ଭୁବନେଶ୍ବର: ଜୁନ୍ ୧୨ ତାରିଖରେ ବାରବାଟୀ ଷ୍ଟାଡିୟମରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ ବୁରୁ ପ୍ରତୀକ୍ଷିତ ଟି୨୦ ମୁକାବିଲା । ଦୀର୍ଘଦିନ ପରେ ବାରବାଟୀରେ ପ୍ରିୟ କ୍ରିକେଟରଙ୍କୁ ଦେଖିବାକୁ ସୁଯୋଗ ମିଳିବ । ଏଥିପାଇଁ ଉତ୍ସାହିତ ଅଛନ୍ତି ସମସ୍ତ ଓଡିଆ ପ୍ରେମୀ । ମ୍ୟାଚ୍ର ସଫଳ ଆୟୋଜନ ପାଇଁ ଓଡିଶା କ୍ରିକେଟ ଆସୋସିଏସନର(OCA) ପ୍ରସ୍ତୁତି ଶେଷ ପର୍ଯ୍ୟାୟରେ ରହିଛି । ତେବେ ଷ୍ଚାଡିୟମରେ ଅଗ୍ନି ନିରାପତ୍ତା ବ୍ୟବସ୍ଥା ସଠିକ୍ କରିବାକୁ ଓଏଚ୍ଆର୍ସି (Odisha Human Rights Commission) ନିର୍ଦ୍ଦେଶ ଦେଇଛି । କିଛି ଦିନ ତଳେ ଷ୍ଟାଡିୟମରେ ଅଗ୍ନି ନିରାପତ୍ତା ବ୍ୟବସ୍ଥା ନଥିବାରୁ ନୋଟିସ ଜାରିକରିଥିଲା OHRC ।
ମ୍ୟାଚ୍ ପାଇଁ ଷ୍ଟାଡିୟମ୍ରେ ଆବଶ୍ୟକୀୟ ଅଗ୍ନି ନିରାପତ୍ତା ବ୍ୟବସ୍ଥା ନଥିବା ଓଡ଼ିଶା ମାନବାଧିକାର କମିଶନଙ୍କ (OHRC) ନିକଟରେ କଟକ DCP ତାଙ୍କ ରିପୋର୍ଟରେ ଏହା ଦର୍ଶାଇଛନ୍ତି । ତେବେ ମ୍ୟାଚ୍ ପାଇଁ ପୂର୍ବରୁ ଅଗ୍ନି ନିରାପତ୍ତା ବ୍ୟବସ୍ଥା କରାଯିବ । OCA ଏକ ଘରୋଇ ସଂସ୍ଥା ଉପରେ ଅଗ୍ନି ନିରାପତ୍ତା ଓ ନିର୍ବାପକ ସାମଗ୍ରୀ ସୁବ୍ୟବସ୍ଥିତ କରିବାକୁ ଦାୟିତ୍ଵ ନ୍ୟସ୍ତ କରିଛି । ଏହି ସଂସ୍ଥା ଷ୍ଟାଡିୟମରେ ସମସ୍ତ ଅଗ୍ନି ନିରାପତ୍ତା ବ୍ୟବସ୍ଥା ସୁନିଶ୍ଚିତ କରିବାକୁ ଆବଶ୍ୟକୀୟ ସମସ୍ତ ସରଞ୍ଜାମ ଯୋଗାଇଦେବ ବୋଲି କୁହାଯାଇଛି ।
ଅଗ୍ନି ନିରାପତ୍ତା ବ୍ୟବସ୍ଥାକୁ ନେଇ ଆବେଦନକାରୀ ନିଶିକାନ୍ତ ମିଶ୍ର OHRCଙ୍କୁ ଜଣାଇଥିଲେ। ପାଖାପାଖି ୪୪ ହଜାର ଦର୍ଶକ ଷ୍ଟାଡିୟମରେ ବସିବେ ମାତ୍ର ସେମାନଙ୍କ ସୁରକ୍ଷା ପାଇଁ କୌଣସି ଆବଶ୍ୟକୀୟ ଅଗ୍ନି ନିରାପତ୍ତା ବ୍ୟବସ୍ଥା ନାହିଁ । ଏହି ବିଷୟରେ ନିଶିକାନ୍ତ ମିଶ୍ର ପୂର୍ବରୁ ସେଣ୍ଟ୍ରାଲ ରେଞ୍ଚ ଅଗ୍ନିଶମ ଅଧିକାରୀଙ୍କ ନିକଟକୁ ପତ୍ର ଲେଖିଥିଲେ । ଏଥିପାଇଁ ଅଗ୍ନିଶମ କାର୍ଯ୍ୟାଳୟ ପକ୍ଷରୁ ଓସିଏକୁ ଅଗ୍ନି ନିରାପତ୍ତା ପ୍ରମାଣପତ୍ର ହାସଲ କରିବାକୁ ଆବେଦନ କରିବା ପାଇଁ କୁହାଯାଇଥିଲା । ଏହାପରେ ମ୍ୟାଚ୍ ପାଇଁ କ'ଣ ଅଗ୍ନି ନିରାପତ୍ତା ବ୍ୟବସ୍ଥା ରହିଛି ତା’ର ରିପୋର୍ଟ ଦେବାକୁ କଟକ DCP ଓ OCA ସମ୍ପାଦକଙ୍କୁ ନୋଟିସ କରିଥିଲେ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
