ରାଉରକେଲା: ଆଜି (ରବିବାର) ରାଉରକେଲା ଆସିବେ ମହାମହିମ ରାଷ୍ଟ୍ରପତି ରାମନାଥ କୋବିନ୍ଦ । ରାଉରକେଲା ଗସ୍ତ ଅବସରରେ ଏନଆଇଟି କନଭୋକେସନରେ ଯୋଗଦେବେ ରାଷ୍ଟ୍ରପତି କୋବିନ୍ଦ । ସେହିପରି ରାଉରକେଲା ଷ୍ଟିଲ ପ୍ଲାଣ୍ଟ ଦ୍ବାରା ନିର୍ମିତ ସୁପର ସ୍ପେଶାଲିଟି ହସ୍ପିଟାଲର ଉଦଘାଟନ ମଧ୍ୟ କରିବେ ।
ରାଷ୍ଟ୍ରପତିଙ୍କ କାର୍ଯ୍ୟକ୍ରମ ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ବିଶେଷ କରି ଶାନ୍ତି , ଶୃଙ୍ଖଳା ଓ ନିର୍ଦ୍ଧାରିତ ସମୟରେ କାର୍ଯ୍ୟକ୍ରମ ସମାପନକୁ ଗୁରୁତ୍ବ ଦିଆଯାଇଛି । । ଏହାସହ ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ସାମିଲ ହେବାକୁ ଥିବା ଅତିଥି ଓ ଅଧିକାରୀଙ୍କ ଶନିବାର ମକଡ୍ରିଲ ଶେଷ ହୋଇଛି । ରାଷ୍ଟ୍ରପତି ରବିବାର ସକାଳ ( ପୂର୍ବାହ୍ନ )10:35ରେ ରାଉରକେଲା ଏୟାର ଷ୍ଟ୍ରିପରେ ପହଞ୍ଚିବେ । ଦିନ 11ଟାରେ ଏନଆଇଟି କନଭୋକେସନ କାର୍ଯ୍ୟକ୍ରମରେ ଯୋଗଦେବେ ।
ଏହି କାର୍ଯ୍ୟକ୍ରମ ଦିନ 11ଟାରୁ ଦିନ 12ଟା ପର୍ଯ୍ୟନ୍ତ ଚାଲିବ ଏକ ଘଣ୍ଟା ଚାଲିବ । ଏନଆଇଟି କନଭୋକେସନ କାର୍ଯ୍ୟକ୍ରମ ଶେଷ ହେବାପରେ ରାଉରକେଲା ହାଉସରେ ମଧ୍ୟାହ୍ନ ଭୋଜନ କରିବା ସହ କିଛି ସମୟ ବିଶ୍ରାମ ନେବେ । ପରେ ଅପରାହ୍ନ 3:45ରେ ସୁପର ସ୍ପେଶାଲିଟି ହସ୍ପିଟାଲ ଉଦଘାଟନ କାର୍ଯ୍ୟକ୍ରମରେ ସାମିଲ ହୋଇ ମେଡିକାଲକୁ ଉଦଘାଟନ କରିବେ ।
ରାଉରକେଲାରେ ରାଷ୍ଟ୍ରପତିଙ୍କ ଦ୍ବିତୀୟ କାର୍ଯ୍ୟକ୍ରମ ଅପରାହ୍ନ 3:45 ରୁ 4:30 ପର୍ଯ୍ୟନ୍ତ ଚାଲିବ । କାର୍ଯ୍ୟକ୍ରମ ଶେଷ ହେବାପରେ ଅପରାହ୍ନ 4:50 ରେ ରାଉରକେଲା ଛାଡି ଭୁବନେଶ୍ବର ଫେରିଆସିବେ ।
ସୁନ୍ଦରଗଡରୁ ହରିହର ଦାସମହାପାତ୍ର, ଇଟିଭି ଭାରତ
