ରାଉରକେଲା: ଦିନକୁ ଦିନ ଅସୁରକ୍ଷିତ ହେବାକୁ ଲାଗିଛି ରାଉରକେଲା ବିର୍ସା ମୁଣ୍ଡା ହକି ଷ୍ଟାଡିୟମ । ଏହାର ନିର୍ମାଣ କାର୍ଯ୍ୟ ଏବଂ ସ୍ବଚ୍ଛତା ଉପରେ ଉଠୁଛି ପ୍ରଶ୍ନ । ମାତ୍ର ଗୋଟିଏ ବର୍ଷାରେ ବେହାଲ ହୋଇପଡିଛି ରାଉରକେଲା ବିର୍ସା ମୁଣ୍ଡା ହକି ଷ୍ଟାଡିୟମ । କେଉଁଠି କାନ୍ଥରେ ଫାଟ ହୋଇଗଲାଣି ତ କେଉଁଠି ଫୁଟପାଥ୍ ଧସିଯାଇଛି । କେଉଁଠି ଗୋଟିଏ ବର୍ଷାରେ ଭାଙ୍ଗି ପଡିଯାଇଛି ସମ୍ପୂର୍ଣ୍ଣ କାନ୍ଥ । ତେବେ ବର୍ଷା ହେବା ଯୋଗୁଁ ନିର୍ମାଣ କାର୍ଯ୍ୟର ସ୍ବଚ୍ଛତା ଉପରେ ବର୍ତ୍ତମାନ ପ୍ରଶ୍ନବାଚୀ ସୃଷ୍ଟି ହୋଇଛି । ନିର୍ମାଣ କାର୍ଯ୍ୟରେ ବ୍ୟାପକ ଦୁର୍ନୀତି ହୋଇଥିବା ସ୍ଥାନୀୟ ବାସିନ୍ଦାଙ୍କଠୁ ବିରୋଧୀଙ୍କ ଅଭିଯୋଗ ହୋଇଛି ।
ବିର୍ସା ମୁଣ୍ଡା ହକି ଷ୍ଟାଡିୟମ ଭିତ୍ତିଭୂମିରେ ଫାଟ ଦୁର୍ନୀତି ଚିନ୍ତା ବଢ଼ାଉଛି । ଗୋଟିଏ ଦିନର ବର୍ଷାରେ ରାଉରକେଲା ସହରର ଷ୍ଟାଡିୟମ କାନ୍ଥ ଫାଟି ଯାଇଛି । ଏସବୁ ଘଟଣା ସହରର ବିକାଶ କାର୍ଯ୍ୟକୁ କେତେଦୂର ଫଳପ୍ରଦ କରିଛି, ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି । କେବଳ ସେତିକି ନୁହେଁ, ଏହି ଦୁର୍ଭାଗ୍ୟଜନକ ସ୍ଥିତିରେ ଷ୍ଟାଡିୟମ ନିର୍ମାଣ ସମେତ ରାଉରକେଲାରେ ହେଉଥିବା ପ୍ରକଳ୍ପ କାର୍ଯ୍ୟରେ ବ୍ୟାପକ ଦୁର୍ନୀତି ନେଇ ଅଭିଯୋଗ ହେଉଛି । ଏକଦା ଜାତୀୟ ଓ ଅନ୍ତର୍ଜାତୀୟ ହକି ଇଭେଣ୍ଟ ଆୟୋଜନ ପାଇଁ ପରିଚିତ ଥିବା ଐତିହ୍ୟ ସମ୍ପନ୍ନ ଷ୍ଟାଡିୟମ ଏବେ ଅବହେଳା ଓ ଦୁର୍ବଳ ଭିତ୍ତିଭୂମିର ଦୃଶ୍ୟମାନ ପ୍ରତୀକ ଭାବେ ଛିଡ଼ା ହୋଇଛି । ନିକଟରେ ଷ୍ଟାଡିୟମ ନିକଟରେ ଓ ରାଉରକେଲା ସହରର ବିଭିନ୍ନ ସ୍ଥାନରେ ଫୁଟପାଥ୍ ଭୁଶୁଡ଼ିବା ଘଟଣା ସ୍ଥିତିକୁ ଆହୁରି ଗମ୍ଭୀର କରିଛି ।
