ରାଉରକେଲା: ଟାଇଁଟାଇଁ ଖରା, ଅସମ୍ଭାଳ ତାତି । ଅସହ୍ୟ ଗରମରେ ଜଳୁଛି ପଶ୍ଚିମ ଓଡ଼ିଶା । ପ୍ରଚଣ୍ଡ ଖରାରେ ସିଝୁଛି ରାଉରକେଲା ସହର । ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଥିବା ବେଳେ ପଶ୍ଚିମ ଓଡ଼ିଶାର ବିଭିନ୍ନ ଜିଲ୍ଲାରେ ତାପମାତ୍ରା ଅଧିକ ରହୁଛି । ଆଜି ରାଉରକେଲା ସହରରେ 40 ଡିଗ୍ରୀ ଛୁଇଁଛି ପାରଦ । ସତେ ଯେମିତି, ତତଲା କଡ଼େଇରେ ଭାଜି ହେଉଛି ରାଉରକେଲା । ସେ ଦିନ ହେଉ କିମ୍ବା ରାତି, ଅସହ୍ୟ ଗୁଳୁଗୁଳିରେ ଆଉଟୁ ପାଉଟୁ ହେଉଛନ୍ତି ସହରବାସୀ ।
ସୁନ୍ଦରଗଡ଼ ଜିଲ୍ଲା ସହ ରାଉରକେଲା ସହର ଏବଂ ବଣାଇ ଓ କୋଇଡା, ରାଜଗାଙ୍ଗପୁର, ବିରମିତ୍ରପୁର ଅଞ୍ଚଳରେ ପ୍ରଚଣ୍ଡ ଖରା ଅନୁଭୂତ ହେଉଛି । ଅସହ୍ୟ ତାତି ସାଙ୍ଗକୁ ଗୁଳୁଗୁଳି କରୁଛି ଅସ୍ତବ୍ୟସ୍ତ ତାତି ବଢିବା ସାଙ୍ଗକୁ ଝାଞ୍ଜି ପବନ ଜନଜୀବନ ଅସ୍ତବ୍ୟସ୍ତ କରି ପକାଉଛି । ସକାଳ ୮ଟାରୁ ଘରୁ ବାହାରିବା ଏକ ପ୍ରକାର ମୁସ୍କିଲ ହୋଇପଡ଼ିଛି । ଏତି ଜରୁରୀ କାମ ଥିଲେ ସାଙ୍ଗରେ ଛତା, ପାଣି ବୋତଲ ଏବଂ ମୁଣ୍ଡରେ ଗାମୁଛା ବାନ୍ଧି ଲୋକେ ବାହାରକୁ ବାହାରୁଛନ୍ତି । ଟାଣ ଖରାରେ ମନକୁ ଟିକିଏ ଫୂର୍ତ୍ତି ଦେବା ସହିତ ଶରୀରକୁ ଆରାମ ଦେବାପାଇଁ ଆଖୁରସ ଏବଂ ସର୍ବତ ଦୋକାନରେ ସମସ୍ତଙ୍କ ଭିଡ଼ ଜମୁଛି । ପ୍ରଚଣ୍ଡ ଖରାରେ ପଇଡ଼ ପାଣି ଟିକିଏ ପିଇ ଲୋକେ ଆଶ୍ବସ୍ତି ଅନୁଭବ କରୁଛନ୍ତି । ଦିିନ ୧୨ରୁ ଅପରାହ୍ନ ୫ଟା ପର୍ଯ୍ୟନ୍ତ ଅଧିକାଂଶ ଦୋକନ ବଜାର ବନ୍ଦ ରହୁଥିବାବେଳେ ରାସ୍ତାଘାଟ ଶୂନଶାନ ହୋଇଯାଉଛି । ଏତେ ମାତ୍ରାରେ ଗରମ ହେଉଛି ଯେ, ଏସି କିମ୍ବା କୁଲର ମଧ୍ୟ କାମ କରୁନଥିବା କହିଲେ ଚଳେ । ତେଣୁ ପ୍ରଚଣ୍ଡଖରାକୁ ଦୃଷ୍ଟିରେ ରଖି ସହର ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ତେଣୁ ଖରାରେ ବାହାରକୁ ବାହାରିଲେ ସତର୍କ ଅବଲମ୍ବନ କରିବା ପାଇଁ ସତର୍କ କରାଯାଇଛି ।
ଏହା ମଧ୍ୟ ପଢ଼ନ୍ତୁ: ବୌଦ୍ଧରେ ପଥପ୍ରାନ୍ତ ବନୀକରଣ ଫେଲ୍; ମୁଣ୍ଡଫଟା ଖରାରେ ଅସ୍ତବ୍ୟସ୍ତ ଜନଜୀବନ
ଏନେଇ ଜଣେ ସହରବାସୀ କହିଛନ୍ତି, "ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଆଗୁଆ ସତର୍କ କରାଯାଇଛି । ଅତି ଜରୁରୀ କାମ ନଥିଲେ ପଦାକୁ ନବାହାରିବା ପାଇଁ ପରାମର୍ଶ ଦିଆଯାଇଛି । ପ୍ରଶାସନ ପକ୍ଷରୁ ପ୍ରତି ଅଞ୍ଚଳରେ ବୁଲି ଅଂଶୁଘାତ ନେଇ ଲୋକଙ୍କୁ ସଚେତନ କରାଯାଉଛି ।" ଅନ୍ୟପଟେ ସମସ୍ତ ଜରୁରୀକାଳୀନ ପରିସ୍ଥିତି ପାଇଁ ରାଉରକେଲା ପ୍ରଶାସନ ଆଗୁଆ ପ୍ରସ୍ତୁତ ଥିବା କୁହାଯାଇଛି ।"
ଇଟିଭି ଭାରତ, ରାଉରକେଲା
