ରାଉରକେଲା: 2019 ନିର୍ବାଚନ ବିଗୁଲ ବାଜିବା ପରେ ଏବେ ଜାରି ହୋଇ ଯାଇଛି ନିର୍ବାଚନ ଆଚରଣ ବିଧି । ନିର୍ବାଚନ ସମୟରେ ଶାନ୍ତି ଶୃଙ୍ଖଳା ରକ୍ଷା କରିବା ହେଉଛି ଏହାର ମୂଳ ଉଦ୍ଦେଶ୍ୟ । ନିର୍ବାଚନରେ ପ୍ରତିଦ୍ବନ୍ଦିତା କରୁଥିବା ସବୁ ଦଳ ଏହାକୁ ମାନିବା ପାଇଁ ବାଧ୍ୟ। ମାତ୍ର ଏଥିରେ ବ୍ୟତିକ୍ରମ ଦେଖିବାକୁ ମିଳିଛି ସୁନ୍ଦରଗଡ ଜିଲ୍ଲାରେ।
ଶୁକ୍ରବାର ବିଜେଡି ପକ୍ଷରୁ ଏଠାକାର ଲୋକସଭା ପ୍ରାର୍ଥୀନୀ ସୁନିତା ବିଶ୍ବାଳ ଏବଂ ବୀରମିତ୍ରପୁର ବିଧାନସଭା ପ୍ରାର୍ଥୀ ମକ୍ଲୁ ଏକ୍କା ନୂଆଗାଁ ବ୍ଲକ ଅଞ୍ଚଳରେ ଏକ ବିରାଟ ନିର୍ବାଚନ ଶୋଭାଯାତ୍ରା କରିବା ପାଇଁ ଯାଉଥିଲେ । ବିଜେଡିର ଏହି ନିର୍ବାଚନୀ ରାଲି ବାହାରିବା ପାଇଁ ଯାଉଥିବା ବେଳେ ଏହାକୁ ଅଟକାଇ ଥିଲା ପୋଲିସ । ପ୍ରଶାସନର ବିନା କୌଣସି ଅନୁମତିରେ ବିଜେଡିର ଏପରି ଶୋଭାଯାତ୍ରା କରୁଥିଲା ବୋଲି ଜଣାପଡିଛି ।
ଦଳୀୟ ଶୋଭାଯାତ୍ରାକୁ ଅଟକାଯିବା ପରେ ବିଜେଡ଼ି ନେତ୍ରୀ ମିନତୀ ଦେବତା ସହ ଦଳର ଅନ୍ୟ ନେତା ପ୍ରଶାସନ ସହ ଯୁକ୍ତିତର୍କ କରିଥିଲେ । ଖୋଲାଖୋଲି ଭାବେ କିପରି ରାଜ୍ୟରେ କ୍ଷମତାସୀନ ଥିବା ଶାସକ ଦଳ କିପରି ଆଗାମୀ ନିର୍ବାଚନ ପାଇଁ ଲାଗୁ ହୋଇଥିବା ଆଦର୍ଶ ଆଚରଣ ବିଧିର ଉଲଘଂନ କରୁଛି ତାହା ବର୍ତ୍ତମାନ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଈଟିଭି ଭାରତ
