ରାଉରକେଲା: ରାଉରକେଲାର ରାଇଜିଂ ଷ୍ଟାର ବିଶାଖା ଟପ୍ପୋ । ଜାତୀୟ ଉପକନିଷ୍ଠ ବ୍ୟାଡମିଣ୍ଟନ ପ୍ରତିଯୋଗିତାରେ ଚମକିଲେ । ଦକ୍ଷତା ଓ ଦୃଢ ଖେଳର ପ୍ରଦର୍ଶନରେ ରାଉରକେଲାର ଯୁବ ବ୍ୟାଡମିଣ୍ଟନ୍ ପ୍ରତିଭା ବିଶାଖା ଟପ୍ପୋ ପୁଣିଥରେ ନିଜ ମାଟି ପାଇଁ ଗୌରବ ଆଣିଛନ୍ତି । ନିକଟରେ ଲକ୍ଷ୍ନୌରେ ଅନୁଷ୍ଠିତ ଜାତୀୟ ଉପକନିଷ୍ଠ ବ୍ୟାଡମିଣ୍ଟନ୍ ପ୍ରତିଯୋଗିତାରେ ଏହି ପ୍ରତିଭାବାନ ଖେଳାଳୀ ଯୁଗଳ ବର୍ଗରେ ସ୍ବର୍ଣ୍ଣ ପଦକ ହାସଲ କରି ବିଜେତା ହୋଇଛନ୍ତି ।
ରାଉରକେଲାର ଇସ୍ପାତ ଇଂରାଜୀ ମଧ୍ୟମ ବିଦ୍ୟାଳୟର ଛାତ୍ରୀ ବିଶାଖା ପୁରା ଟୁର୍ଣ୍ଣାମେଣ୍ଟରେ ନିଜର ଉଲ୍ଲେଖନୀୟ ଦକ୍ଷତା ପ୍ରଦର୍ଶନ କରି ପ୍ରତିଦ୍ବନ୍ଦ୍ବୀଙ୍କୁ ଚକିତ କରିଥିଲେ । ନିଜର ଯୁଗଳ ସାଥୀଙ୍କ ସହ ମିଶି ସେ ଚମତ୍କାର ସମନ୍ବୟ ଓ ରଣକୌଶଳର ପରିଚୟ ଦେଇ ଫାଇନାଲରେ ପ୍ରତିପକ୍ଷ ଖେଳାଳୀଙ୍କ ଉପରେ ଆଧିପତ୍ୟ ବିସ୍ତାର କରି ସ୍ବର୍ଣ୍ଣ ପଦକ ହାସଲ କରିଥିଲେ । ତେବେ ବିଶାଖାଙ୍କ ସଫଳତା ପଛରେ କେବଳ ତାଙ୍କ ନିଜ ଦକ୍ଷତା ନୁହେଁ, ପରିବାର ଓ ସମାଜରୁ ମିଳୁଥିବା ସହଯୋଗକୁ ମଧ୍ୟ ଶ୍ରେୟ ଦିଆଯାଇପାରିବ । ରାଉରକେଲା ଇସ୍ପାତ କାରଖାନାର ଜଣେ ପରିଶ୍ରମୀ କର୍ମଚାରୀ ଭାବେ କାର୍ଯ୍ୟ କରୁଥିବା ତାଙ୍କ ବାପା ଚାରୋ ଟପ୍ପୋ ତାଙ୍କର ବ୍ୟାଡମିଣ୍ଟନ ପ୍ରତି ଥିବା ଆଗ୍ରହକୁ ପ୍ରୋତ୍ସାହିତ କରିବା ସହ ତାଙ୍କ ସ୍ବପ୍ନକୁ ସାକାର କରିବା ପାଇଁ ନିଶ୍ଚିତ କରିଛନ୍ତି ।
ଏହା ମଧ୍ୟ ପଢ଼ନ୍ତୁ...Junior Women National Championship: ତାମିଲନାଡୁ ଚିତପଟାଙ୍ଗ୍, କ୍ବାର୍ଟର ଫାଇନାଲରେ ଓଡିଶା
ତେବେ ଲକ୍ଷ୍ନୌରେ ଚାଲିଥିବା ଜାତୀୟ ଉପକନିଷ୍ଠ ବ୍ୟାଡମିଣ୍ଟନ୍ ପ୍ରତିଯୋଗିତାରେ ବିଶାଖା ଟପ୍ପୋଙ୍କ ଅସାଧାରଣ ସଫଳତା ରାଉରକେଲା ପାଇଁ ଗୌରବ ଓ ଆନନ୍ଦ ଆଣିଦେଇଛି । ଯୁଗଳ ବର୍ଗରେ ତାଙ୍କ ସ୍ବର୍ଣ୍ଣ ପଦକ ଜିତିବା ତାଙ୍କ ଦକ୍ଷତା, ଦୃଢ ମନୋବଳ ଓ କଠିନ ପରିଶ୍ରମର ପ୍ରମାଣ । ପରିବାର, ସମାଜ ଓ ସ୍କୁଲର ସହଯୋଗରେ ବିଶାଖାଙ୍କ ସଫଳତାର କାହାଣୀ ଯୁବ ଆଥଲେଟ୍ମାନଙ୍କୁ ନିଜ ଖେଳର ଉଦ୍ୟମ କରିବାକୁ ପ୍ରେରଣା ଯୋଗାଇବ । ନିଜର ଆଶାଜନକ ପ୍ରତିଭା ଓ ଉଜ୍ଜ୍ବଳ ଭବିଷ୍ୟତ ବଳରେ ସେ ବ୍ୟାଡମିଣ୍ଟନ ଜଗତରେ ନିଜର ସ୍ଵତନ୍ତ୍ର ସ୍ଥାନ ହାସଲ କରିବେ ବୋଲି ଆଶା ରଖିଛନ୍ତି । ଏହାସହ ରାଉରକେଲା ଓ ଭାରତକୁ କ୍ରୀଡ଼ା ଉତ୍କର୍ଷତାର ବିଶ୍ବ ମାନଚିତ୍ରରେ ସ୍ଥାନିତ କରିବା ପାଇଁ ମଧ୍ୟ ଆଶା ରଖିଛନ୍ତି ବିଶାଖା । ତେବେ ଭବିଷ୍ୟତରେ ଜାତୀୟ ଏବଂ ଅନ୍ତର୍ଜାତୀୟସ୍ତରରେ ଖେଳିବା ଏବଂ ଅଲିମ୍ପିକ୍ସରେ ଖେଳି ମେଡଲ ଆଣିବା ନେଇ ସେ ଲକ୍ଷ୍ୟ ରଖିଛନ୍ତି ।
ଇଟିଭି ଭାରତ, ରାଉରକେଲା
