ରାଉରକେଲା: ପାଣି ସମସ୍ୟା ନେଇ ୱାଟକୋ ଅଫିସ ଘେରିଲେ ବସ୍ତି ବାସିନ୍ଦା । ରାଉରକେଲା ସହରର ୱାଟକୋ ଅଫିସ ଗେଟ ସମ୍ମୁଖରେ ବସି ଆନ୍ଦୋଳନ କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି ବସ୍ତି ବାସିନ୍ଦା । ସହରର ଗାନ୍ଧୀ ରୋଡ଼ ଏବଂ ମଧୁସୂଦନ ପାଲ୍ଲୀ ଅଞ୍ଚଳର ମହିଳାମାନେ ଗତକାଲି ରାଉରକେଲାର ପାନପୋଷ ୱାଟକୋ କାର୍ଯ୍ୟଳୟରେ ଏକାଠି ହୋଇ ବିକ୍ଷୋଭ କରିଥିଲେ । ଦୁଇ ବର୍ଷ ତଳେ ପାଇପ୍ ଲାଇନ୍ ଲଗାଯିବା ସତ୍ତ୍ବେ ଜଳଯୋଗାଣ ହୋଇ ନଥିବାରୁ ଏଭଳି ପଦକ୍ଷେପ ଗ୍ରହଣ କରିଥିବା ଅଭିଯୋଗ କରିଛନ୍ତି ମହିଳାମାନେ ।
ସୂଚନା ଅନୁଯାୟୀ, ସହରର ଗାନ୍ଧୀ ରୋଡ଼ ସହ ମଧୁସୂଦନ ପାଲ୍ଲୀରେ ଦୀର୍ଘ ଦିନ ଧରି ପାନୀୟ ଜଳର ଘୋର ସମସ୍ୟା ଲାଗି ରହିଛି । ଏନେଇ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ପାଣି ପାଇପ୍ ଲାଇନ୍ ଲଗାଯିବା ସତ୍ତ୍ୱେ ସେମାନଙ୍କର ନଳକୂପ ବା ପାଣି ଟ୍ୟାଙ୍କର ଦୈନନ୍ଦିନ ଜଳ ଆବଶ୍ୟକତା ପାଇଁ ଗୋଟିଏ ବିକଳ୍ପ ବ୍ୟବସ୍ଥା । ଟ୍ୟାଙ୍କର ମଧ୍ୟ ଦିନେ ଆସିଲେ ଦିନେ ନାହିଁ ପାଣି ଟିକିଏ ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଲୋକେ।
ଏହା ମଧ୍ୟ ପଢନ୍ତୁ- ଟ୍ୟାପ ଅଛି ପାଣି ଆସୁନି, ୱାଟକୋ ଅଫିସ୍ ଘେରିଲେ ବସ୍ତିବାସିନ୍ଦା
ଯେଉଁଠି ରାଜ୍ୟ ସରକାର ଘରେ ଘରେ ପାଣି ଯୋଗାଇ ଦେବା କଥା ପ୍ରତିଶ୍ରୁତି ଦେଇଥିଲେ ସେଠାରେ ଆଜି ଲୋକେ ପାଇ ପାରୁନାହାନ୍ତି ପାଣି । ପାଣି ପାଇଁ କେବଳ ଟ୍ୟାଙ୍କରକୁ ଭରସା କରି ଚାଲିଛନ୍ତି ବସ୍ତି ବାସିନ୍ଦା । ଏହି ପାଣି ସମସ୍ୟା ବିଶେଷ କରି ମହିଳାମାନଙ୍କ ଏବଂ ଶିଶୁ ମାନଙ୍କ ପାଇଁ ଅତ୍ୟନ୍ତ କଷ୍ଟକର ପରିସ୍ଥିତି ସୃଷ୍ଟି କରିଛି । ନିଜର ସହନଶୀଳତାର ପରିଚୟ ଦେଇ ବହୁ ମହିଳା ରାଉରକେଲା ପାନପୋଷ ସ୍ଥିତ ୱାଟକୋ କାର୍ଯ୍ୟାଳୟରେ ଏକତ୍ରିତ ହୋଇ ନାରାବାଜି କରିବା ସହ ନିଜ ଅଞ୍ଚଳରେ ଜଳ ସଙ୍କଟର ସମାଧାନ ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି ।
ସେହିପରି ସେମାନଙ୍କ ଦୈନନ୍ଦିନ ଜୀବନ ପାଇଁ ଜଳର ଅତ୍ୟାବଶ୍ୟକ ଉପରେ ଗୁରୁତ୍ୱାରୋପ କରି ତୁରନ୍ତ ଏହାର ସମାଧାନ ପାଇଁ ସେମାନେ ଓ୍ବାଟକୋ ଅଧିକାରୀମାନଙ୍କୁ ଦାବି କରିଛନ୍ତି । ଏନେଇ ୱାଟକୋ ଅଧିକାରୀ କହିଛନ୍ତି ଯେ, "ଖୁବ ଶୀଘ୍ର ଏହି ସମସ୍ୟା ସମସ୍ତ ବସ୍ତିରୁ ଉଠିବ। ବର୍ତ୍ତମାନ କାମ ଚାଲିଛି ମାତ୍ର ଗୋଟିଏ ମାସ ମଧ୍ୟରେ ବସ୍ତିରୁ ପାଣି ସମସ୍ୟା ଦୂର ହେବ ।"
ଇଟିଭି ଭାରତ, ରାଉରକେଲା
