ସୁନ୍ଦରଗଡ: ନିଖୋଜ ବିର୍ଜୁର ମିଳିଲା ପତ୍ତା । ଅନୁଗୋଳ ତାଳଚେରରୁ ଠାବ କଲା ପୋଲିସ । ସୂଚନାଥାଉକି, ପାକିସ୍ତାନର ଲାହୋର ଜେଲରେ ଦୁଇ ଦଶନ୍ଧି ବନ୍ଦୀ ଜୀବନ ବିତାଇବା ପରେ ସୁନ୍ଦରଗଡ ଫେରିଥିଲେ ବିର୍ଜୁ । ନଭେମ୍ବର 13 ତାରିଖରେ ସୁନ୍ଦରଗଡ କୁତ୍ରା ବ୍ଲକ ଜଙ୍ଗରପଡା ଫେରିଥିଲେ ସେ । ଦୀର୍ଘ 25 ବର୍ଷ ନିଖୋଜ ପରେ ବିର୍ଜୁ ଗାଁକୁ ଫେରିଥିବାରୁ ତାଙ୍କ ପରିବାର ସହିତ ପଡୋଶୀ ମଧ୍ୟ ବେଶ୍ ଖୁସି ଥିଲେ ।
ହେଲେ ସେମାନଙ୍କ ଖୁସି ପୁଣି ହଜି ଯାଇଥିଲା । ଶନିବାର ମଧ୍ୟରାତ୍ରୀରୁ ବିର୍ଜୁ ପୁଣି କେଉଁଆଡେ ଚାଲିଯାଇଥିଲା । ବହୁ ଖୋଜାଖୋଜି ପରେ ନପାଇବାରୁ ଥାନାର ଦ୍ବାରସ୍ଥ ହୋଇଥିଲେ ବିର୍ଜୁଙ୍କ ପରିବାର । ସେପଟେ ବିର୍ଜୁର ନିଖୋଜ ଘଟଣା ପରିବାର ଲୋକଙ୍କୁ ଯେତିକି ଚକିତ କରିଛି ପ୍ରଶାସନ ପାଇଁ ମଧ୍ୟ ସେତିକି ମୁଣ୍ଡ ବ୍ୟଥାର କାରଣ ସାଜିଥିଲା ।
ବିର୍ଜୁ ଫେରିବା ପରେ ତାକୁ ସମସ୍ତ ପ୍ରକାର ସରକାରୀ ସହାୟତା ଯୋଗାଇଦେବାକୁ ଉଦ୍ୟମ କରିଥିବା ପ୍ରଶାସନ, ଚିନ୍ତାରେ ପଡିଥିଲା । ବିର୍ଜୁ ଫେରିବା ପରେ ତାର ସମସ୍ତ ଖର୍ଚ୍ଚ ପ୍ରଶାସନ ତୁଲାଉଥିଲା । ଏପରିକି ରହିବା ପାଇଁ ଘର ନଥିବାରୁ ତାକୁ ପକ୍କା ଘର ଯୋଗାଇଦେବାକୁ ବ୍ୟବସ୍ଥା କରାଯାଇଥିଲା । ହେଲେ ସେ ପୁଣି କେଉଁଆଡେ ଚାଲିଯାଇଥିବାରୁ ତାକୁ ଖୋଜିବା ପାଇଁ ପ୍ରଶାସନ ପୂରା ଦମ୍ରେ ଲାଗିଥିଲା ।
ତେବେ 25 ବର୍ଷ ତଳୁ ନିଖୋଜ ହୋଇଥିଲେ ବିର୍ଜୁ । ଏହି ସମୟରେ ସେ ପାକିସ୍ତାନର ଲାହୋର ଜେଲରେ 20 ବର୍ଷ ଧରି ବନ୍ଦୀ ଜୀବନ କଟାଇଥିଲେ । ପରେ କୁତ୍ରା ପୋଲିସକୁ ଏନେଇ ସୂଚନା ମିଳିଥିଲା । ସୂଚନା ପାଇବାପରେ ପରିବାର ଲୋକେ ପ୍ରଶାସନର ଆଶ୍ରୟ ନେଇଥିଲେ ।
ରାଜ୍ୟ ସରକାର ଓ ଜିଲ୍ଲା ପ୍ରଶାସନର ଉଦ୍ୟମରେ ସେ ଘରକୁ ଫେରିଥିଲେ । ତାଙ୍କୁ ଘରକୁ ଫେରାଇ ଆଣିବା ସହ ଜିଲ୍ଲା ପ୍ରଶାସନ ତାଙ୍କର ପ୍ରତିପୋଷଣର ଦାୟିତ୍ବ ନେଇଥିଲା । ସବୁ ଏକ ପ୍ରକାର ସୁରୁଖୁରୁରେ ଚାଲିଥିଲା । ପରିବାର ଲୋକେ ତାଙ୍କର ସମସ୍ତ ଯତ୍ନ ମଧ୍ୟ ନେଉଥିଲେ । ହେଲେ ସେ ପୁଣି କେଉଁଆଡେ ପଳାଇଥିଲା । ତେବେ ବିର୍ଜୁ ମାନସିକ ବିକାରଗ୍ରସ୍ତ ଥିବାବେଳେ ତାକୁ ଶୀଘ୍ର ଖୋଜିବାକୁ ପ୍ରଶାସନ ଚେଷ୍ଟା କରିଥିଲା । ଫଳରେ ଆଜି ସେ ଉଦ୍ଧାର ହୋଇଥିବା ସୂଚନା ମିଳିଛି ।
ସୁନ୍ଦରଗଡରୁ ହରିହର ଦାସମହାପାତ୍ର, ଇଟିଭି ଭାରତ
