଲି(ଅପ୍ରେଲ 1)ରୁ ଔଷଧ କ୍ରୟ ଉପରେ ଲାଗୁ ହେବାକୁ ଯାଉଛି ନୂଆ ନିୟମ । ଘୋଷଣାନାମା ଅନୁଯାୟୀ, ଗୁରୁତର ତଥା ବିରଳ ରୋଗ ପାଇଁ ଅନ୍ୟ ଦେଶରୁ ଆସୁଥିବା ଔଷଧ, ଚିକିତ୍ସା ସାମଗ୍ରୀ ତଥା ଖାଦ୍ୟ ସାମଗ୍ରୀ ଉପରେ କଷ୍ଟମ୍ ଡ୍ୟୁଟି ସମ୍ପୂର୍ଣ୍ଣ ଛାଡ କରାଯିବ । ଏଥିସହ ବିଭିନ୍ନ ପ୍ରକାରର କର୍କଟ ଚିକିତ୍ସାରେ ବ୍ୟବହୃତ ପେମ୍ବ୍ରୋଲିଜୁମ୍ବା(କିଟ୍ରୁଡା) ଉପରେ ସରକାର ବେସିକ୍ କଷ୍ଟମ ଡ୍ୟୁଟି ଛାଡ କରିଛନ୍ତି । କେତେକ ଔଷଧରେ ସାଧାରଣତଃ 10 ପ୍ରତିଶତ ବେସିକ୍ କଷ୍ଟମ୍ସ ଡ୍ୟୁଟି ଲାଗୁ କରାଯାଇ ଥିବାବେଳେ କେତେକ ବର୍ଗର ଜୀବନ ରକ୍ଷାକାରୀ ଔଷଧରେ 5% ଏବଂ ଅନ୍ୟ କେତକ ଔଷଧରେ ଆଦୌ କଷ୍ଟମ୍ସ ଡ୍ୟୁଟି ଲାଗି ନଥାଏ ।
ଅର୍ଥ ମନ୍ତ୍ରଣାଳୟ ସୂଚନା ଅନୁସାରେ, 'କେନ୍ଦ୍ର ସରକାର ଦୁର୍ଲଭ ରୋଗ ପାଇଁ ଜାତୀୟ ନୀତି 2021 ଅନୁଯାୟୀ ତାଲିକାଭୁକ୍ତ ସମସ୍ତ ଗୁରୁତର ରୋଗର ଚିକିତ୍ସା ତଥ୍ୟା ବ୍ୟକ୍ତିଗତ ବ୍ୟବହାର ପାଇଁ ଆମଦାନୀ ହୋଇଥିବା ଔଷଧ ଏବଂ ନିର୍ଦ୍ଦିଷ୍ଟ ପ୍ରକାରର ଖାଦ୍ୟ ଉପରେ କଷ୍ଟମ୍ ଡ୍ୟୁଟି ଛାଡ କରିଛନ୍ତି । କଷ୍ଟମ୍ ଡ୍ୟୁଟି ଛାଡ ପାଇବା ପାଇଁ ବ୍ୟକ୍ତିଗତ ଆମଦାନୀକାରୀଙ୍କୁ କେନ୍ଦ୍ରୀୟ ତଥା ରାଜ୍ୟ ନିର୍ଦ୍ଦେଶକ ସ୍ୱାସ୍ଥ୍ୟ ସେବା କିମ୍ବା ଜିଲ୍ଲା ମେଡିକାଲ୍ ଅଫିସର କିମ୍ବା ଜିଲ୍ଲାର ସିଭିଲ୍ ସର୍ଜନଙ୍କ ଦ୍ବାରା ଦିଆଯାଇଥିବା ପ୍ରମାଣପତ୍ର ପ୍ରସ୍ତୁତ କରିବାକୁ ପଡିବ ।
ଏହା ମଧ୍ୟ ପଢନ୍ତୁ:- ପୃଥିବୀରେ ଆଉ କେହି ମରିବେନି ! ଏହି ଟେକ୍ନୋଲୋଜି ସାହାଯ୍ୟରେ ଅମର ହୋଇଯିବ ମଣିଷ
ତେବେ ପୂର୍ବରୁ ମେରୁଦଣ୍ଡ ମାଂସପେଶୀ ଆଟ୍ରୋଫି କିମ୍ବା ଡୁଚେନେ ମସ୍କୁଲାର ଡିଷ୍ଟ୍ରୋଫି ପାଇଁ ଔଷଧ ଆମଦାନୀ ଉପରେ ସରକାର କଷ୍ଟମ ଡ୍ୟୁଟି ଛାଡ କରିସାରିଛନ୍ତି । କିନ୍ତୁ ଅନ୍ୟାନ୍ୟ ଗୁରୁତର ରୋଗ ପାଇଁ ଅତ୍ୟାବଶ୍ୟକ ଔଷଧ ଆମଦାନୀ ଉପରେ କଷ୍ଟମ ଡ୍ୟୁଟିରେ ଛାଡ ପାଇଁ ଦାବି କରାଯାଉଥିଲା । ରୋଗ ଗମ୍ଭୀରତା ଏବଂ ଆର୍ଥିକ ପରିସ୍ଥିତିକୁ ଦୃଷ୍ଟିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି ।
ଅନ୍ୟପଟେ କେତେକ ପ୍ରକାର ଔଷଧର ମୂଲ୍ୟ ବୃଦ୍ଧି ପାଇବାକୁ ଯାଉଛି । ଅପ୍ରେଲ ପହିଲା ଠାରୁ ମୂଲ୍ୟ ବୃଦ୍ଧି ନିୟମ ମଧ୍ୟ ଲାଗୁ ହେବ । ପାରାସିଟାମୋଲ ସମେତ ଅନେକ ଜରୁରୀ ଔଷଧର ମୂଲ୍ୟ ବୃଦ୍ଧି ପାଇବ । ଆଣ୍ଟିବାୟୋଟିକ୍, ଆଣ୍ଟି-ଇନଫେକ୍ଟିଭ୍, ଯନ୍ତ୍ରଣାକାରୀ, ହୃଦ୍ରୋଗ ପାଇଁ ଔଷଧ ଏହି ତାଲିକାର ଶୀର୍ଷରେ ଅଛି । ଫାର୍ମାସ୍ୟୁଟିକାଲ୍ କମ୍ପାନୀ ବର୍ତ୍ତମାନ ହଲ୍ ବିକ୍ରିରେ ମହଙ୍ଗା ଦରରେ ଔଷଧ ବିକ୍ରି କରିବେ ।
'ହୋଲ୍ ସେଲ୍ ଇଣ୍ଡେକ୍ସ'ର ବାର୍ଷିକ ଔଷଧ ଖର୍ଚ୍ଚ ମଧ୍ୟ ବୃଦ୍ଧି କରାଯାଇଛି । ଜାତୀୟ ଫାର୍ମାସ୍ୟୁଟିକାଲ୍ ପ୍ରାଇସିଂ ଅଥରିଟି(NPPA) ସୋମବାର କହିଛି ଯେ, 2022 ମସିହାରେ ହୋଲ୍ ସେଲ୍ ଇଣ୍ଡେକ୍ସ 12.12 ପ୍ରତିଶତ ବୃଦ୍ଧି ପାଇଛି । ବର୍ତ୍ତମାନ 2023 ରେ ପୁଣି ଥରେ ଏହି ଔଷଧର ମୂଲ୍ୟ ବଢିବାକୁ ଯାଉଛି ।
