ସୁବର୍ଣ୍ଣପୁର: ଜିଲ୍ଲାର ଶିବତୁଲା ସେବା ସମବାୟ ସମିତିର ଦୁଇଜଣ କର୍ମଚାରୀ ଆଜି (ଶୁକ୍ରବାର) ଭିଜିଲାନ୍ସ ହାତରେ ଗିରଫ ହୋଇଛନ୍ତି । ଜିଲ୍ଲାର ତରଭା ବ୍ଲକ ଶିବତୁଲା ସେବା ସମବାୟ ସମିତିର ସମ୍ପାଦକ କୁନା ନାୟକ ଓ ଡାଟା ଏଣ୍ଟ୍ରି ଅପରେଟର ଦେବାନନ୍ଦ ନାଏକ ଆଜି ଜଣେ ଚାଷୀଙ୍କ ଠାରୁ ଲାଞ୍ଚ ନେଉଥିବା ଅବସ୍ଥାରେ ଧରାପଡି ଭିଜିଲାନ୍ସ ଦ୍ବାରା ଗିରଫ ହୋଇଛନ୍ତି । ଭାଲୁବାହାଲ ଗାଁର ଚାଷୀ ଜଳନ୍ଧର ଡାଙ୍ଗଙ୍କ ଠାରୁ ଧାନ ବିକ୍ରି ଟଙ୍କା ବ୍ୟାଙ୍କରେ ପକାଇ ଦେବା ପାଇଁ ଆଠ ହଜାର ଟଙ୍କା ଦାବି କରିଥିଲେ ।
ତେବେ ଜଳନ୍ଧର ଟଙ୍କା ଦେବା କଥାରେ ରାଜି ହୋଇ ଏନେଇ ଜିଲ୍ଲା ଭିଜିଲାନ୍ସ ବିଭାଗ ପାଖରେ ଅଭିଯୋଗ କରିଥିଲେ । ଯୋଜନା ମୁତାବକ ଆଜି ଉଭୟ ସମ୍ପାଦକ ଓ ଡାଟାଏଣ୍ଟ୍ରି ଅପରେଟର ଜଳନ୍ଧରଙ୍କ ଠାରୁ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଧରିନେଇଥିଲା । ଏନେଇ ଜିଲ୍ଲା ଭିଜିଲାନ୍ସ ବିଭାଗ ଏକ ଲାଞ୍ଚ ମାମଲା ଦାୟର କରି ଦୁଇ କର୍ମଚାରୀଙ୍କୁ ଗିରଫ କରିବା ସହିତ ସେବା ସମବାୟ ସମିତିର ଦୁର୍ନୀତି ସମ୍ପର୍କରେ ମଧ୍ୟ ତଦନ୍ତ ଆରମ୍ଭ କରିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
