ସୁନ୍ଦରଗଡ: ଟାଉନ ଥାନା ଅନ୍ତର୍ଗତ ରାଜ୍ୟ ରାଜପଥ 10 ଭୋଜପୁର ନିକଟରେ ଥିବା ମୋଟେଲ ଇବ ଭେଲିର ରୁମ ନମ୍ବର 106 ରେ ଜଣେ ଯୁବ ବ୍ୟବସାୟୀଙ୍କ ଅସ୍ବାଭାବିକ ମୃତ୍ୟୁ ହୋଇଛି । ମୃତ ବ୍ୟକ୍ତିଙ୍କ ପ୍ୟାନ କାର୍ଡ ନମ୍ବରରୁ ତାଙ୍କ ନାମ ଅଭିନନ୍ଦନ ରାୟ ଚୌଧୁରୀ ଓ ତାଙ୍କ ବାପାଙ୍କ ନାମ ଅମିୟ ରାୟ ଚୌଧୁରୀ ବୋଲି ଜଣାପଡିଛି । ମୃତ ବ୍ୟକ୍ତିଙ୍କ ଘର କଲିକତା ବୋଲି ହୋଟେଲ ମାଲିକ କହିଛନ୍ତି ।
ତେବେ ଗତକାଲି ରାତି 10 ଟା ସମୟରେ ସେ ହୋଟେଲକୁ ଆସିଥିଲେ । ରୁମର ଡୋର ଲକ କରିବା ସମୟରେ ସେ ହୋଟେଲ ବୟକୁ ପରଦିନ 11ଟାରେ ଡାକି ଦେବାକୁ କହିଥିଲେ । ହୋଟେଲ ବୟ 11ଟା ସମୟରେ ବାରମ୍ବାର ଡାକି କୌଣସି ଉତ୍ତର ନ ପାଇବାରୁ ହୋଟେଲ ମାଲିକଙ୍କୁ ଏ ନେଇ ଜଣାଇଥିଲା ।
ମାଲିକ ଏହା ଜାଣିବା ପରେ ପୋଲିସକୁ ଜଣାଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ସନ୍ଦେହଜନକ ଅବସ୍ଥାରେ ମୃତଦେହ ଉଦ୍ଧାର କରିଛି । ପୋଲିସ ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ଜବତ କରିବା ସହ ସାଇଣ୍ଟିଫିକ ଟିମ ନେଇ ତଦନ୍ତ ଆରମ୍ଭ କରିଛି । ମୃତ ବ୍ୟକ୍ତି କୌଣସି ବ୍ୟବସାୟିକ କାମରେ ଗତ କାଲି ସୁନ୍ଦରଗଡ ଆସିଥିଲେ ବୋଲି ପୋଲିସ ତାର ପ୍ରାଥମିକ ତଦନ୍ତରେ କହିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
