ସୁନ୍ଦରଗଡ: ଟିଡିସିସିଏଲ ଜିଲ୍ଲା ମ୍ୟାନେଜର ଭିଜିଲାନ୍ସ ଦ୍ଵାରା ଗିରଫ । ବୋଲେରୋ ସହ ପ୍ରାୟ 19 ଲକ୍ଷ ଟଙ୍କା ଜବତ କରିଛି ଭିଜିଲାନ୍ସ । ତାଙ୍କୁ ସୁନ୍ଦରଗଡ ଭିଜିଲାନ୍ସ ଏସପିଙ୍କ ନିର୍ଦ୍ଦେଶରେ ଗିରଫ କରାଯାଇଛି ।
ସୁନ୍ଦରଗଡ଼ ଆଦିବାସୀ ଉନ୍ନୟନ ସମବାୟ ନିଗମ ଓଡିଶା ଲିମିଟେଡର ଜିଲ୍ଲା ମ୍ୟାନେଜର ଜୟ ପ୍ରକାଶ ମହାନ୍ତି ବିପୁଳ ପରିମାଣରେ ଅର୍ଥ ନେଉଥିବାବେଳେ ଭିଜିଲାନ୍ସ ହାତରେ ଧରାପଡିଛନ୍ତି । ତାଙ୍କୁ ସୁନ୍ଦରଗଡ଼ ଜିଲ୍ଲା ମସୁନି କାନି ଟୋଲ ଗେଟ ନିକଟରୁ ଗିରଫ କରିଛି ଭିଜିଲାନ୍ସ । ତାଙ୍କ ନିକଟରୁ ମୋଟ 18 ଲକ୍ଷ 80 ହାଜର 500 ଟଙ୍କା ଜବତ କରିଛି ଭିଜିଲାନ୍ସ ।
ସୂଚନାଥାଉକି ଟଙ୍କା ନେଇ ଯାଉଥିବା ନେଇ ରାଉରକେଲା ଭିଜିଲାନ୍ସ ଏସପିଙ୍କୁ ସୂଚନା ମିଳିଥିଲା । ତୁରନ୍ତ ଏସପିଙ୍କ ନିର୍ଦେଶରେ ସୁନ୍ଦରଗଡ଼ ଓ ରାଉରକେଲା ଭିଜିଲାନ୍ସ ମିଳିତ ଭାବେ ଚଢ଼ାଉ କରିଥିଲା । ତାଙ୍କୁ ମସୁନି କାନି ଟୋଲ ଗେଟ ନିକଟରୁ ଗିରଫ କରିବା ସହ ସେ ଯେଉଁ ବୋଲେରୋରେ ଏହି ଟଙ୍କା ନେଇ ଯାଉଥିଲେ ତାକୁ ମଧ୍ୟ ଜବତ କରିଛି ଭିଜିଲାନ୍ସ ।
ତେବେ ଏତେ ଟଙ୍କା କାହାର ଓ ଏହା କେଉଁଠିକୁ ନେଉଥିଲେ ସେ ନେଇ ମ୍ୟାନେଜର କିଛି ସନ୍ତୋଷ ଜନକ ଉତ୍ତର ଦେଇପାରି ନ ଥିବା ଭିଜିଲାନ୍ସ ଡିଏସପି ସୁଧାଂଶୁଶେଖର ପୂଜାରୀ କହିଛନ୍ତି । ଅପରପକ୍ଷେ ମ୍ୟାନେଜର ଏହାକୁ ଭୁବନେଶ୍ବର କାର୍ଯ୍ୟାଳୟକୁ ନେଉଥିଲେ ବୋଲି ସଫେଇ ଦେଇଛନ୍ତି ।
ସୁନ୍ଦରଗଡରୁ ହରିହର ଦାସମହାପାତ୍ର,ଇଟିଭି ଭାରତ