ଷ୍ଟାଡିୟମର ଦୁଇ ନମ୍ବର ଗେଟ୍ ସମ୍ମୁଖରେ ପୂର୍ବରୁ ହୋଇଥିବା ରାସ୍ତା ଓ ଫୁଟପାଥ ଭୁଶୁଡ଼ିବା ଘଟଣା ନିକଟରେ ଘଟିଥିବା ଘଟଣାଗୁଡ଼ିକର ପୂର୍ବାନୁମାନ ଥିଲା । ଏଭଳି ବାରମ୍ବାର ଦେଖାଦେଉଥିବା ପ୍ରସଙ୍ଗ ସହରର ବିକାଶମୂଳକ ପ୍ରକଳ୍ପର ଅଖଣ୍ଡତା ଓ ସ୍ବଚ୍ଛତାକୁ ନେଇ ସନ୍ଦେହ ସୃଷ୍ଟି କରୁଛି । ରାଉରକେଲାରେ ଭିତ୍ତିଭୂମିର ମାନ ସହ ସାଲିସ କରିବାରେ ଦୁର୍ନୀତି ବିଶେଷ ଭୂମିକା ଗ୍ରହଣ କରିଛି କି ବୋଲି ଅନେକ ନାଗରିକ ପ୍ରଶ୍ନ କରିବା ଆରମ୍ଭ କରିଛନ୍ତି । ମାତ୍ର ଗୋଟିଏ ଦିନର ବର୍ଷା ପରେ ଏଭଳି ଭୟଙ୍କର କ୍ଷତି ଘଟିବା ଉଦବେଗଜନକ । ସରକାରୀ ଅନୁଦାନ ରାଶିର ଉପୟୋଗ ଏବଂ ଏହି ପ୍ରକଳ୍ପଗୁଡ଼ିକର ତଦାରଖ କରୁଥିବା ଅଧିକାରୀଙ୍କ ଦକ୍ଷତା ବିଷୟରେ ଜନସାଧାରଣ ଉତ୍ତର ମାଗୁଛନ୍ତି ।
ଏହା ବି ପଢନ୍ତୁ- ଧସିଲା ବିର୍ସା ମୁଣ୍ଡା ଷ୍ଟାଡିୟମର ମୁଖ୍ୟ ରାସ୍ତା, ଷ୍ଟାଡିୟମ ସୁରକ୍ଷିତ ତ ?
ବର୍ତ୍ତମାନ ଷ୍ଟାଡିୟମର ଗେଟ ନମ୍ବର ୬ କାନ୍ଥରେ ବିରାଟ ଫାଟ ଦେଖିବାକୁ ମିଳିଛି । ତେବେ କେତେବେଳେ କେଉଁ ମୁହୂର୍ତ୍ତରେ ଫାଟ ସମ୍ପୂର୍ଣ୍ଣ କାନ୍ଥ ଗଳି ପଡିବ ତାହା କହି ହେଉନାହିଁ । ଏହାସହ ଷ୍ଟାଡିୟମ ନିକଟରେ ଥିବା ଏକ କାନ୍ଥ ସମ୍ପୂର୍ଣ୍ଣ ଭୁଶୁଡି ପଡିଛି । ଏହାସହ ସହରର ବିଭିନ୍ନ ସ୍ଥାନ ଏବଂ ଷ୍ଟାଡିୟମ ନିକଟରେ ଥିବା ଫୁଟପାଥ ମଧ୍ୟ ଭାଙ୍ଗିଯାଇଛି ଏବଂ କେଉଁ କେଉଁ ସ୍ଥାନରେ ତାହା ସମ୍ପୂର୍ଣ୍ଣ ଧସି ଯାଇଛି । ସ୍ଥାନୀୟ ପ୍ରଶାସନ ଏବଂ ସମ୍ପୃକ୍ତ କର୍ତ୍ତୃପକ୍ଷ ତୁରନ୍ତ ଏହି ଭିତ୍ତିଭୂମି ସମସ୍ୟାର ସମାଧାନ କରିବା ସହ ଦୁର୍ନୀତି ଅଭିୟୋଗର ତଦନ୍ତ କରିବା ଆବଶ୍ୟକ । ଷ୍ଟାଡିୟମ ନିର୍ମାଣ ଓ ରକ୍ଷଣାବେକ୍ଷଣରେ କୌଣସି ପ୍ରକାର ଅନିୟମିତତା କିମ୍ବା ଅବ୍ୟବସ୍ଥାକୁ ଚିହ୍ନଟ କରିବା ପାଇଁ ସ୍ବଚ୍ଛ ଓ ପୁଙ୍ଖାନୁପୁଙ୍ଖ ତଦନ୍ତ କରାଯାଉ ବୋଲି ଦାବି ହୋଇଛି ।
ଇଟିଭି ଭାରତ, ରାଉରକେଲା
